1. Արդ ծիծաղին զինեւ յետինք: Արդ խրատեն զիս ի միասին, զորոց պախարակէի զհարս նոցա. զոր ոչ համարէի լինել հաւասար շանց արաւտականաց իմոց:
2. Նաեւ զաւրութիւն ձեռաց նոցա ընդէ՞ր է ինձ: Ի վերայ նոցա կորեաւ վախճան.
3. ի կարաւտութեան եւ ի սովի անծնունդ: Որ փախչէին երէկ յանջրդւոյ, յանձկութենէ եւ ի թշուառութենէ:
4. Որք պատէին խարշափուն բանջարով. ¡որոց բանջարն իսկ էր կերակուր: Անարգք եւ արհամարհեալք կարաւտեալք յամենայն բարութենէ,
5. որք եւ զարմատս փայտից ծամէին ի սաստիկ սովոյ: Յարեան ի վերայ իմ գողք.
6. որոց տունք իւրեանց էին ծակք վիմաց, ի մէջ արծագանգաց գոչեսցեն.
7. որք ընդ խռուովք վայրենեաւք բնակեալ էին:
8. Որդիք անզգամաց եւ անուանարկաց, եւ շիջելափառք յերկրէ:
9. Արդ քնար եմ ես նոցա, եւ զիս ունին բամբասանս:
10. Գարշեցան յինէն մեկնեալք ի հեռաստանէ. եւ յերեսաց իմոց թուք ոչ խնայէին:
11. Զի բացեալ զկապարճս իւր խոցոտեաց զիս, եւ սանձս երեսաց իմ առաքեաց:
12. Յարեան ի վերայ աջոյ շառաւեղի: զոտս իւր ձգեաց` եւ ճանապարհ արար ի վերայ իմ:
13. Ընդ շաւիղս կորստեան նոցա շփեցան շաւիղք իմ: Մերկացոյց զպատմուճան իմ. նետիւք իւրովք խոցոտեաց զիս:
14. մատուցեալ որպէս եւ կամի: Ցաւաւք վարակեալ եմ.
15. դարձեալ են յիս ցաւք: Գնաց յինէն յոյս իբրեւ զհողմ, եւ իբրեւ զմէգ փրկութիւն իմ:
16. եւ արդ զինեւ զեղծցի անձն իմ: Ունին զիս աւուրք ցաւոց.
17. գիշերի ոսկերք իմ խարշեցան, եւ ջիլք իմ լուծեալ են:
18. Բազում զաւրութեամբ ձեռն արկ զպատմուճանաւ իմով, եւ իբրեւ զժապաւէն պատմուճանի իմոյ շուրջ կալաւ զիս: 19 Համարի զիս հանգոյն կաւոյ. ի հող եւ ի մոխիր է բաժին իմ:
20. Աղաղակեցի առ քեզ` եւ ոչ լուիցես ինձ. կացին եւ հայեցան յիս:
21. Պատահեցար ինձ անողորմ, հզաւր ձեռամբ հարեր զիս:
22. Կարգեցեր զիս ի ցաւս, եւ ընկեցեր զիս ի փրկութենէ:
23. Գիտեմ զի մահ սատակեսցէ զիս. զի բնակութիւն ամենայն մահկանացուի երկիր է:
24. Երանի թէ կարէի զանձն իմ վարժել, կամ աղաչել զայլ` եւ առնէր ինձ զայն:
25. Եւ ես ի վերայ ամենայն տկարի լայի, եւ հեծեծէի յորժամ տեսանէի զայր ի վիշտս,
26. եւ ունէի ի բարութեան: եւ ահաւասիկ պատահեցին ինձ առաւել աւուրք չարեաց:
27. Որովայն իմ եռայ, եւ ոչ դադարեսցէ. ժամանեցին ինձ աւուրք աղքատութեան:
28. Նեղեալ շրջեցայց առանց բերանակապի: կացի ի մէջ եկեղեցւոյ աղաղակ բարձեալ:
29. Եղբայր եղէ համբարուաց, եւ ընկեր ջայլեմանց:
30. Մորթ իմ սեւացաւ սաստկագոյն, եւ ոսկերք իմ ի տաւթոյ:
31. Դարձաւ ի սուգ քնար, եւ սիրտ իմ եւ երգ իմ ի լալիւն:
Հաղորդում կայքում սխալի վերաբերյալ
Տվյալ հատվածում առկա է սխալ: