1․ Զի ահաւասիկ թագաւոր արդար թագաւորեսցէ, եւ իշխանք իրաւամբք տիրեսցեն:
2․ Եւ եղիցի մարդն որ թաքուցանիցէ զբանս իւր, թաքիցէ իբրեւ ի ջուրցն սաստկութենէ: Եւ եղիցի Սիոն իբրեւ զգետ յորդեալ փառաւոր ի ծարաւուտ երկրի:
3․ Եւ ոչ եւս եղիցին յուսացեալ ի մարդիկ. այլ տացեն զականջս առ ի լսել,
4․ եւ սիրտք տկարաց անսայցեն ի լսել. եւ լեզուք թոթովք` արագ արագ ուսցին խաւսել զխաղաղութիւն:
5․ Եւ ոչ եւս ասասցեն ցյիմարն լինել նոցա իշխան: եւ ոչ եւս ասասցեն պաշտաւնեայք քո` թէ լուռ լեր:
6․ Քանզի յիմարն յիմարութիւն խաւսեսցի, եւ սիրտ նորա զնանրութիւն խորհեսցի. կատարել զանաւրէնութիւն եւ խաւսել առ Աստուած զհայհոյութիւն. ցրուել զանձինս քաղցեալս, եւ զանձինս ծարաւեալս` ունայնս արձակել:
7․ Զի խորհուրդք չարաց` անաւրէնս խորհին. ապականել զխոնարհս բանիւք անիրաւութեամբ եւ ցրուել զբանս տնանկաց ի դատաստանի:
8․ իսկ ուղիղք իմաստունս խորհեցան, եւ խորհուրդն այն կայ` մնայ:
9․ Կանայք մեծատունք, արիք եւ լուարուք բարբառոյ իմոյ. եւ դստերք կասկածանաւք լուարուք զբանս իմ:
10․ Յուշ լիցին ձեզ աւուրքն տարեկանաց ցաւովք եւ կասկածանաւք. նուազեցան կութք. դադարեցին սերմանք, եւ այլ ոչ եւս եկեսցեն:
11․ Զարհուրեցարուք բարեկեցիկք. տրտմեցարուք յանձնապաստանքդ. մերկացարուք` կողոպտեցարուք` քրձազգածք եղերուք:
12․ կոծեցարուք ի վերայ արդեանց. վասն անդոցն ցանկալեաց, եւ վասն այգեացն բերոց:
13․ Յերկիր ժողովրդեան իմոյ փուշ եւ խոտ բուսցի. եւ յամենայն ապարանից ուրախութիւն բարձցի:
14. Քաղաքիդ մեծացելոյ ապարանք լքեալք. զմեծութիւն քաղաքիդ լքցեն եւ զտունս ցանկալիս. եւ եղիցին աւանք քո այրք յաւիտենից: ուրախութիւն ցռուց եւ ճարակք հաւտից:
15․ Մինչչեւ եկեսցէ ի վերայ ձեր հոգի ի բարձանց: եւ եղիցի յանապատ քերմէլ, եւ քերմէլ յանտառ համարեսցի:
16․ եւ հանգիցեն իրաւունք յանապատի, եւ արդարութիւն ի քերմէլ բնակեսցէ:
17․ Եւ եղիցին գործք արդարութեան խաղաղութեամբ. եւ կալցի արդարութիւն զհանգիստ. եւ յուսացեալքն եղիցին մինչչեւ յաւիտեան:
18․ Եւ բնակեսցէ ժողովուրդ իմ ի քաղաքին խաղաղութեան, եւ բնակեսցէ յուսով, եւ հանգիցեն մեծութեամբ:
19․ այլ կարկուտ եթէ իջանիցէ, ոչ ի ձեր վերայ եկեսցէ: Եւ եղիցի որ բնակեալ իցեն յանտառին, յանհոգս իբրեւ զայնոսիկ ոյք իցենն ի դաշտի:
20․ Երանի որ սերմանիցեն ընդ ամենայն ջրով ուր եզն եւ էշ կոխիցեն:
Հաղորդում կայքում սխալի վերաբերյալ
Տվյալ հատվածում առկա է սխալ: