1. Կրկնեալ անդրէն Յոբայ ասէ ցՏէր:
2.Գիտեմ զի կարաւղ ես յամենայնի, եւ տկարանայ ինչ ոչ քեզ:
3. Ո՞վ է որ ծածկէ ի քէն զխորհուրդ` խնայեալ ի բանս կարծիցէ թագուցանել. ո պատմեսցէ ինձ զոր ոչ գիտէի. զմեծամեծս եւ զզարմանալիս` որոց ոչ էի խելամուտ:
4. Արդ լուր ինձ Տէր` զի եւ ես խաւսեցայց. հարցից զքեզ` եւ դու ուսո զիս:
5. Ի լուր ակնջաց լսէի զքէն յառաջագոյն. բայց արդ` եւ ակն իմ իսկ ետես զքեզ:
6. Վասն որոյ խոտեցի զանձն` եւ հալեցայ. եւ համարիմ զանձն իմ հող եւ մոխիր:
7. Եւ եղեւ յետ խաւսելոյ Տեառն զբանս զայսոսիկ ընդ Յոբայ, ասէ ցԵղիփազ Թեմնացի: Մեղար դու, եւ երկոքին բարեկամք քո. զի ոչ խաւսեցարուք առաջի իմ ճշմարիտ, եւ ոչ ինչ իբրեւ զծառայ իմ զՅոբ:
8. Բայց արդ առէք զուարակս եւթն եւ խոյս եւթն, եւ երթայք առ ծառայ իմ Յոբ. եւ արասցէ ողջակէզս վասն ձեր. եւ Յոբ ծառայ իմ արասցէ աղաւթս վասն ձեր: Զի թէ ոչ նմա ակն առեալ էր, եւ եթէ ոչ վասն նորա էր, կորուսեալ էր իմ արդեւք զձեզ. զի ոչ խաւսեցարուք ճշմարտութիւն զծառայէ իմմէ զՅոբայ:
9. Եւ գնաց Եղիփազ Թեմնացի, եւ Բաղդատ Սաւքեցի, եւ Սովփար Մինեցի. եւ արարին որպէս հրամայեաց նոցա Տէր. եւ ելոյծ զմեղս նոցա վասն Յոբայ:
10. Եւ Տէր աճեցոյց զՅոբ. եւ յառնել նորա աղաւթս ի վերայ բարեկամացն` եթող զմեղս նոցա: Եւ ետ Տէր կրկին քան որչափ ինչ էրն յառաջագոյն Յոբայ ի յաճախութիւն:
11. Եւ լուան ամենայն եղբարք նորա եւ քորք նորա զամենայն անցսն` որ անցին ընդ նա, եւ եկին առ նա, եւ ամենեքին ոյք յառաջագոյն գիտէին զնա. կերան եւ արբին առ նմա. եւ մխիթարեցին զնա, եւ զարմացան ի վերայ ամենայնի զոր ած ի վերայ նորա Տէր: եւ ետուն նմա իւրաքանչիւր մէն մի որոջ, եւ չորեքդրամեան մի ոսկի անգիր: Եւ Տէր աւրհնեաց զվերջինն Յոբայ քան առաջինն:
12. Եւ Տէր աւրհնեաց զվերջինն Յոբայ քան զառաջինն: եւ էին խաշինք նորա` ոչխարք բեւր, եւ չորեքհարեւր. ուղտք վեց հազարք. լուծք եզանց հազար. էշք մատակք արաւտականք հազար:
13. Եւ ծնան նմա ուստերք եւթն, եւ դստերք երեք:
14. Եւ կոչեաց զառաջինն Տիւ. եւ զերկրորդն Կասիա. եւ զերրորդն Ամաթեղջեւր:
15. Եւ ոչ գտան համեմատ դստերացն Յոբայ ազնուագոյնք ի ներքոյ երկնից: եւ ետ նոցա ժառանգութիւն ընդ եղբարս իւրեանց:
16. Եւ եկաց յետ հարուածոցն ամս հարեւր եւ եւթանասուն: ¡եւ ամենայն ամք զոր եկաց` երկերիւր քառասուն եւ ութ: եւ ետես Յոբ զորդիս իւր` եւ զորդիս որդւոց իւրոց ազգ չորրորդ: Եւ վախճանեցաւ Յոբ ծերացեալ եւ լցեալ աւուրբք: Եւ գրեալ է նմա յառնել ընդ որս Տէր յարուցանէ:
17. Սա թարգմանի յասորի գրոց: բնակէր յերկրին Աւստայ. ի սահմանս եդովմայեցւոց եւ արաբացւոց: յառաջ` էր անուն նորա Յոբաբ. եւ առեալ կին արաբացի, ծնաւ որդի որում անուն էր Էննով: Եւ էր հայր նորա Զարեհ, որդի որդւոյն Եսաւայ. եւ մայր նորա բոսորացի: որպէս զի լինել նմա հինգերորդ յԱբրահամէ: Եւ այս են թագաւորք որ թագաւորեցին յԵդոմ: առաջին Բաղակ Բէովրայ. եւ անուն քաղաքի նորա Դէնաբայ: յետ Բաղակայ Յոբաբ` որ կոչեցաւ Յոբ: յետ նորա Ասովմ, որ էր զաւրավար յերկրին Թեմնացւոց: յետ նորա Ադադ որդի Բարադայ, որ կոտորեաց զՄադիամ ի դաշտին Մովաբայ. եւ անուն քաղաքի նորա Գէթեմ: Եւ որ եկին առ նա բարեկամքն. Եղիփազ` յորդւոցն Եսաւայ` արքա Թեմնացւոց. Բաղդատ բռնաւոր Սաւքեցւոց. Սովփար արքայ Մինեցւոց:
Հաղորդում կայքում սխալի վերաբերյալ
Տվյալ հատվածում առկա է սխալ: