Գլուխ 1

   
1․ Տեսիլ Եսայայ որդւոյ Ամովսայ. զոր ետես ի վերայ Հրէաստանի, եւ ի վերայ Երուսաղէմի: Ի թագաւորութեանն Ոզիայ` եւ Յովաթամայ` եւ Աքազու` եւ Եզեկիայ, որք թագաւորեցին Հրէաստանի:

2․ Լուր երկին եւ ունկն դիր երկիր` զի Տէր խաւսեցաւ: Որդիս ծնայ եւ բարձրացուցի, եւ նոքա զիս անարգեցին:

3․ Ծանեաւ եզն զստացիչ իւր, եւ էշ զմսուր տեառն իւրոյ. եւ Իսրայէլ զիս ոչ ծանեաւ, եւ ժողովուրդ իմ զիս ի միտ ոչ առ:

4․ Վայ ազգին մեղաւորի. ժողովուրդ որ լի է մեղաւք, սերմն ժանտ, որդիք անաւրէնք. թողէք զՏէր եւ բարկացուցէք զսուրբն Իսրայէլի. աւտարացան եւ յետս կացին:

5․ զի՞ եւս յաւելուք վէրս յանաւրէնութիւնս: Ամենայն գլուխ ի ցաւս, եւ ամենայն սիրտ ի տրտմութիւն:

6․ յոտից մինչչեւ ցգլուխ` չիք ի նմա առողջութիւն. ոչ վէրք` ոչ այտումն, ոչ հարուածք խխայթեալք. չիք սպեղանի ի վերայ դնել, ոչ ձէթ` եւ ոչ պատանս:

7․ Երկիր ձեր` աւերակ. քաղաքք ձեր` հրձիգք. զաշխարհն ձեր առաջի ձեր աւտարք կերիցեն, աւերեալ եւ կործանեալ յազգաց աւտարաց:

8․ Լքեալ թողցի դուստր Սիովնի իբրեւ զտաղաւար յայգւոջ, եւ իբրեւ զհովանի մրգապահաց ի մէջ սեխենեաց. եւ իբրեւ զքաղաք պաշարեալ:

9․ Եւ եթէ ոչ Տեառն զաւրութեանց թողեալ էր մեզ զաւակ` իբրեւ զՍոդոմ լինէաք, եւ Գոմորայ նմանէաք:

10․ Լուարուք զբան Տեառն իշխանք սոդոմացւոց. ունկն դիք աւրինաց Աստուծոյ ժողովուրդք գոմորացւոց:

11․ Զի՞ կայ` իմ եւ յաճախելոյ զոհիցդ ձերոց` ասէ Տէր. յագեալ եմ ողջակիզաւք խոյոց ձերոց. եւ զճարպս գառանց, եւ զարիւն ցլուց եւ նոխազաց ոչ կամիմ:

12․ եւ ոչ թէ գայցէք յանդիման լինել ինձ: Ո՞վ իսկ խնդրեաց զայդ ի ձեռաց ձերոց: կոխել զգաւիթս իմ մի յաճախէք:

13․ Եթէ մատուցանիցէք ինձ նաշիհ` զուր է: եւ խունկք ձեր պիղծ են ինձ. զգլուխս ամսոց ձերոց` եւ զշաբաթս` եւ զաւրն մեծ` ոչ առնում յանձն:

14․ զպահս եւ զդատարկութիւնս, եւ զամսագլուխս ձեր, եւ զտաւնս ձեր ատեաց անձն իմ: Յագեալ եմ ձեւք, ոչ եւս ներեցից մեղաց ձերոց:

15․ յորժամ համբառնայցէք զձեռս ձեր` դարձուցից զերեսս իմ ի ձէնջ. եւ եթէ յաճախիցէք յաղաւթս` ոչ լուայց ձեզ. զի ձեռք ձեր լի են արեամբ:

16․ Լուացարուք, սրբեցարուք. ընկեցէք զչարիս ձեր յանձանց ձերոց առաջի աչաց իմոց: դադարեցէք ի չարեաց ձերոց:

17․ ուսարուք զբարիս գործել: խնդրեցէք զիրաւունս. փրկեցէք զզրկեալն. դատ արարէք որբոյն, եւ տուք իրաւունս այրւոյն:

18․ Եւ եկայք խաւսեցարուք ընդ միմեանս` ասէ Տէր. եւ եթէ իցեն մեղք ձեր իբրեւ զձանձախարիթ` իբրեւ զձիւն սպիտակ արարից. եւ եթէ իցեն իբրեւ զորդան կարմիր` իբրեւ զասր սուրբ արարից:

19․ Եւ եթէ ախորժեսջիք եւ լուիջիք ինձ` զբարութիւնս երկրի կերիջիք:

20․ ապա թէ ոչ կամիցիք լսել ինձ, սուր կերիցէ զձեզ. քանզի բերան Տեառն խաւսեցաւ զայս:

21․ Զի՞արդ եղեւ պոռնիկ քաղաքն հաւատարիմ Սիոն, լի հաւատովքն` յորում արդարութիւն հանգուցեալ էր, եւ արդ` սպանաւղք են:

22․ Արծաթ ձեր անփորձ. վաճառականք ձեր խառնեն ջուր ընդ գինի:

23․ իշխանք ձեր ապստամբք, գողակիցք են գողոց, սիրեն զկաշառս, վրիժագործք. որբոց իրաւունս ոչ առնեն, եւ դատաստանի այրեաց` ունկն ոչ դնեն:

24․ Վասն այդորիկ այսպէս ասէ Տէր Տէր զաւրութեանց հզաւրն Իսրայէլի. Վայ ձեզ հզաւրքդ Իսրայէլի, զի ոչ եւս դադարեսցէ բարկութիւն իմ ի հակառակորդաց իմոց. եւ դատաստանաւք դատեցայց զթշնամիս իմ:

25․ Եւ արկից զձեռն իմ ի վերայ քո. եւ ածից քեզ եռանդն ի սրբութիւն ապստամբացդ, եւ զապստամբսդ կորուսից. եւ բարձից  ի քէն զամենայն անաւրէնս. եւ զամենայն ամբարտաւանս խոնարհեցուցից:

26․ Եւ կացուցից ի վերայ քո դատաւորս իբրեւ զառաջինն, եւ զխորհրդականս քո որպէս ի սկզբանէն: եւ ապա կոչեսջիր դու քաղաք արդարութեան` մայր քաղաքաց հաւատարիմ Սիովն:

27․ Զի իրաւամբք եւ արդարութեամբ փրկեսցի գերութիւն նորա, եւ ողորմութեամբ:

28․ Եւ խորտակեսցին անաւրէնք եւ մեղաւորք ի միասին. եւ ոյք թողին զՏէր` վախճանեսցին ի միասին:

29․ Քանզի արդ` ամաչեսցեն ի կուռս իւրեանց ընդ որս ինքեանք հաճեալ էին. եւ զգեցցին զամաւթ ի դրաւշեալս իւրեանց զորս ինքեանքն արարին: եւ ամաչեսցեն ի պարտէզս իւրեանց որոց ցանկացան:

30․ Զի եղիցին իբրեւ զբեւեկնի տերեւաթափ, եւ իբրեւ զդրախտ որոյ ոչ գուցէ ջուր:

31․ Եւ եղիցի զաւրութիւն նոցա իբրեւ զծեծած վշոյ. եւ գործք նոցա իբրեւ զկայծակունս հրոյ. եւ այրեսցին անաւրէնք եւ մեղաւորք ի միասին. եւ ոչ ոք իցէ որ շիջուցանիցէ: