Գլուխ 33

   
1․ Զաչս իւր ի վեր եբարձ Յակոբ եւ ետես, եւ ահա Եսաւ եղբայր իւր գայր, եւ ընդ նմա արք չորեքհարիւր: Եւ բաշխեաց Յակոբ զմանկունսն ի Լիա` եւ յՌաքէլ, եւ յերկուս աղախնայս:

2․ Եւ արար զերկուս աղախնայսն եւ զորդիս նոցա առաջի, եւ զԼիա եւ զորդիս նորա զկնի, եւ զՌաքէլ եւ զՅովսէփ հուսկ յետոյ:

3․ Եւ ինքն անց յառաջ քան զնոսա, եւ երկիր եպագ եւթն անգամ ի վերայ երկրի` մինչչեւ մերձենալ առ եղբայրն իւր:

4․ Եւ ընթացաւ Եսաւ ընդ առաջ նորա. գիրկս արկ նմա եւ համբուրեաց, եւ անկաւ ի վերայ պարանոցի նորա եւ համբուրեաց զնա. եւ լացին երկոքեան:

5․ Եւ հայեցեալ ի վեր ետես զկանայսն եւ զմանկունսն, եւ ասէ. Դոքա` զի՞նչ են քո: Եւ նա ասէ. Մանկունք իմ են, որովք ողորմեցաւ Աստուած ծառայի քում:

6․ Եւ մատեան աղախնայքն եւ որդիք նոցա, եւ երկիր պագին նմա:

7․ Եւ մատեաւ Լիա եւ որդիք իւր` եւ երկիր պագին նմա. յետոյ մատեաւ Յովսէփ եւ Ռաքէլ` եւ երկիր պագին նմա:

8․ Եւ ասէ` Զի՞նչ էր այն ամենայն չու` որ ինձ դիպեցաւ: Եւ նա ասէ. Զի գտցէ ծառայ քո շնորհս առաջի քո:

9․ Եւ ասէ Եսաւ. Կայ եւ իմ շատ` եղբայր` քեզ լիցի քոյդ:

10․ Եւ ասէ Յակոբ. Մի այդպէս. եթէ գտի շնորհս առաջի քո` ընկալ զընծայսն ի ձեռաց իմոց. քանզի այնպէս տեսի զերեսս քո` որպէս ոք տեսանիցէ զերեսս Աստուծոյ: Եւ զուարթասցիս ընդ իս:

11․ Եւ առ զաւրհնութիւնս իմ, զոր մատուցի քեզ. զի ողորմեցաւ ինձ Աստուած. եւ է իմ ամենայն ինչ: Եւ բռնադատեաց զնա: Եւ առ:

12․ Եւ ասէ` Չուեսցուք գնասցուք` եւ երթիցուք զուղորդն:

13․ Եւ ասէ ցնա. տէր իմ ինքնին գիտէ, զի մանկունքս մատաղ են. եւ ոչխարի, եւ արջառոյ ծնունդ արձակեալ է. եւ եթէ մի աւր ստիպեմ զդոսա, մեռանին ամենայն խաշինքդ:

14․ Այլ յառաջեսցէ տէր իմ քան ծառայ իւր. եւ ես ըստ կարի եւ ըստ պարապոյ ճանապարհիդ առաջի իմ, եւ ըստ կազդուրել մանկանց իմոց խաղացից, մինչչեւ եկից առ տէր իմ ի Սէիր:

15․ Եւ ասէ Եսաւ. Իսկ թողից առ քեզ ի ժողովրդենէ աստի` որ ընդ իս են: Եւ նա ասէ. Ընդ է՞ր է ինձ այդ. շատ է զի գտի շնորհս առաջի քո տէր:

16․ Եւ դարձաւ յաւուր յայնմիկ Եսաւ ընդ ճանապարհս իւր ի Սէիր:

17․ Եւ Յակոբ չուեաց ի խորանս եւ արար իւր անդ տունս, եւ խաշանց իւրոց արար դադարս. վասն այնորիկ կոչեաց զանուն տեղւոյն այնորիկ Խորանս:

18․ Եւ եկն Յակոբ ի Սաղէմ քաղաք Սիկիմացւոց, որ է յերկրին Քանանացւոց` իբրեւ եկն ի Միջագետաց Ասորւոց, եւ բնակեցաւ յանդիման քաղաքին:

19․ Եւ ստացաւ զվիճակ անդին ուր եհար զխորան իւր` Յեմովրայ հաւրէ Սիւքեմայ հարիւր ոչխարի:

20․ Եւ շինեաց անդ սեղան, եւ կարդաց զԱստուած Իսրայէլի: