Գլուխ 7

   
1․ Եւ եղեւ յաւուրս Աքազու Յովաթամայ որդւոյ Ոզիայ` թագաւորին Հրէաստանի. ել Հռասիմ արքայ Արամայ, եւ Փակէէ որդի Հռովմելայ արքայի Իսրայէլի ի վերայ Երուսաղէմի, տալ ընդ նմա պատերազմ. եւ ոչ կարացին պաշարել զնա:

2․ Ազդ եղեւ ի տուն Դաւթի` եւ ասէ, միաբանեաց Արամ ընդ Եփրեմայ. եւ զարհուրեցաւ անձն նորա, եւ անձն ժողովրդեան նորա, զորաւրինակ շարժեսցի յանտառի ծառ մի ի հողմոյ:

3․ Եւ ասէ Տէր ցԵսայի. ել ընդ առաջ Աքազու` դու եւ մնացեալ որդին քո Յասուբ, հանդէպ աւազանին վերին ճանապարհի ագարակին թափչի:

4․ եւ ասասցես ցնա. զգոյշ լեր` հանդարտեա, եւ մի երկնչիր. եւ մի զարհուրեսցի անձն քո յերկուց փայտից խանձողացն ծխելոց. զի յորժամ հասանիցէ բարկութիւն սրտմտութեան իմոյ, դարձեալ բժշկեցից: եւ որդին Արամայ` եւ որդին Ռովմելայ:

5․ զի խորհեցան խորհուրդ չար ¡ Եփրեմ եւ որդին Ռովմելայ զքէն` եւ ասեն:

6․ Ելցուք ի Հրէաստան` խաւսեսցուք ընդ նոսա, դարձուսցուք զնոսա առ մեզ. եւ կացուսցուք նոցա թագաւոր զորդին Տաբելայ:

7․ Այսպէս ասէ Տէր զաւրութեանց. մի կացցէ խորհուրդն այն, եւ մի եղիցի:

8․ այլ գլուխ Արամայ Դամասկոս, եւ գլուխ Դամասկոսի Հռասիմ. եւ այլեւս վաթսուն եւ հինգ ամ, եւ պակասեսցէ թագաւորութիւնն Եփրեմի ի ժողովրդենէ անտի:

9․ Եւ գլուխ Եփրեմայ Սոմորովն, եւ գլուխ Սոմորովնի որդին Ռովմելայ: եւ եթէ ոչ հաւատայցէք, եւ ոչ ի միտ առնուցուք:

10․ Եւ յաւել Տէր խաւսել ընդ Աքազու` եւ ասէ.

11․ խնդրեա դու քեզ նշան ի Տեառնէ Աստուծոյ քումմէ ի խորութեան կամ ի բարձրութեան:

12․ Եւ ասէ Աքազ. ոչ խնդրեցից` եւ ոչ փորձեցից զՏէր:

13. Եւ ասէ` արդ լուարուք տուն Դաւթի. թեթե՞ւ ինչ թուիցի ձեզ աշխատութիւն հասուցանել մարդկան. եւ զիա՞րդ հասուցանէք աշխատութիւն Տեառն:

14․ Վասն այդորիկ տացէ ձեզ Տէր ինքնին նշան: Ահա կոյսն յղասցի` եւ ծնցի որդի, եւ կոչեսցեն զանուն նորա Եմմանուէլ:

15․ եւղ եւ մեղր կերիցէ. մինչչեւ   ինչ իցէ ծանուցեալ նորա. կամ ախորժեալ յառաջագոյն զչարութիւն, ընտրեսցէ զբարին:

16․ Վասն այնորիկ մինչչեւ ծանուցեալ իցէ մանկանն զբարի կամ զչար, անարգեսցէ զչարն` եւ ընտրեսցէ զբարին: եւ մնասցէ երկիրդ` յորմէ դուդ կասկածես յերեսաց երկուց թագաւորացն:

17․ Այլ ածցէ Աստուած ի վերայ քո, եւ ի վերայ ժողովրդեան քոյ, եւ ի վերայ տան հաւր քոյ աւուրս` որ չեւ եւս են եկեալ, յորմէ աւրէ եհան Եփրեմ ի Հրէաստանէ զարքայն Ասորեստանեայց:

18․ Եւ եղիցի յաւուր յայնմիկ շարժեսցէ Տէր զճանճիւռնն որ տիրեսցէ յայնկոյս գետոյն եգիպտացւոց, եւ զձիաստացն որ է յերկրին Ասորեստանեայց:

19․ Եւ եկեսցեն ամենեքեան, եւ հանգիցեն ի ձորս երկրիդ, եւ ի ծերպս վիմաց, եւ յայրս, եւ յամենայն փապարս, եւ յամենայն փայտս:

20․ Յաւուր յայնմիկ գերծցէ Տէր սրովն մեծաւ եւ արբեցելով, յայնկոյս գետոյն թագաւորին Ասորեստանեայց, զգլուխ եւ զմազ ոտից, եւ զմաւրուսն սրբեսցէ:

21․ Եւ եղիցի յաւուր յայնմիկ բուծցէ մարդ երինջ մի յարջառոց, եւ մաքիս երկուս.

22․ եւ եղիցի ի բազմութենէ կաթինն` կերիցէ եւղ. զի եւղ եւ մեղր կերիցէ ամենայն որ մնացեալ իցէ յերկրին:

23․ Եւ եղիցի յաւուր յայնմիկ ամենայն տեղի` ուր իցէ հազար որթ` հազար կշռոյ սկեղ. խոպանասցի եւ ի փուշ դարձցի:

24․ նետողք եւ աղեղնաւորք մտանիցեն անդր: Զի խոպանացեալ եւ փշաբեր եղիցի ամենայն երկիր,

25․ եւ ամենայն լեառնն արաւրադիր ակաւսաբեկ լիցի. եւ մի հասցէ անդր երկեւղ. զի եղիցի ի խոպանէն եւ ի փշոյ` յարաւտ գառին եւ ի կոխան եզին: