Գլուխ 37

   
1. Եւ ի վերայ այնորիկ խռովեցաւ սիրտ իմ, եւ ծորեաց ի տեղւոջէ իւրմէ:

2. Լուր զլուր զբարկութեան սրտմտութեան Տեառն. եւ խորհուրդ ի բերանոյ նորա ելցէ:

3. Ի ներքոյ ամենայն երկնից իշխանութիւն նորա.¡ եւ լոյս նորա ի վերայ ծագաց երկրի:

4. Զկնի նորա գոչեսցէ բարբառ. որոտայցէ ձայնիւ բարձրութեան իւրոյ. եւ ոչ փոխանակեսցէ զնոսա.¡ զի լսելի արասցէ զձայն իւր:

5. եւ որոտասցէ հզաւրն սքանչելի բարբառով իւրով: ¡քանզի արար մեծս` զոր ոչ գիտէաք:

6. Հրաման տայ ձեան թէ լեր յերկրի: եւ ձմերայնոյ անձրեւաց ըստ զաւրութեան իւրեանց:

7. Ի ձեռին ամենայն մարդոյ կնքէ, զի ծանիցէ ամենայն մարդ զիւր տկարութիւն:

8. Մտին գազանք ի դադարս, ղաւղեցին ի խշտիս:

9.ի շտեմարանաց ելանեն ցաւղք, եւ ի բարձուանդակաց ցուրտ.

10. եւ ի շնչելոյ հզաւրին տացէ սառամանիս: Յեղյեղու զջուրս որպէս եւ կամի:

11. եւ զընտիր ամպ ցանեսցէ: Ցրուէ մէգ զլոյս նորա.

12. եւ ինքն դարձուսցէ զշրջանակս: Ուր կամեցաւ` եդ զգործ նոցա. եւ զամենայն ինչ զոր հրամայեսցէ նոցա. սոքա կարգեալ են առ ի նմանէ ի վերայ երկրի:

13. եթէ ի խրատ եւ եթէ յերկեւղ, եթէ յողորմութիւն` գտցեն զնա:

14. Ունկն դիր այսմիկ Յոբ` կաց եւ խրատեաց զզաւրութիւն Տեառն:

15. Գիտեմք զի Աստուած եդ զգործս իւր. լոյս արար խաւարի:

16. Գիտէ զքննութիւն ամպոց: արհաւիրք են յանցանք չարագործաց:

17. Եւ քո` ջերմ պատմուճան հանդարտեալ կայ ի վերայ երկրի։ Ի հարաւոյ

18. հաստատեսցես ընդ նմա ի հնութիւնս, զաւրացուցանել իբրեւ զտեսիլ եղեման:

19. Բայց ընդէ՞ր իսկ` աղէ ուսո զիս. ¡զի՞նչ ասասցուք նմա, եւ դադարեսցուք ի բազումս խաւսելոյ:

20. Միթէ մատեա՞ն կամ դպի՞ր մերձ կայցէ առիս, զի զմարդկան գրեալ լռեցուցից:

21. Ոչ ամենեցուն է լոյս տեսանելի: փայլածունէ ի հնութիւնս, որպէս որ ի նմանէն ի վերայ ամպոց:

22. Ի հիւսւսոյ ամպ ոսկէճաճանչ. ի վերայ այսոցիկ մեծ են փառք եւ պատիւ ամենակալին.

23. եւ ոչ գտանեմք զայլ ոք նմանաւղ զաւրութեան նորա: որ զարդարն դատի` ո՞չ համարիցիս լսել նմա:

24. Վասն որոյ երկիցեն ի նմանէ մարդիկ, երկիցեն ի նմանէ եւ իմաստունք սրտիւք: