1․ Եւ եղեւ իբրեւ ծերացաւ Իսահակ, եւ վատեցին աչք նորա ի տեսանելոյ. կոչեաց զԵսաւ զորդի իւր զերէց` եւ ասէ ցնա. Որդեակ իմ: Եւ նա ասէ ցնա. Ահաւասիկ ես:
2․ Եւ նա ասէ ցնա. Ահաւասիկ ես ծերացեալ եմ, եւ ոչ գիտեմ զաւր վախճանի իմոյ:
3․ Արդ` առ դու զգործի քո զաղեղն եւ զկապակրճս, եւ ել ի դաշտ. եւ որսա ինձ որս.
4․ եւ արա ինձ խորտիկս որպէս եւ ես սիրեմ. եւ բեր մատո ինձ` զի կերայց. եւ աւրհնեսցէ զքեզ անձն իմ մինչ չեւ մեռեալ իցեմ:
5․ Եւ լուաւ Ռեբեկա զի խաւսէր Իսահակ ընդ որդւոյ իւրում: Գնաց Եսաւ ի դաշտ որսալ որս հաւր իւրում:
6․ Եւ խաւսեցաւ Ռեբեկա ընդ Յակոբայ որդւոյ իւրում` եւ ասէ. Ահա լուայ ես ի հաւրէ քումմէ զի խաւսէր ընդ եղբաւր քում` եւ ասէր.
7․ Բեր ինձ որս եւ արա ինձ խորտիկս զի կերայց եւ աւրհնեցից զքեզ առաջի Տեառն` մինչ չեւ մեռեալ իցեմ:
8․ Եւ արդ` որդեակ իմ լուր ինձ` որպէս ես պատուիրեմ քեզ:
9․ Գնա դու ի դաշտն, եւ առ ինձ անտի երկուս ուլս փափուկս եւ ընտիրս, եւ արարից զնոսա խորտիկս հաւր քում որպէս եւ սիրէ:
10․ Եւ մատուսցես հաւր քում եւ կերիցէ. զի աւրհնեսցէ զքեզ հայր քո` մինչ չեւ մեռեալ իցէ:
11․ Եւ ասէ Յակոբ ցՌեբեկայ մայր իւր. Եղբայր իմ Եսաւ, այր թաւ է, եւ ես լերկ.
12․ գուցէ շաւշափիցէ զիս հայր իմ. եւ լինիցիմ առաջի նորա իբրեւ արհամարհոտ, եւ ածիցեմ ի վերայ իմ անէծս եւ ոչ աւրհնութիւն:
13․ Եւ ասէ ցնա մայր իւր. Յիմ վերայ անէծս այն, որդեակ. բայց միայն լուր ձայնի իմում եւ երթ ած ինձ:
14․ Գնաց` եւ առ ած մաւր իւրում: Եւ արար խորտիկս` որպէս եւ սիրէր հայր նորա:
15․ Եւ առեալ Ռեբեկայ զպատմուճանն ազնիւ որդւոյ իւրոյ երիցու որ կայր առ նմա ի տան, զգեցոյց Յակոբայ որդւոյ իւրում կրցերոյ:
16․ Եւ ուլենիսն ագոյց ի բազուկս նորա, եւ ի վերայ մերկոյ պարանոցի նորա:
17․ Եւ ետ զխորտիկն եւ զհացն զոր արար ի ձեռս Յակոբայ որդւոյ իւրոյ:
18․ Եւ տարաւ հաւր իւրում եւ ասէ` Հայր իմ: Եւ նա ասէ` Աւասիկ եմ: Եւ ասէ. Ո՞վ ես դո, որդեակ:
19․ Եւ ասէ Յակոբ ցհայրն. Ես եմ Եսաւ անդրանիկն քո, արարի որպէս եւ խաւսեցար ընդ իս, արի նիստ եւ կեր յորսոյ իմմէ. զի աւրհնեսցէ զիս անձն քո:
20․ Եւ ասէ Իսահակ ցորդին իւր. Զի՞ է զի վաղվաղակի գտեր որդեակ: Եւ նա ասէ. Որպէս պատրաստեաց Տէր Աստուած առաջի իմ:
21․ Եւ ասէ Իսահակ ցՅակոբ. Մաւտ եկ` եւ շաւշափեցից զքեզ, որդեակ, եթէ դու իցես որդի իմ Եսաւ` թէ ոչ:
22․ Մատեաւ Յակոբ առ Իսահակ հայր իւր, եւ շաւշափեաց զնա` եւ ասէ. Ձայնդ ձայն Յակոբայ, եւ ձեռքդ` ձեռք Եսաւայ:
23․ Եւ ոչ ծանեաւ զնա. զի էին ձեռք նորա իբրեւ զձեռսն Եսաւայ եղբաւր իւրոյ թաւ: Եւ աւրհնեաց զնա
24․ եւ ասէ. Դու ես որդի իմ Եսաւ: Եւ նա ասէ` Ես եմ:
25․ Եւ ասէ. Մատո ինձ` եւ կերայց յորսոյ քումմէ որդեակ, զի աւրհնեսցէ զքեզ անձն իմ: Առ, մատոյց նմա` եւ կերաւ. եւ եբեր նմա գինի` եւ արբ:
26․ Եւ ասէ ցնա Իսահակ հայր իւր. Մաւտ եկ եւ համբուրեա զիս որդեակ:
27․ Եւ մատեաւ համբուրեաց զնա: Եւ առ զհոտ հանդերձից նորա. եւ աւրհնեաց զնա` եւ ասէ. Ահա հոտ որդւոյ իմոյ իբրեւ զհոտ անդոյ լիոյ զոր աւրհնեաց Տէր:
28․ Եւ տացէ քեզ Աստուած ի ցաւղոյ երկնից` եւ ի պարարտութենէ երկրի, եւ բազմութիւն ցորենոյ եւ գինւոյ:
29․ Եւ ծառայեսցեն քեզ ազգք. եւ երկիր պագցեն քեզ իշխանք. եւ եղիցես տէր եղբաւր քում, եւ երկիր պագցեն քեզ որդիք հաւր քոյ. որ անիծանիցէ զքեզ` անիծեալ լիցի. եւ որ աւրհնեսցէ զքեզ` աւրհնեալ:
30․ Եւ եղեւ յետ դադարելոյն Իսահակայ յաւրհնելոյ անտի զՅակոբ զորդի իւր. իբրեւ ել Յակոբ յերեսաց Իսահակայ հաւր իւրոյ: Եւ եկն Եսաւ եղբայր նորա յորսոյ:
31․ Արար եւ նա խորտիկս, եւ մատոյց հաւր իւրում. եւ ասէ ցհայր իւր. Յարիցէ հայր իմ, եւ կերիցէ յորսոյ որդւոյ իւրոյ` զի աւրհնեսցէ զիս անձն քո:
32․ Եւ ասէ ցնա Իսահակ հայր իւր. Ո՞վ ես դու: Եւ նա ասէ. Ես եմ որդին քո անդրանիկ Եսաւ:
33․ Եւ զարմացաւ Իսահակ զարմացումն մեծ յոյժ. եւ ասէ. Իսկ այն ո՞վ էր որ որսացաւ ինձ որս` եւ եբեր մատոյց. եւ կերայ յամենայնէ մինչ չեւ քո եկեալ էր. եւ աւրհնեցի զնա եւ եղիցի աւրհնեալ:
34․ Եւ եղեւ իբրեւ լուաւ Եսաւ զբանսն Իսահակայ հաւր իւրոյ. աղաղակեաց ի ձայն մեծ դառնացեալ յոյժ. եւ ասէ ցհայրն իւր. 0րհնեա արդ` եւ զիս հայր:
35․ Եւ ասէ ցնա. Եկն եղբայր քո նենգութեամբ եւ առ զաւրհնութիւնս քո:
36․ Եւ նա ասէ. Յիրաւի կոչեցաւ անուն նորա Յակոբ. զի այս երկիցս խաբեաց զիս. առ զանդրանկութիւնն իմ, եւ արդ` առ զաւրհնութիւնս իմ: Եւ ասէ Եսաւ ցհայր իւր. Եւ ոչ մի՞ ինչ աւրհնութիւն թողեր ինձ հայր:
37․ Պատասխանի ետ Իսահակ` եւ ասէ ցԵսաւ. Որովհետեւ տէր արարի զնա քեզ. եւ զամենայն եղբարս քո արարի նմա ծառայս. ցորենով եւ գինւով հաստատեցի զնա. քեզ զի՞նչ արարից որդեակ:
38․ Ասէ Եսաւ ցհայրն իւր. Միթէ` մի՞ աւրհնութիւն իցէ քո հայր. աւրհնեա եւ զիս հայր: Եւ իբրեւ ստրջացաւ Իսահակ. ամբարձ զձայն իւր Եսաւ եւ ելաց:
39․ Պատասխանի ետ Իսահակ հայր նորա եւ ասէ ցնա. Ահա` ի պարարտութենէ երկրի եղիցի բնակութիւն քո, եւ ի ցաւղոյ երկնից ի վերուստ:
40․ Եւ սրով քով կեցցես. եւ եղբաւր քում ծառայեսցես. եւ եղիցի յորժամ քակեսցես եւ լուծցես զլուծ նորա ի պարանոցէ քումմէ:
41․ Եւ պահէր Եսաւ ոխս Յակոբայ վասն աւրհնութեանցն զոր աւրհնեաց զնա հայր իւր. եւ ասէր Եսաւ ի մտի իւրում. Մերձեսցին աւուրք կարեաց հաւր իմոյ, զի սպանից զՅակոբ զեղբայր իմ:
42․ Ազդ եղեւ Ռեբեկայ բանքն Եսաւայ որդւոյ իւրոյ երիցու. եւ յղեաց կոչեաց զորդի իւր զկրտսեր զՅակոբ` եւ ասէ ցնա. Ահա Եսաւ եղբայր քո սպառնայ սպանանել զքեզ:
43․ Արդ` լուր, որդեակ ձայնի իմում, եւ արի գնա ի Միջագետս առ Ղաբան եղբայր իմ ի Խառան:
44․ Եւ բնակեսցես ընդ նմա աւուրս բազումս, մինչչեւ անցցէ սրտմտութիւն բարկութեան եղբաւր քո ի քէն:
45․ Եւ մոռասցի զոր ինչ արարեր նմա. եւ ապա առաքեցից կոչեցից զքեզ անտի. գուցէ` անզաւակիցիմ յերկոցունց ի ձէնջ ի միում աւուր:
46․ Եւ ասէ Ռեբեկա ցԻսահակ. Ձանձրացեալ է անձն իմ ի դստերաց որդւոց Քետայ. եթէ առնուցու Յակոբ կին ի դստերաց անտի Քետայ, ի դստերաց երկրիս այսորիկ. ընդ է՞ր իցէ ինձ կեալ:
Հաղորդում կայքում սխալի վերաբերյալ
Տվյալ հատվածում առկա է սխալ: