Գլուխ 13

   
1. Ահա զայս ամենայն ետես ակն իմ, եւ լուաւ ունկն իմ:

2. Եւ գիտեմ ես որչափ եւ դուք խելամուտ էք. եւ չեմ անմտագոյն քան զձեզ:

3. Բայց սակայն ես ընդ Տեառն խաւսեցայց. յանդիմանեցայց առաջի նորա, եթէ կամեսցի:

4. Բայց դուք ինձ բժիշկք մեղանչականք էք. եւ ողջացուցիչք չարեաց ամենեքեան:

5. Եղիցի ձեզ համրանալ` եւ համարեալ լիցի ձեզ յիմաստութիւն:

6. Լուարուք զյանդիմանութիւն բերանոյ իմոյ, եւ դատաստանի շրթանց իմոց անսացէք:

7. Ո՞չ ապաքէն առաջի Տեառն խաւսիցիք, եւ յանդիման նորա նենգութիւն բարբառիք:

8. Կամ թէ թանգուզիցէք. զի դուք ամենեքեան դատաւորք եղերուք:

9. Զի բարւոք է եթէ քննեսցէ զձեզ: Զի եթէ զամենայն արարեալ յաւելուցուք ի նա,

10. ոչ ինչ սակաւ կշտամբեսցէ զձեզ: Եւ եթէ ի ծածուկ աչառիցէք.

11. ոչ ապաքէն արհաւիրք նորա զարհուրեցուցանեն զձեզ. եւ ահ նորա անկցի ի վերայ ձեր:

12․ Եւ դիպեսցին պերճութիւնքդ ձեր հանգոյն մոխրոյ, եւ մարմին կաւեղէն:

13․ Կարկեցարուք զի խաւսեցայց ես, եւ հանգեայց ի սրտմտութենէ:

14․ Առեալ զմարմինս իմ յատամունս իմ, եւ զոգի իմ եդից ի ձեռին իմում:

15․ Եթէ արկցէ զձեռն իւր զինեւ հզաւրն, քանզի եւ սկսեալ իսկ է: եթէ ո՞չ խաւսեցայց եւ յանդիմանեցայց առաջի նորա:

16․ Եւ այն դիպեսցի ինձ ի փրկութիւն. քանզի ոչ մտցէ առաջի նորա նենգութիւն:

17․ Լուարուք լուարուք բանից իմոց, զի պատմեցից ձեզ լուիլու:

18․ Զի ահաւասիկ մերձեալ եմ ի դատաստանս իմ, եւ գիտեմ զի արդար երեւելոց եմ:

19․ Զի ո՞վ է ոսոխն իմ որ պատասխանեսցէ ինձ. զիա՞րդ կարկեցայց` եւ պակասեցայց:

20․ Երկու ինչք պիտոյ են ինձ. եւ յայնժամ յերեսաց քոց ես ոչ թաքեայց:

21․ Զձեռն քո ի բաց արա յինէն, եւ ահ քո զիս մի զարհուրեցուսցէ:

22. Եւ ապա կոչեսցես զիս` եւ ես լուայց քեզ. եւ եթէ խաւսեսցիս` եւ ես տաց քեզ պատասխանի:

23. Քանի ինչ են մեղք եւ անաւրէնութիւնք. ուսո ինձ` քանիաւն իցէ,

24. ընդէ՞ր թաքուցանես յինէն: Համարիցիս զիս քեզ ոսո՞խ.

25. կամ թէ ի հողմաշարժ տերեւո՞յ երկնչիցիս, կամ իբրեւ հողմավար խոտո՞յ կայցես ինձ հակառակ:

26. Զի գրեցեր զինէն չարիս, եւ արկեր զինեւ զմեղս մանկութեան:

27. Եդիր զմիտս իմ ի պաշարման. պահեցեր զամենայն զգործս իմ. եւ յարմատս ոտից իմոց հասեր:

28. որ իբրեւ զտիկ հնացեալ են, կամ իբրեւ զձորձս ցեցակեր: