Գլուխ 31

   
1․ Վայ ոյք իջանեն յԵգիպտոս վասն աւգնականութեան. որ ի հեծեալս եւ ի կառս յուսացեալ իցեն` թէ բազումք են, եւ բազմութիւն երիվարաց յոյժ. եւ ոչ էին յուսացեալ ի սուրբն Իսրայէլի, եւ զԱստուած ոչ խնդրեցին:

2․ Եւ նա իմաստուն էր` եւ ածէր ի վերայ նոցա չարիս. եւ բան նորա ոչ անարգեսցի: եւ յարիցէ ի վերայ տանց մարդոց չարաց, եւ ի վերայ սնոտի յուսոյն նոցա:

3․ Յայր եգիպտացի` եւ ոչ յԱստուած. ի մարմինս երիվարաց` եւ ոչ գոյր աւգնականութիւն, այլ Տէր արկցէ ի վերայ նոցա զձեռն իւր, եւ տաժանեսցին աւգնականքն, եւ կործանեսցին աւգնեալքն ի նոցանէն. եւ առհասարակ ամենեքեան սատակեսցին:

4․ Զի այսպէս ասաց ցիս Տէր. թէ զոր աւրինակ գոչեսցէ առեւծ` եւ կորիւն առիւծու յորս յոր հասանիցէ, կաւշեսցէ ի վերայ` եւ լցցէ զլերինս բարբառով իւրով. եւ ի պարտութիւն մատնեսցին, եւ ի սաստկութենէ սրտմտութեան նորա հալեսցին: Այնպէս իջցէ Տէր զաւրութեանց ի լեառն Սիովն, եւ ի վերայ լերանց դորա.

5․ իբրեւ զթռչունս թռուցեալս, այնպէս հովանի լիցի Տէր զաւրութեանց ի վերայ Երուսաղէմի: ի թիկունս իջցէ. աւգնեսցէ եւ փրկեսցէ եւ կեցուսցէ:

6․ Դարձարուք ոյք խորհիք խորհուրդս խորինս եւ զանաւրէնս` որդիք Իսրայէլի:

7․ զի յաւուր յայնմիկ բարձցեն մարդիկ զձեռագործս իւրեանց զարծաթեղէնս եւ զոսկեղէնս` զոր արարին ձեռք նոցա մեղս:

8․ Եւ անկցի Ասորեստանեայն, ոչ սրով առն, եւ ոչ սուր մարդոյ կերիցէ զնա. եւ ի փախուստ դարձցի` ոչ յերեսաց սուսերի. եւ երիտասարդք նորա ի պարտութիւն մատնեսցին:

9․ Եւ եղիցին վիմարգելք իբրեւ զորմարգելս. եւ ի պարտութիւն մատնեսցին. եւ որ փախիցեն, ըմբռնեսցի:  Այսպէս ասէ Տէր. երանի որ ունիցի զաւակ ի Սիովն, եւ ընտանեակք իցեն նորա յԵրուսաղէմ: