Գլուխ 19

   
1. Կրկնեալ անդրէն Յոբայ ասէ:

2. Մինչչեւ յե՞րբ աշխատ առնէք զանձն իմ, եւ խախտէք զիս բանիւք.

3. բայց գիտասջիք զի Տէր արար ընդ իս այսպէս: Բամբասէք զիս` եւ ո՞չ ամաչէք յարձակեալ ի վերայ իմ:

4. Այո, արդարեւ` ես մոլորեցայ եւ յիս հանգուցեալէ մոլորութիւն. խաւսել բան զոր ոչ է արժան: եւ բանք իմ մոլորեալ են` եւ ոչ են ի դէպ ժամանակի:

5. Թողցուք զայդ որ յիմ վերայ մեծաբանեալ էք, եւ յարձակեալ էք ի վերայ իմ նախատանաւք:

6. Արդ գիտասջիք` զի Տէր է որ խռովեացն, եւ ամուրս ի վերայ իմ բարձրացոյց:

7. Եւ ահա ծաղր լինիմ նախատանաւք, եւ ոչ խաւսեցայց. աղաղակեցից` եւ ոչ ուստեք իցէ դատաստան:

8. Շուրջ պատեալ եմ, եւ ոչ կարացից անցանել. եդ ի վերայ երեսաց իմոց խաւար:

9. Մերկացոյց յինէն զփառս իմ. վերացոյց զպսակն ի գլխոյ իմմէ:

10. Պարուրեաց շուրջ զինեւ` եւ գնացի. եհատ իբրեւ զծառ զյոյս իմ:

11. եւ չարաչար բարկութեամբ վարեցաւ ընդ իս. համարեցաւ զիս իբրեւ զթշնամի:

12 Միանգամայն հասին ի վերայ իմ հէնք նորա. զճանապարհս իմ պատեցին դարանակալք:

13 Հեռի եղեն յինէն եղբարք իմ. ծանեան զաւտարս քան զիս:

14. Բարեկամք իմ անողորմք եղեն. անգոսնեցին մերձաւորք իմ, եւ ծանաւթք իմ մոռացան զանուն իմ:

15. Դրացիք տան իմոյ եւ աղախնայք իմ աւտար համարեցան զիս. այլազգի թուէի առաջի նոցա:

16. Զծառայ իմ կոչեցի` եւ ոչ լուաւ. բերան իմ աղաչէր`

17. եւ աղերսէի զկին իմ: Կոչէի ողոքանաւք զորդիս հարճից իմոց.

18. եւ նոքա յաւիտեան ուրացան զիս. յորժամ յառնեմ, բամբասեն զիս:

19. Գարշեցան յինէն ծանաւթք իմ. եւ զորս ես սիրէի յարեան ի վերայ իմ:

20. Փտեցան մարմինք իմ ընդ մորթով իմով, եւ զոսկերս իմ ունիմ յատամունս:

21. Ողորմեցարուք ինձ, ողորմեցարուք ինձ ո բարեկամք. զի ձեռն Տեառն մխեցաւ յիս:

22. Ընդէ՞ր հալածէք դուք զիս իբրեւ զՏէր, եւ մարմնովք իմովք չիցէ՞ք յագեալ:

23. Ո տայր ինձ գրել զբանս իմ, եւ հանել զնոսա ի մատեան յաւիտեան:

24. գրչաւ երկաթեաւ ի կապարի, կամ ի վէմս քանդակեալ առ ի վկայութիւն:

25. Քանզի գիտեմ զի մշտնջենաւոր է որ լուծանելոցն է զիս յերկրի` յարուցանել

26. զմորթ իմ որ կրեաց զայս ամենայն: Ի Տեառնէ վճարեցաւ ինձ այս.

27. զոր ես անձին իմում իրագէտ եմ: զոր ակն իմ ետես` եւ ոչ այլ ոք. ամենայն ինչ վախճանեցաւ ի ծոց իմ:

28. Ապա թէ ասիցէք` զի՞նչ խաւսեսցուք առաջի նորա, եւ արմատ բանից գտցուք ի նմա.

29. երկերուք եւ դուք ի ծածկելոց: Զի բարկութիւն ի վերայ անաւրինաց եկեսցէ, եւ ապա գիտասցեն թէ ուր է նիւթ նոցա: