Գլուխ 25

   
1․ Տէր Աստուած իմ փառաւոր արարից զքեզ. աւրհնեցից զանուն քո, զի արարեր սքանչելի իրս, զխորհուրդն առաջին զճշմարիտ:

2․ Այո Տէր. զի եդիր զքաղաքս ի հողաբլուրս, եւ զքաղաքս ամուրս ի կործանումն հիմանց նոցա. քաղաքք ամպարշտաց յաւիտենից մի շինեսցի:

3․ Վասն այսորիկ աւրհնեսցէ զքեզ ժողովուրդ աղքատ, եւ քաղաքք մարդկան զրկելոց աւրհնեսցեն զքեզ:

4․ զի եղեր ամենայն քաղաքի խոնարհի աւգնական, եւ տրտմելոց վասն կարաւտութեան` յարկ ապաւինի. ի մարդոց չարաց փրկեցեր զնոսա:

5․ Ապաւէն ծարաւեաց եւ ոգի մարդկան զրկելոց.իբրեւ մարդոց թալկացելոց` ծարաւեաց ի Սիովն. ի մարդոց ամպարշտաց որոց մատնեցեր զմեզ:

6․ Եւ արասցէ Տէր Սաբաւովթ ամենայն հեթանոսաց ի լերինս յայսմիկ: արբցեն ուրախութիւն, արբցեն գինի. աւծցին իւղով ի մրրոյ պարզելոյ,

7․ եւ ընկլցին ի լերինս յայսմիկ: Պատմեա զայս ամենայն հեթանոսաց. զի այս խորհուրդ է ի վերայ ամենայն ազգաց:

8․ Զաւրացաւ մահ եւ եկուլ. եւ դարձեալ եհատ Աստուած զամենայն արտաւսր յամենայն երեսաց, եւ զնախատինս ժողովրդեանն եբարձ յամենայն երկրէ.  զի բերան Տեառն խաւսեցաւ: զտապն հովանեաւ ամպոյ, եւ զբազուկս հզաւրաց խոնարհեցուսցէ:

9․ Եւ ասասցեն յաւուր յայնմիկ. ահաւասիկ Տէր Աստուած մեր յոր յուսացեալ էաք, եւ ապրեցուսցէ զմեզ. զի սա է Տէր, եւ սպասէաք սմա. եւ ցնծասցուք` եւ ուրախ եղիցուք ի փրկութեան մերում:

10․ Եւ տացէ մեզ հանգիստ Աստուած ի լերինս յայսմիկ: եւ լիցի կոխան մովաբացին, զոր աւրինակ կոխիցէ ոք զկալ կամնասայլիւք.

11․ եւ հանգուցանիցէ զձեռս իւր. նոյնպէս եւ նա չուառեցոյց զնոսա ի կորուսանել: եւ խոնարհեցուսցէ զբարձրութիւն նորա, յոր արկանէր զձեռս իւր:

12․ Եւ զբարձրութիւն ապաստանի պարսպաց քոց խոնարհեցուսցէ. եւ իջցեն մինչչեւ ի յատակս: