Գլուխ 1

   
1. Այր ոմն էր Յաւսիդ աշխարհի որոմ անուն էր Յոբ: եւ էր այրն այն ճշմարիտ անարատ, արդար աստուածապաշտ, մեկնեալ յամենայն իրաց չարութենէ մեղաց:

2. Եղեն նորա ուստերք եւթն` եւ դստերք երեք:

3. եւ էին խաշինք նորայ` եւթն հազար. ուղտք երեք հազարք. լուծք եզանց հինգ հարեւր: եւ էշք մատակք արաւտականք հինգ հարեւր: եւ սպասք բազում յոյժ. եւ գործք մեծամեծք էին նորա ի վերա երկրի: Եւ էր այրն այն ազնուական քան զամենայն արեւելեայսն:

4. միաբանեալ գային որդիք նորա առ միմեանս, առնէին խրախութիւն զաւրհանապազ. առեալ ընդ իւրեանս եւ զերեսին քորսն իւրեանց ուտել եւ ըմպել ընդ նոսա:

5. Եւ իբրեւ յանգ ելանէին աւուրք խրախութեանն, առաքէր Յոբ` եւ սրբէր զնոսայ. յարուցեալ ընդ առաւաւտս մատուցանէր վասն նոցա զոհս ըստ թուոյ նոցա, եւ զուարակ մի վասն մեղաց ընդ ոգւոց նոցայ: քանզի ասէր Յոբ` թէ գուցէ որդիքն իմ ի միտս իւրեանց իմացան չարութիւն զԱստուծոյ: այսպէս առնէր Յոբ զամենայն աւուրս նոցայ:

6. Եւ եղեւ իբրեւ աւրս այս` եւ ահա եկին հրեշտակք Աստուծոյ կալ առաջի Տեառն: եկն եւ սատանայ ընդ նոսա յածեալ ընդ երկիր եւ շրջեալ ի նմա:

7. Եւ ասէ Տէր ցսատանայ` դու ուստի՞ գաս: պատասխանի ետ սատանայ Տեառն, եւ ասէ. շրջեալ ընդ երկիր եւ յածեալ ի ներքոյ երկնից` եկեալ կամ:

8. Եւ ասէ ցնա Տէր. Նայեցա՞ր մտաւք քովք ընդ ծառայ իմ ընդ Յոբ. զի ոչ գոյ իբրեւ զնա ի վերայ երկրի, այր անարատ` ճշմարիտ` աստուածապաշտ` մեկնեալ յամենայն իրաց չարաց:

9. Ետ պատասխանի սատանայ, եւ ասէ ընդդէմ Տեառն. մի թէ ձրի՞ պաշտիցէ Յոբ զՏէր:

10. ո՞չ դու ամրացուցէր զարտաքին նորա` եւ զներքին տան նորա, եւ որ ինչ միանգամ արտաքոյ շուրջ զնովաւ է: զգործս ձեռաց նորա աւրհնեցէր, եւ զանասուն նորա բազմացուցեր ի վերայ երկրի:

11. Բայց ոչ աղէ առաքեա դու զձեռն քո, եւ արկ յամենայն ինչս նորա. եթէ  ո՞չ յերեսս իսկ աւրհնեսցէ զքեզ:

12. Յայնժամ ասէ Տէր ցսատանայ. Ահա զամենայն ինչս նորա տամ ի ձեռս քո, բայց ի նա մի մերձենայցես: Եւ ել սատանայ յերեսաց Տեառն:

13. եւ էր իբրեւ զաւրս զայս. ուստերքն Յոբա եւ դստերք նորա` ուտէին եւ ըմպէին գինի ի տան երիցու եղբաւրն իւրեանց:

14. Եւ ահա հրեշտակ եկն առ Յոբ` եւ ասէ ցնա. հարկիք եզանցն վարէին, եւ էշքն մատակք արածէին առ նոքաւք:

15. եւ եկին գերէվարք եւ գերեցին զնոսա, եւ զմանկտին կոտորեցին սրով. ես միայն ապրեալ` եկի պատմել քեզ:

16. Եւ մինչդեռ նա խաւսէր, այլ հրեշտակ եկն առ Յոբ` եւ ասէ ցՅոբ. հուր անկաւ յերկնից` եւ այրեաց զհաւտսն, եւ զհովիւսն ըստ նմին աւրինակի եկեր. ես միայն մնացեալ` եկի պատմել քեզ:

17. Եւ մինչդեռ նա խաւսէր, այլ հրեշտակ եկն` եւ ասէ ցՅոբ. Ասպատակաւորք ասպատակեցին ի մեզ երեք առաջք եւ պատեցան զուղտուքն` եւ գերեցին զնոսա, եւ զմանկտին կոտորեցին սրով. ես միայն ապրեալ` եկի պատմել քեզ:

18. Եւ մինչդեռ նա խաւսէր` այլ հրեշտակ գայր եւ ասէր ցՅոբ. մինչդեռ ուստերքն քո, եւ դստերք ուտէին եւ ըմպէին առ երիցու եղբաւրն իւրեանց`

19. յանկարծակի հողմն մեծ եկն յանապատէ` եւ եհար զչորեսին անկիւնս տանն, եւ անկաւ տունն ի վերայ որդւոցն քոց` եւ վախճանեցան. ես միայն ապրեալ` եկի պատմել քեզ:

20. Ապա յարուցեալ Յոբ` պատառեաց զհանդերձս իւր, եւ կտրեաց զվարսս գլխոյ իւրոյ. եւ անկեալ ի գետին երկիր եպագ Տեառն,

21. եւ ասէ. մերկ իսկ եկի ես յորովայնէ մաւր իմոյ, եւ մերկանդամ դարձայց անդրէն:

22. Տէր ետ` եւ Տէր առ. որպէս Տեառն հաճոյ թուեցաւ` նոյնպէս եւ եղեւ. եղիցի անուն Տեառն աւրհնեալ:

23. Եւ յայսմ ամենայնի անցս որ անցին ընդ նա` ոչ մեղաւ Յոբ առաջի Տեառն, եւ ոչ ետ անզգամութիւն Աստուծոյ: