Գլուխ 56

   
1. Ի կատարած մի ապականեր, ի Դաւիթ արձանագիր. ի ժամանակի զի փախուցեալ թաքուցեալ էր նա յերեսաց Սաւուղայ` յայրի անդ. ԾԶ:

2. Ողորմեա ինձ Աստուած ողորմեա ինձ, զի ի քեզ յուսացաւ անձն իմ: Ի հովանի թեւոց քոց յուսացայց, մինչչեւ անցցէ անաւրէնութիւն:

3. Աղաղակեցի առ Աստուած բարձրեալ, առ Աստուած բարերար իմ:

4. Առաքեաց յերկնից եւ կեցոյց զիս. եդ ի նախատինս որ կոխէին զիս: Առաքեաց Աստուած զողորմութիւն եւ զճշմարտութիւն իւր,

5. եւ փրկեաց զանձն իմ ի միջոյ գազանաց, զի ննջէի ես խռովեալ: Որդւոց մարդկան ատամունք իւրեանց զէն եւ նետք են, եւ լեզուք նոցա որպէս սուր սուսեր:

6. Բարձրեալ ես դու յերկինս Աստուած, յամենայն երկրի են փառք քո:

7. Որոգայթք պատրաստեցին ոտից իմոց, եւ խոնարհ արարին զանձն իմ. փորեցին առաջի իմ խորխորատ` եւ անկան ինքեանք ի նոյն:

8. Պատրաստ է սիրտ իմ Աստուած, պատրաստ է սիրտ իմ, աւրհնել եւ սաղմոս ասել քեզ փառաւք իմովք:

9. Զարթիք փառք իմ զարթիք սաղմոսիւք եւ աւրհնութեամբ, եւ ես զարթեայց առաւաւտուց:

10. Խոստովան եղէց քեզ ի ժողովուրդս Տէր, եւ սաղմոս ասացից քեզ յազինս:

11. Մեծ եղեւ մինչչեւ յերկինս ողորմութիւն քո. մինչչեւ յամպս է ճշմարտութիւն քո:

12. Բարձրեալ ես դու յերկինս, յամենայն երկրի են փառք քո: Տունք. ժգ: