1. Եւ եղեւ յետ երկուց ամաց աւուրց, ետես փարաւոն երազ: Թուէր թէ կայցէ յեզր գետոյ:
2. Եւ ահա որպէս թէ ի գետոյ անտի ելանէին եւթն երինջք գեղեցիկ տեսանելով, եւ ընտիրք մարմնով, եւ արածէին ի խաղի անդ:
3. Եւ այլ եւս եւթն երինջք ելանէին յետ նոցա ի գետոյ անտի. զազիրք տեսանելով. եւ վատիտք մարմնով. եւ արածէին առ այլ երնջովքն առ եզեր գետոյն:
4. Եւ ուտէին եւթն երինջքն զազիրք տեսլեամբ եւ վտիտ մարմնովք, զեւթն երինջս գեղեցիկս տեսլեամբ եւ զընտիրս: Զարթեաւ փարաւոն.
5. եւ անդրէն ի քուն եմուտ: Եւ ետես երազ երկրորդ. եւ ահա եւթն հասկ ելանէին ի միում փնջի` ընտիրք եւ գեղեցիկք:
6. Եւ ահա եւթն այլ հասկք սինք եւ խորշակահարք ելանէին յետ նոցա:
7. Եւ կլանէին եւթն հասկքն սինք եւ խորշակահարք զեւթն հասկսն` զընտիրս եւ զատոքս: Զարթեաւ փարաւոն, եւ էր երազ:
8. Եւ եղեւ առաւաւտ, եւ խռովեցաւ անձն նորա: Եւ առաքեաց կոչեաց զամենայն երազահանսն Եգիպտոսի, եւ
զամենայն իմաստունս նորա, եւ պատմեաց փարաւոն զերազն իւր: Եւ ոչ ոք էր որ մեկնէր զերազն փարաւոնի:
9. Եւ խաւսեցաւ տակառապետն առաջի փարաւոնի` եւ ասէ. Զյանցանս իմ յիշեցուցանեմ այսաւր:
10. Բարկացաւ փարաւոն ծառայից իւրոց. եւ եդ զմեզ ի բանտի ի տան դահճապետին. զիս` եւ զմատակարարն:
11. Եւ տեսաք երկոքին երազ ի միում գիշերի` ես եւ նա. եւ իւրաքանչիւր ըստ երազոյ իւրում տաեսանէաք:
12. Եւ էր անդ ընդ մեզ պատանի մի մանուկ` եբրայեցի, ծառայ դահճապետին. եւ պատմեցաք նմա:
13. Եւ մեկնեաց մեզ զերազսն մեր առն ըստ իւրաքանչիւր երազոյ մեկնեաց: Եւ եղեւ որպէս մեկնեացն մեզ, նոյնպէս եւ պատահեաց. ինձ գալ հասանել յիշխանութիւն. եւ նմա` կախել զփայտէ:
14. Առաքեաց փարաւոն եւ կոչեաց զՅովսէփ: Եւ հանին զնա ի բանտէ անտի. եւ փոքրեցին զհերս նորա, եւ փոխեցին զպատմուճան նորա. եւ եկն առաջի փարաւոնի:
15. Եւ ասէ փարաւոն ցՅովսէփ. Երազ տեսի` եւ չիք ոք որ մեկնէ զնա. բայց ես լուայ զքէն, ասեն` եթէ լսես զերազս` մեկնես:
16. Պատասխանի ետ Յովսէփ` եւ ասէ ցփարաւոն. Առանց Աստուծոյ ոչ լինի պատասխանի փրկութեան փարաւոնի:
17. Խաւսեցաւ փարաւոն ընդ Յովսէփայ` եւ ասէ. Թուէր ի տեսլեան իմում, եթէ կայի յեզեր գետոյ.
18. եւ որպէս թէ ի գետոյ անտի ելանէին եւթն երինջք ընտիրք մարմնովք եւ գեղեցիկ տեսանելով եւ արածէին ի խաղի անդ:
19. Եւ ահա այլ եւս եւթն երինջք ելանէին զկնի նոցա ի գետոյ անտի, դժընդակք եւ զազիրք տեսանելով յոյժ, եւ վտիտ մարմնովք. որպիսի ոչ տեսի յամենայն երկիրս Եգիպտացւոց զազրագոյնս քան զնոսա:
20. Եւ ուտէին եւթն երինջքն վտիտք եւ զազիրք զեւթն երինջսն զառաջինս` զգեղեցիկսն եւ զընտիրս:
21. Եւ մատնէին յորովայն նոցա, եւ ոչ երեւէին. եւ երեսք նոցա զազիրք իբրեւ զառաջինն: Զարթեայ, եւ դարձեալ ննջեցի:
22. Եւ տեսանէի միւսանգամ յերազի: Որպէս թէ եւթն հասկ ելանէին ի միում փընջի` լիք եւ գեղեցիկ:
23. Եւ այլ եւթն հասկ ապականեալք, ազազունք եւ խորշակահարք, ելանէին մաւտ առ նոսա:
24. Եւ կլանէին եւթն հասկքն ազազունք եւ խորշակահարք` զեւթն հասկսն զգեղեցիկս եւ զատոքս: Եւ պատմեցի երազահանացն, եւ ոչ ոք էր որ մեկնէր ինձ:
25. Եւ ասէ Յովսէփ ցփարաւոն. Երազն փարաւոնի մի է. զոր ինչ Աստուած առնելոց է` եցոյց փարաւոնի:
26. Եւթն երինջքն գեղեցիկք` եւթն ամ են. եւ եւթն հասկն գեղեցիկք` եւթն ամ են: Երազն փարաւոնի մի է:
27. Եւ եւթն երինջքն տգեղք եւ վտիտ որ ելանէին զհետ նոցա, եւթն ամ են. եւ եւթն հասկքն ոսինք եւ խորշակահարք. լիցի զեւթն ամ սով:
28. Բանն զոր ասացի փարաւոնի` այն է. զոր ինչ Աստուած առնելոց է, եցոյց փարաւոնի:
29. Ահա ամք եւթն եկեսցեն բազում լիութեան յամենայն երկիրս Եգիպտացւոց:
30. Եւ յետ այնորիկ եկեսցէ եւթն ամ սովոյ, եւ մոռասցին զլիութիւն յամենայն երկիրս Եգիպտացւոց. եւ սպառեսցէ սովն զերկիր:
31. Եւ ոչ ծանիցի լիութիւն յերեսաց սովոյն որ գայցէ յետ այնորիկ. քանզի սաստիկ լինիցի յոյժ:
32. Այլ վասն կրկնելոյ երազոյն փարաւոնի երկիցս անգամ. զի ճշմարիտ է բանն առ ի յԱստուծոյ, եւ փութասցի Աստուած առնել զնա:
33. Եւ արդ` տես. խնդրեա այր մի իմաստուն եւ խորհրդական փարաւոնի. եւ կացուսցես զնա ի վերայ երկրիս Եգիպտացւոց:
34. Եւ արասցէ, եւ կացուսցէ գործակալս փարաւոնի ի վերայ երկրիս: Եւ հինգերորդեսցեն զարմտիս երկրիս Եգիպտացւոց ամացն լիութեան:
35. Եւ ժողովեսցեն զամենայն կերակուրս զեւթն ամացն բարեաց եկելոց: Եւ ժողովեսցի ցորեան ընդ ձեռամբ փարաւոնի. եւ կերակուրք ի քաղաքս պահեսցին:
36. Եւ եղիցի կերակուրքն պահեալ երկրիս յեւթն ամս սովոյն որ լինիցին յերկրիս Եգիպտացւոց. եւ մի սատակեսցի երկիրս ի սովոյ:
37. Եւ հաճոյ թուեցաւ բանքն առաջի փարաւոնի, եւ առաջի ամենայն ծառայից իւրոց:
38. Եւ ասէ փարաւոն ցամենայն ծառայս իւր. Միթէ գտանիցե՞մք այր այնպիսի` որ ունիցի զոգի Աստուծոյ յանձին իւրում:
39. Եւ ասէ փարաւոն ցՅովսէփ. Որովհետեւ եցոյց քեզ Աստուած զայդ ամենայն. չիք այր իմաստնագոյն եւ խորհրդական քան զքեզ:
40. Դու լիցիս ի վերայ տան իմոյ. եւ բերանոյ քում հնազանդ լիցի ամենայն ժողովուրդ իմ. բայց միայն աթոռովս ի վերոյ եղէց ես քան զքեզ:
41 Եւ ասէ փարաւոն ցՅովսէփ. Ահաւասիկ կացուցի զքեզ այսաւր ի վերայ երկրիս Եգիպտացւոց:
42. Եւ հանեալ փարաւոնի զմատանին իւր ի ձեռանէ իւրմէ` եդ ի ձեռին Յովսէփայ. եւ զգեցոյց նմա պատմուճան բեհեզեայ, եւ արկ մանեակ ոսկի ի պարանոց նորա:
43. Եւ եհան զնա յերկրորդ կառս իւր. եւ քարոզ կարդայր առաջի նորա: Եւ կացոյց զնա ի վերա երկրին Եգիպտացւոց:
44. Եւ ասէ փարաւոն ցՅովսէփ. Ահաւասիկ ես փարաւոն. առանց քո ոչ ոք համբարձցէ զձեռս իւր եւ զոտս իւր ի վերայ ամենայն երկրիս Եգիպտացւոց:
45. Եւ կոչեաց փարաւոն զանուն Յովսէփայ` Փսոմփթոմփանէ: Եւ ետ նմա զԱսանէթ դուստր Պետափրեայ քրմի Արեգ քաղաքի կնութեան: Եւ ել Յովսէփ յերեսաց փարաւոնի:
46. Եւ էր Յովսէփ ամաց երեսնից յորժամ ընծայեցաւ առաջի
փարաւոնի արքային Եգիպտացւոց: Ել Յովսէփ յերեսաց փարաւոնի, եւ շրջեցաւ ընդ ամենայն Եգիպտոս:
47. Եւ արար երկիրն յեւթն ամս լիութեան արդիւնս:
48. Եւ ժողովեաց զամենայն կերակուրս ամացն իւթանց յորս էր լիութիւն յերկրին Եգիպտացւոց: Եւ համբարեաց կերակուրս ի քաղաքս. զկերակուր դաշտաց քաղաքին որ շուրջ զնովաւ:
49. Եւ համբարեաց ի նմա: Եւ ժողովեաց Յովսէփ զցորեան իբրեւ զաւազ ծովու բազում յոյժ. մինչչեւ ոչ կարէր համարել. քանզի ոչ գոյր թիւ:
50. Եւ եղեն Յովսէփու երկու որդիք մինչ չեւ եկեալ էր եւթն ամացն սովոյ. զորս ծնաւ նմա Ասանէթ դուստր Պետափրեայ քրմի Արեգ քաղաքի:
51. Եւ կոչեաց Յովսէփ զանուն անդրանկանն Մանասէ. զի ասէ` թէ մոռացայց ինձ Աստուած զամենայն զվիշտս իմ, եւ զամենայն վիշտս հաւր իմոյ:
52. Եւ զանուն երկրորդին կոչեաց Եփրեմ, զի ասէ` թէ աճեցոյց զիս Աստուած յերկրի տառապանաց իմոց:
53. Եւ անցին եւթն ամք լիութեանն, որ եղեն յերկրին Եգիպտացւոց:
54. Եւ սկան գալ եւթն ամք սովոյն. որպէս ասաց Յովսէփ: Եւ եղեւ սով յամենայն երկրին. զի յամենայն երկրին Եգիպտացւոց ոչ գտանէր հաց:
55. Եւ սովեցաւ ամենայն երկիրն Եգիպտացւոց: Եւ աղաղակեաց ամենայն ժողովուրդն առ փարաւոն վասն հացի: Եւ ասէ փարաւոն ցամենայն Եգիպտացիսն. Երթայք առ Յովսէփ, զոր ինչ ասիցէ ձեզ արասջիք:
56. Եւ էր սով ի վերայ երեսաց ամենայն երկրի: Եւ եբաց Յովսէփ զամենայն շտեմարանս ցորենոյ. եւ վաճառէր ամենայն Եգիպտացւոցն: Եւ սաստկացաւ սովն յամենայն երկիրն Եգիպտացւոց:
57. Եւ ամենայն աշխարհք գային յԵգիպտոս գնել ի Յովսէփայ. զի զաւրանայր սովն ընդ ամենայն երկիր:
Հաղորդում կայքում սխալի վերաբերյալ
Տվյալ հատվածում առկա է սխալ: