Գլուխ 38

   
1. Յետ դադարելոյ Եղիուսայ ի խաւսելոյ, ասէ Տէր ցՅոբ ի մրրկէ եւ յամպոյ:

2. Ո՞վ է դա` որ թաքուցանէ յինէն զխորհուրդս, ժողովեալզբանս ի սրտի. եւ համարի յինէն թաքուցանել:

3. Պնդեա իբրեւ այր զմէջ քո, հարցից զքեզ` եւ տուր ինձ պատասխանի:

4. Ո՞ւր էիր մինչ ես հիմունս արկանէի երկրի: պատմեա ինձ եթէ խելամուտ ես հանճարոյ:

5. Ո՞վ եդ զչափ դորա թէ գիտիցես. կամ ո՞վ արկ ի վերայ դորա լար:

6. Յէ՞ր վերայ հաստատեցան աղխք դորա: ո՞վ է որ արկ զվէմն անկեան ի դմա:

7. Յորժամ եղեն աստեղք ծերք, ամենայն հրեշտակք աստեղաց աւրհնեցին զիս մեծաձայն. ¡եւ ամենայն հրեշտակք իմ գովեցին:

8. Փակեցի զծով դրամբք, յորժամ ծնաւ յորովայնէ մաւր իւրոյ ելանել:

9. Եդի նմա զմէգ ի հանդերձ, եւ զմառախուղ նմա ի խանձարուրս:

10. Եդի նմա սահմանս` եդեալ փականս եւ դրունս:

11. Ասացի` ցայդ վայր եկեսցես` եւ այլ մի անցանիցես, այլ այդրէն ի քեզ խորտակեսցին ալիք քո:

12. Եթէ առ քե՞ւ կարգեցի զլոյսն առաւաւտին: Արուսեակն ետես զկարգ իւր

13. հասանել ի վերայ թեւոց երկրի: թաւթափել զամպարիշտս ի նմանէ:

14. Կամ թէ քո՞ առեալ զհողն կաւ` ստեղծեր կենդանի` եւ խաւսուն եդիր զնա յերկրի:

15. Եւ մերժեցե՞ր զլոյսն յամպարշտաց, զբազուկս ամբարտաւանից խորտակեցե՞ր:

16. Հասեա՞լ իցես յակն ծովու, եւ ընդ հետս անդնդոց շրջեցա՞ր:

17. Բանայցե՞ն քեզ ահիւ դրունք մահու: բարապանաց դժոխոց ի տեսանել զքեզ սարսիցե՞ն:

18. Խելամո՞ւտ իցես լայնութեան առ ի ներքոյ երկնիցս: աղէ` պատմեա ինձ ո՞րչափ իցէ:

19. Զի՞նչ երկիր իցէ յորում լոյսն ագանիցի, կամ զի՞նչ տեղի խաւարի:

20. Տանիցի՞ս զիս ի սահմանս նոցա. եթէ խելամո՞ւտ իցես շաւղաց նոցա:

21. Թերեւս գիտիցե՞ս` եւ ընդ այն ժամանակս իսկ ծնեալ իցես. եւ թիւ աւուրց քոց բազում իցէ:

22. Երթեա՞լ իցես ի շտեմարանս ձեան: եւ զգանձս կարկտի տեսեա՞լ իցես:

23. Համբարեա՞լ կայցէ քեզ ի ժամանակս թշնամեաց, յաւր մարտի եւ պատերազմի:

24. Ուստի՞ ելանիցէ եղեամն. կամ սփռեսցի հարաւ ի ներքոյ երկնից:

25. Ո՞ պատրաստեաց զհոսանս սաստիկս անձրեւաց, եւ զճանապարհս ամպրոպաց տեղեալ յերկիր:

26. ուր ոչ գոյ մարդ յանապատ յանմարդի,

27. յագեցուցանել զանկոխն եւ զանշէն, եւ բղխեցուցանել զբոյս դալարւոյ:

28. Ո՞ է հայր անձրեւի, եւ ո՞վ է որ ծնաւ զշաղս ցաւղոյ:

29. Յո՞յր արգանդէ ելանէ սառն, եւ զեղեամն ո՞ ծնաւ յերկինս`

30. որ իջանէ իբրեւ զջուր ծորեալ: եւ զերեսս երկնից ո՞ հալեաց:

31. Խելամո՞ւտ իցես կարգի բազմաստեղաց. եւ քո բացեա՞լ իցէ զպատրուակ հայկին:

32. Կամ բանայցես զմազարովթն ի ժամանակի իւրում: եւ զգիշերավարն ի վերայ վարսից իւրոց ածիցե՞ս ընդ նոսայ:

33. Գիտիցե՞ս զշրջանակս երկնից, կամ առհասարակ զլեալսն ի ներքոյ երկնից:

34. Կոչիցե՞ս զմէգ բարբառով. եւ դողութեամբ լի սաստիկ ջրով լուիցէ քեզ:

35. Արձակիցե՞ս շանթս` եւ գնայցեն. եւ ասիցեն ցքեզ թէ զի՞նչ է:

36. Ո՞վ ետ կանանց իմաստութիւն ոստայնանկութեան` կամ հանճար նկարակերտութեան:

37. Ո՞ թուէ զամպս իմաստութեամբ, եւ զերկինս յերկիր խոնարհեցոյց:

38 եւ հեղեալ կայ իբրեւ զհող փոշի. մածուցի զնա իբրեւ զվիմաւ խորանարդ:

39 Որսայցե՞ս առիւծուց կերակուր. եւ զանձինս վիշապաց յագեցուցանիցե՞ս:

40 Սարսեցին ի խշտիս իւրեանց. եւ նստիցին դարանակալք ի մայրիս:

41 Ո՞ պատրաստեաց ագռաւուց կերակուր` զի ձագք նորա առ Տէր աղաղակեցին. մոլորեալք խնդրեն կերակուր: