Գլուխ 40

   
1․ Մխիթարեցէք, մխիթարեցէք զժողովուրդ իմ, ասէ Աստուած:

2․ քահանայքդ խաւսեցարուք ի սիրտ Երուսաղէմի` եւ մխիթարեցէք զդա, զի լի եղեւ տառապանաւք: Թողեալ լիցին դմա մեղք իւր, զի ընկալաւ ի ձեռանէ Տեառն կրկին զհատուցումն մեղաց իւրոց:

3․ Ձայն բարբառոյ յանապատի. պատրաստ արարէք զճանապարհս Տեառն, եւ ուղիղ արարէք զշաւիղս Աստուծոյ մերոյ:

4․ Ամենայն ձորք լցցին, եւ ամենայն լերինք եւ բլուրք խոնարհեսցին. եւ եղիցին ամենայն դժուարինք ի դիւրինս, եւ առապարքն ի դաշտս:

5․ Եւ երեւեսցին փառքն Տեառն. եւ տեսցէ ամենայն մարմին զփրկութիւն Աստուծոյ, զի Տէր խաւսեցաւ:

6․ Ձայն որ ասէ` գոչեա: եւ ասեմ, զի՞նչ գոչեցից: գոգջիր, ամենայն մարմին խոտ է, եւ ամենայն փառք մարդոյ իբրեւ զծաղիկ խոտոյ:

7․ Ցամաքեցաւ խոտն, եւ թաւթափեցաւ ծաղիկ նորա. զի ոգի Տեառն շնչեաց ի նա: արդարեւ խոտ է ժողովուրդս այս:

8․ ցամաքեցաւ խոտն, եւ թաւթափեցաւ ծաղիկն եւ բան Տեառն մնայ յաւիտեան:

9․ Ել ի վերայ լերինդ բարձու` աւետարանիչդ Սիոնի. բարձրացո զաւրութեամբ զբարբառ քո աւետարանիչդ Երուսաղէմի: բարձրացուցէք, մի երկնչիք. ասա ցքաղաքդ Յուդայ:

10․ Ահաւասիկ Աստուած ձեր` ահաւասիկ Տէր, Տէր գայ զաւրութեամբ եւ բազուկն տէրութեամբ իւրով. ահաւասիկ վարձք իւր ընդ իւր, եւ գործք առաջի նորա:

11․ Իբրեւ հովիւ մի հովուեսցէ զխաշինս իւր. եւ բազկաւ իւրով ժողովեսցէ զգառինս, եւ ի ծոց իւր կրեսցէ զնոսա, եւ մխիթար լիցի յղեաց:

12․ Ո՞ չափեաց ափով իւրով զջուրս, եւ զերկինս թզաւ, եւ զերկիր ամենայն` քլաւ: ո՞ կշռեաց զլերինս կշռով, եւ զդաշտս կշռորդաւք:

13․ Ո՞ գիտաց զմիտս Տեառն, եւ ո՞ եղեւ նմա խորհրդակից` եթէ խելամուտ արասցէ զնա:

14․ կամ ընդ ու՞մ խորհեցաւ` եւ արար զնա խելամուտ. կամ ո՞ եցոյց նմա զդատաստան` եւ զճանապարհ իմաստութեան. կամ ո՞ ետ նմա փոխ յառաջագոյն` եւ հատուցանիցէ նմա:

15․ Եթէ ամենայն հեթանոսք իբրեւ զկաթիլ մի ի դուլէ են, եւ իբրեւ զմէտ մի ի կշռոց համարեցան, եւ իբրեւ շիթք ի բերանոյ համարեսցին:

16․ Եթէ Լիբանան` չէ բաւական յայրումն, եւ ամենայն չորքոտանիք չեն բաւական յողջակէզս.

17․ եւ ամենայն հեթանոսք ոչ ինչ են, եւ յոչինչ համարեցան նմա:

18․ Արդ ու՞մ նմանեցուցէք զՏէր, եւ որու՞մ նմանութեան նմանեցուցէք զնա:

19․ միթէ պատկե՞ր կոփեաց զնա հեւսն, կամ ոսկերի՞չ ձուլեաց զնա ոսկի` եւ պատեաց զնա ոսկւով, ի նմանութիւն պատկերի կերպարանեաց զնա:

20․ Զփայտ անփուտ ընտրեաց հեւսն, եւ իմաստութեամբ հնարս խնդրէ զիա՞րդ կանգնեսցէ զնա զի մի շարժեսցի:

21․ Ոչ լսէք եւ ոչ իմանայք, եւ ո՞չ պատմեցաւ ձեզ ի սկզբանէ. ո՞չ գիտացէք թէ ո հաստատեաց զհիմունս երկրի:

22․ Որ ունի զծիր երկրի, եւ բնակիչք նորա իբրեւ զմարախ: որ կանգնեաց զերկինս իբրեւ զկամար, եւ ձգեաց իբրեւ զխորան. եւ հաստատեաց զերկիր բնակել ի նմա:

23․ որ տայ զիշխանս յոչինչ իշխանութիւն, եւ զերկիր իբրեւ զոչինչ արար:

24․ Զի ոչ սերմանեսցեն` եւ ոչ տնկեսցեն, եւ ոչ հաստատեսցի յերկրի արմատ նոցա. շնչեաց ի նոսա` եւ  ցամաքեցան. եւ փոթորիկօ իբրեւ զխռիւ առցէ զնոսա:

25․ Արդ` ու՞մ նմանեցուցէք զիս, եւ զուգեցայց ասէ սուրբն Իսրայէլի:

26․ Համբարձէք ի բարձունս զաչս ձեր, եւ տեսէք ո՞ հաստատեաց զայս ամենայն: ո՞ հանէ զզարդ նոցա, եւ զամենեսեան յանուանէ կոչէ. բազում փառաւք եւ սաստկութեամբ զաւրութեան, եւ մի ինչ` ոչ ծածկեցաւ ի քէն:

27․ Մի ասիցես Յակոբ, եւ զի՞նչ խաւսեցար Իսրայէլ. թէ ծածկեցան ճանապարհք իմ յԱստուծոյ, եւ Աստուած իմ եբարձ զիրաւունս իմ, եւ մեկնեցան:

28․ նա եւ այժմ ոչ ծանեար: Եթէ չէր լւեալ` Աստուած յաւիտենական. Աստուած որ հաստատեաց զծագս երկրի. ոչ քաղցիցէ, եւ ոչ վաստակեսցի. եւ չիք քննութիւն իմաստութեան նորա:

29․ տայ քաղցելոց զաւրութիւն, եւ անցաւաց զտրտմութիւն:

30․ Քաղցիցեն երիտասարդք, եւ վաստակեսցին մանկունք. եւ ընտիրք անզաւրք եղիցին:

31․ բայց որ սպասեն Տեառն, նորոգեսցին զաւրութեամբ. նորա փետուր զարդարեսցին իբրեւ զարծուիս. ընթասցին, եւ մի վաստակեսցին. գնասցեն` եւ մի քաղցիցեն: