Գլուխ 6

   
1․ Կրկնեալ անդրէն Յոբայ ասէ:

2․ Եթէ կշռելով ոք կշռէր զբարկութիւնս իմ. եւ զցաւս իմ միանգամայն բառնայր ի լուծ կշռոց,

3․ քան զաւազ ծովու ծանրագոյն լինէր: նա` ուրեմն բանք իմ անզգամք են:

4․ Զի նետք Տեառն ի մարմնի իմում, եւ սրտմտութիւն նորա ծծէ զարիւն իմ: յորժամ սկսանիմ խաւսել կտտեն զիս:

5․ Իսկ արդ` զիա՞րդ, միթէ տարապարտո՞ւց խանչիցէ ցիռ, բայց եթէ կերակուր խնդրիցէ: Կամ թէ գոչիցէ՞ եզն առ մսուր` յորժամ ունիցի զկերակուր:

6․ Կամ ուտիցի՞ հաց առանց աղի. կամ գուցէ՞ համ ի բանս ունայնս:

7․ Սա` ոչ կարէ հանդարտել անձն իմ. զի շարաւով տեսանեմ զկերակուր իմ` իբրեւ զհոտ առիւծու:

8․ Զի եթէ տացէ` եւ եկեսցեն յիս խնդրուածք իմ, եւ զյոյս իմ տացէ Տէր:

9․ Սկսաւ Տէր խոցոտել զիս. բայց ի սպառ մի սպանցէ զիս:

10․ Եղիցի ինձ քաղաքն իմ գերեզման` յորոյ ի վերայ պարսպացն ճեմէի, եւ ի նա ոչ խնայեցից. զի ոչ սուտ արարից զբանս սրբոյն Աստուծոյ իմոյ:

11․ Զի զի՞նչ է զաւրութիւն իմ եթէ համբերեցից. կամ զի՞նչ ժամանակ` զի հանդարտեսցէ անձն իմ:

12․ Միթէ զաւրութիւն վիմա՞ց իցէ զաւրութիւն իմ, կամ մարմինք իմ պղնձի՞ք. կամ թէ ո՞չ ի նա ապաւինէի: Արդ աւգնութիւն իմ մերժեցաւ յինէն,

13․ եւ ողորմութիւն հրաժարեաց յինէն այցելութիւն Տեառն անտես արար զիս:

14․ Ոչ հայեցան յիս մերձաւորք իմ.

15․ իբր զվտակ պակասեալ, եւ իբրեւ զալիս անցին զինեւ:

16․ Որք սարսէին յինէն, արդ ահաւասիկ հասին ի վերայ իմ:

17․ Իբրեւ զձիւն կամ իբրեւ զսառն պաղեալ որ հալիցի ի հասանելոյ ջերմութեան, եւ ոչ ճանաչիցի թէ ո՞րպէս էր.

18․ նոյնպէս եւ ես լքայ յամենեցունց, կորեայ եւ տնանկացայ:

19․ Տեսէք զճանապարհս թեմնացւոց որք ի շաւիղս սաբայ հայիք:

20․ եւ ամաւթ կրեսցեն յուսացեալքն ի քաղաքս եւ յինչս:

21․ Դա` եւ դուք աւադիկ անողորմ հասէք ի վերայ իմ: հայեցեալ ի վէրս իմ` երկերուք:

22․ Արդ ես զձեզ ինչ խնդրեցի՞:

23․ կամ ձերո՞վ զաւրութեամբդ կարաւտեալ իցեմ ապրեցուցանել զիս ի թշնամեաց. կամ ի ձեռաց հզաւրաց փրկել զիս:

24․ Ուսուցէք զիս` եւ ես լռեցից. եւ եթէ մոլորեա՞լ ինչ իցեմ, արարէք զիս խելամուտ:

25․ Այլ ուրեմն խոտան են բանք ճշմարտի. քանզի ոչ եթէ ի ձէնջ խնդրեմ զաւրութիւն:

26․ Եւ ոչ կշտամբանք բանից ձերոց լռեցուցանեն զիս. եւ ոչ բարբառոյ բանից ձերոց անսացից:

27․ Բայց զի իբրեւ ի վերայ որբոյ յարուցեալ էք ի վերայ իմ. եւ խաղացեալ էք ի վերայ բարեկամի ձերոյ:

28․ Բայց արդ հայեցեալ յերեսս ձեր ոչ ստեցից: նստարուք, եւ մի ինչ լիցի անիրաւութիւն ի դատաստանի:

29․ եւ դարձեալ իրաւանց ուշ ունիցիք:

30․ Զի ոչ գոյ ի լեզուի իմում անիրաւութիւն. կամ կոկորդ իմ ոչ խոկասցէ յիմաստութիւն: