Գլուխ 5

   
1․ Ա՛յս է գիր արարածոց մարդկան. յաւուր յորում արար Աստուած զԱդամ. ըստ պատկերի՛ Աստուծոյ ստեղծ զնա.

2․ արու և է՛գ արար զնոսա, և օրհնեաց զնոսա. և անուանեաց զանուն նոցա Ադամ, յաւո՛ւր յորում արար զնոսա։

3․ Եկեա՛ց Ադամ ամս երկերի՛ւր և երեսուն. և ծնաւ ըստ կերպարանաց իւրոց և ըստ պատկերի իւրում. և անուանեաց զանուն նորա Սէ՛թ։

4․ Եւ եղեն աւուրք Ադամայ յետ ծնանելոյ նորա զՍէթ՝ ամք եւթնհարևր. և ծնաւ ուստերս և դստերս։

5․ Եւ եղեն ամենայն աւուրք Ադամայ զորս եկեաց, ամք ինն հարևր և երեսուն, և մեռաւ։

6․ Եւ եկեաց Սէթ ամս երկերի՛ւր և հինգ, և ծնաւ զԵնովս։

7․ Եւ եկեաց Սէթ յետ ծնանելոյ նորա զԵնովս՝ ամս եւթնհարևր և եւթն. և ծնաւ ուստերս և դստերս։

8․ Եւ եղեն ամենայն աւուրք Սէթայ, ամք ի՛նն հարևր և երկոտասան, և մեռաւ։

9․ Եւ եկեաց Ենովս ամս հարևր և իննըսուն, և ծնաւ զԿայնայն։

10․ Եւ եկեաց Ենովս յետ ծնանելոյ նորա զԿայնայն՝ ամս եւթնհարևր և տասն և հինգ, և ծնաւ ուստերս և դստերս։

11․ Եւ եղեն ամենայն աւուրք Ենովսայ՝ ամք ի՛նն հարևր և հինգ, և մեռաւ։

12․ Եւ եկեաց Կայնայն ամս հարևր և եւթանասուն, և ծնաւ զՄաղաղայէլ։

13․ Եւ եկեաց Կայնայն յետ ծնանելոյ նորա զՄաղաղայէլ, ամս եւթնհարևր և քառասուն, և ծնաւ ուստերս և դստերս։

14․ Եւ եղեն ամենայն աւուրք Կայնայնայ՝ ամք ինն հարևր և տասն, և մեռաւ։

15․ Եւ եկեաց Մաղաղայէլ ամս հարևր և վաթսո՛ւն և հինգ, և ծնաւ զՅարէդ։

16․ Եւ եկեաց Մաղաղայէլ յետ ծնանելոյ նորա զՅարէդ՝ ամս եւթնհարևր և երեսուն. և ծնաւ ուստերս և դստերս։

17․ Եւ եղեն ամենայն աւուրք Մաղաղայելի՝ ամք ութ հարևր և իննսուն և հինգ, և մեռաւ։

18․ Եւ եկեաց Յարէդ ամս հարևր և վաթսուն և երկու, և ծնաւ զԵնոք։

19․ Եւ եկեաց Յարէդ յետ ծնանելոյ նորա զԵնոք՝ ամս ութ հարևր. և ծնաւ ուստերս և դստերս։

20․ Եւ եղեն ամենայն աւուրք Յարեդի՝ ամք ինն հարևր վաթսուն և երկուք, և մեռաւ։

21․ Եւ եկեաց Ենոք ամս հարևր վաթսուն և հինգ, և ծնաւ զՄաթուսաղա։

22․ Եւ հաճո՛յ եղև Ենոք Աստուծոյ յետ ծնանելոյ նորա զՄաթուսաղա՝ ամս երկերիւր։ Եւ ծնաւ ուստերս և դստերս։

23․ Եւ եղեն ամենայն աւուրք Ենոքայ՝ ամք երեք հարևր և վաթսուն և հինգ։

24․ Եւ հաճո՛յ եղև Ենոք Աստուծոյ. և ո՛չ ուրեք գտանէր, զի փոխեա՛ց զնա Աստուած։

25․ Եւ եկեաց Մաթուսաղա ամս հարիւր ութսուն և եւթն, և ծնաւ զՂամէք։

26․ Եւ եկեաց Մաթուսաղա յետ ծնանելոյ նորա զՂամէք՝ ամս եւթնհարևր ութսուն և երկու. և ծնաւ ուստերս և դստերս։

27․ Եւ եղեն ամենայն աւուրք Մաթուսաղայի զորս եկեաց, ամք իննհարևր վաթսուն և ինն, և մեռաւ։

28․ Եւ եկեաց Ղամէք ամս հարևր ութսուն և ութ. և ծնաւ որդի.

29․ և անուանեաց զանուն նորա Նո՛յ. ասէ՝ սա՛ հանգուսցէ զմեզ ի գործոց մերոց և ի տրտմութեանց ձեռաց մերոց, և յերկրէ զոր անէծ Տէր Աստուած։

30․ Եւ եկեաց Ղամէք յետ ծնանելոյ նորա զՆոյ՝ ամս հինգհարևր և վաթսուն և հինգ, և ծնաւ ուստերս և դստերս։

31․ Եւ եղեն ամենայն աւուրք Ղամեքայ՝ ամք եւթն հարիւր յիսուն և երեք, և մեռաւ։

32․ Եւ էր Նոյ ամաց հինգ հարիւրից, և ծնաւ Նոյ երիս որդիս. զՍէմ, զՔամ, և զՅաբէթ։