1. Եւ զոտս իւր ամբարձեալ Յակոբայ գնալ յերկիրն Արեւելից, առ Լաբան որդի Բաթուելի Ասորւոյ, եղբայր Ռեբեկայ` մաւր Յակոբայ եւ Եսաւայ:
2. Եւ հայեցաւ եւ ահա ջրհոր մի ի դաշտի անդ. եւ էին անդ երեք հաւտք խաշանց մակաղեալք ի նմա, եւ ի ջրհորոյն յայնմանէ արբուցանէին զխաշինսն: Եւ վէմ մի մեծ կայր ի վերայ բերանոյ ջրհորոյն:
3. Եւ անդր ժողովէին ամենայն հաւտք, եւ տապալէին զվէմն ի բերանոյ ջրհորոյն, եւ տային ջուր խաշանցն. եւ կափուցանէին զվէմն ի բերան ջրհորոյն` անդրէն ի տեղի իւր:
4. Եւ ասէ ցնոսա Յակոբ. Եղբարք` ուստի՞ էք դուք: Եւ նոքա ասեն. Ի Խառանէ եմք:
5. Ասէ ցնոսա. Գիտէ՞ք դուք զԼաբան զորդի Նաքովրայ: Եւ նոքա ասեն` Գիտեմք:
6. Ասէ ցնոսա. Ո՞ղջ իցէ: Եւ նոքա ասեն` Ողջ է: Եւ ահա Ռաքէլ դուստր նորա գայր ընդ խաշինսն:
7. Եւ ասէ Յակոբ. Դեռ աւուր շատ կայ. չեւ եւս է ժամ խաշանցդ ժողովելոյ. արբուցէք խաշանցդ, եւ երթայք արածեցէք:
8. Եւ նոքա ասեն. Չէ հնար` թէ մինչ ոչ ժողովեսցին ամենայն հովիւք, եւ տապալեսցեն զվէմդ ի բերանոյ ջրհորոյդ. եւ արբուցանիցեմք խաշանցս:
9. Մինչ դեռ նա ընդ նոսա խաւսէր, ահա Ռաքէլ դուստր Լաբանու գայր ընդ խաշինս հաւր իւրոյ. քանզի նա արածէր զխաշինս հաւր իւրոյ:
10. Եւ եղեւ իբրեւ ետես Յակոբ զՌաքէլ դուստր Լաբանայ եղբաւր մաւր իւրոյ. եւ զխաշինս Ղաբանայ եղբաւր մաւր իւրոյ: Եւ մատուցեալ Յակոբ տապալեցոյց զվէմն ի բերանոյ ջրհորոյն, եւ արբոյց խաշանցն Ղաբանու եղբաւր մաւր իւրոյ:
11. Եւ համբուրեաց Յակոբ զՀռաքէլ. եւ ձայն եբարձ եւ ելաց:
12. Եւ պատմեաց Յակոբ Ռաքելայ թէ եղբայր հաւր նորա է, եւ որդի Ռեբեկայ: Եւ ընթացաւ պատմեաց հաւր իւրում ըստ բանիցս այսոցիկ:
13. Եւ եղեւ իբրեւ լուաւ Լաբան զանուն Յակոբայ որդւոյ քեռ իւրոյ, ընթացաւ ընդառաջ նորա, գիրկս արկ եւ համբուրեաց զնա. եւ տարաւ զնա ի տուն իւր: Եւ պատմեաց Լաբանու զամենայն զբանս զայսոսիկ:
14. Եւ ասէ ցնա Լաբան. Յոսկերացս իմոց, եւ ի մարմնոցս իմոց ես դու: Եւ էր ընդ նմա ամսաւրեայ մի ժամանակ:
15. Եւ ասէ Լաբան ցՅակոբ. Զի՞ եղբայր իմ ես դու, ոչ ծառայեսցես ինձ ձրի. յայտ արա ինձ զինչ իցեն վարձք քո:
16. Եւ Լաբանայ էին երկու դստերք. անուն երիցուն Լիա, եւ անուն կրտսերոյն Ռաքէլ:
17. Եւ աչք Լիայ` գիջագոյնք, բայց Ռաքէլ բարի էր տեսլեամբ եւ գեղեցիկ երեսաւք:
18. Եւ սիրեաց Յակոբ զՌաքէլ եւ ասէ` ծառայեցից քեզ եւթն ամ վասն Ռաքելայ դստեր քոյ կրտսերոյ:
19. Եւ ասէ ցնա Լաբան. Լաւ իցէ քեզ տալ զնա, քան տալ զնա առն աւտարի. բնակեա դու ընդ իս:
20. Եւ ծառայեաց Յակոբ վասն Ռաքելայ ամս եւթն. եւ էին յաչս նորա իբրեւ աւուրք սակաւք, քանզի սիրէր զնա:
21. Եւ ասէ Յակոբ ցԼաբան. Տուր ինձ զկին իմ, լցեալ են աւուրք, զի մտից առ նա:
22. Եւ ժողովեաց Լաբան զամենայն արս տեղւոյն, եւ արար հարսանիս:
23. Եւ եղեւ երեկոյ` առեալ Լաբանու զԼիա դուստր իւր տարաւ առ Յակոբ. եւ եմուտ առ նա Յակոբ:
24. Եւ ետ Լաբան զԶելփա զաղախին իւր նաժիշտ դստեր իւրում Լիայ: Եւ իբրեւ այդ եղեւ, եւ ահա Լիա էր:
25. Եւ ասէ Յակոբ ցԼաբան. Ընդ է՞ր գործեցեր զայս. ո՞չ վասն Ռաքելի ծառայեցի քեզ. ընդ է՞ր խաբեցեր զիս:
26. Ասէ Լաբան. Չեն աւրէնք յաշխարհի մերում տալ նախ զկրտսերն քան զերէց:
27. Արդ կատարեա եւթն եւս ամ ընդ նորա. եւ տաց քեզ եւ զնա` փոխանակ վաստակոցն, զոր վաստակեսցես ինձ զեւթն ամ եւս այլ:
28. Արար այնպէս Յակոբ. եւ կատարեաց եւթն եւս ամ ընդ նորա: Եւ ետ նմա Լաբան զՌաքէլ դուստր իւր կնութեան:
29. Եւ ետ Լաբան Ռաքելի դստեր իւրում զԲալլայ զաղախին իւր նաժիշտ:
30. Եւ եմուտ առ Ռաքէլ, եւ սիրեաց զՌաքէլ քան զԼիա. եւ ծառայեաց նմա այլ եւս եւթն ամ:
31. Իբրեւ ետես Տէր, եթէ ատելի է Լիա, եբաց զարգանդ նորա. բայց Ռաքէլ ամուլ էր:
32. Եւ յղացաւ Լիա, եւ ծնաւ որդի Յակոբայ. եւ կոչեաց զանուն նորա Ռոբէն. ասէ` զի ետես Տէր զտառապանս իմ. արդ` սիրեսցէ զիս այր իմ:
33. Յղացաւ դարձեալ Լիա` եւ ծնաւ երկրորդ որդի Յակոբայ եւ ասէ` Զի լուաւ Տէր եթէ ատեցեալ եմ, եւ յաւել ինձ զսա. եւ կոչեաց զանուն նորա Շմաւոն:
34. Եւ յղացաւ` եւ ծնաւ որդի. եւ ասէ. Արդ առ իս եղիցի այր իմ, զի ծնայ երիս որդիս. վասն այնորիկ կոչեաց զանուն նորա Ղեւի:
35. Եւ յղացաւ դարձեալ, ծնաւ որդի. եւ ասէ. Զայս միւս անգամ գոհացայց զՏեառնէ. եւ կոչեաց զանուն նորա Յուդա: Եւ եկաց ի ծննդոց:
Հաղորդում կայքում սխալի վերաբերյալ
Տվյալ հատվածում առկա է սխալ: