Գլուխ 8

   
1. Կրկնեալ անդրէն Բաղդատայ Սաւքեցւոյ ասէ:

2. Մինչչեւ ցեր՞բ խաւսիցիս զայդ. եւ ոգի մեծաբանութեան ի բերան քո:

3. Միթէ անիրա՞ւ դատիցի Տէր. կամ որ զամենայն արար պղտորիցէ՞ զիրաւունս:

4. Եթէ որդիքն քո մեղան առաջի Աստուծոյ, առաքեաց ի ձեռին զանաւրէնութիւնս նոցա:

5. Բայց դու կանխեա առ Տէր ամենակալ աղաւթիւք.

6. եթէ սուրբ եւ ճշմարիտ իցես` աղաւթից քոց լուիցէ: Դարձուսցէ քեզ զյարկն արդարութեան:

7. Եւ լինիցին առաջինքն քո սակաւք, եւ վերջինքն քո անբաւք:

8. Բայց աղէ հարց զազգն առաջին, եւ քննեա ըստ տոհմից հարցն:

9. Զի երիկեանք եմք, եւ ոչ գիտեմք. քանզի ստուեր են կեանք մեր ի վերայ երկրի:

10. Կամ թէ ո՞չ նոքին իսկ ուսուսցէն զքեզ. պատմեսցեն եւ ի սրտէ հանցեն զբանս:

11. Միթէ կանաչանա՞յ պրտու առանց ջրոյ. կամ բարձրանայցէ՞ կնիւն առանց ըմպելոյ:

12. Մինչդեռ անդէն ի վերայ արմատոց իւրոց է` ո՞չ հնձեսցի. յառաջ քան զարբենալ ամենայն բանջար եթէ ոչ ոռոգանի` ո՞չ ցամաքիցի:

13. Արդ այնպէս եղիցի վախճան ամենեցուն որ մոռանայցեն զՏէր. զի յոյս ամպարշտի կորիցէ:

14. Անշէն լիցի տուն նորա. անցցէ իբրեւ սարդիոստայն յարկ նորա:

15. Թէպէտ եւ հաստատեսցէ զտուն իւր` մի կացցէ յարկանել ձեռին նորա, մի հանդարտեսցէ:

16. Զի խոնաւութիւն յարեգականէ է. եւ ի նեխութենէ նորա ելցէ շառաւիղ իւր:

17. Ի վերայ կարկառի քարանց ննջեսցէ, եւ ի մէջ մանրախիճ քարանց կեցցէ:

18. եթէ ընկլցէ զնա տեղին ստեսցէ: Ո՞չ տեսեր այսպիսի ինչ.

19. զի կործանումն ամպարշտի այսպիսի է. եւ յերկրէ այլ բուսցի:

20. Զի Տէր ոչ մերժէ զանմեղն. զամենայն պատարագ ամպարշտի ոչ ընկալցի:

21. Բերանք ճշմարտից լցցին ծաղու, եւ շրթունք նոցա գոհութեամբ:

22. Թշնամիք նոցա զգեցցին զամաւթ. յարկք ամպարշտի ոչ եւս իցեն: