1. Եւ եղեւ ի ժամանակի յայնմիկ, էջ Յուդա յեղբարց իւրոց, եւ չոգաւ առ ոմն ոդողոմացի որում անուն էր Իրաս:
2. Եւ ետես անդ Յուդա զդուստր առն Քանանացւոյ, որում անուն էր Շաւա. եւ առ զնա իւր կին. եւ եմուտ առ նա:
3. Յղացաւ եւ ծնաւ որդի. եւ կոչեաց զանուն նորա` Էր:
4. Յղացաւ դարձեալ եւ ծնաւ որդի. եւ կոչեաց զանուն նորա Աւնան:
5. Եւ յաւել դարձեալ ծնաւ որդի. եւ կոչեաց զանուն նորա Սելովմ. եւ նա էր ի Քասբի յորժամ ծնաւ զնոսա:
6. Եւ առ Յուդա կին Էրայ անդրանկին իւրում, որում անուն էր Թամար:
7. Եւ եղեւ Էր` անդրանիկն Յուդայ` չար առաջի Տեառն. եւ սպան զնա Աստուած:
8. Եւ ասէ Յուդա ցԱւնան. Մուտ առ կին եղբաւր քոյ, եւ ամուսնասցիս ընդ նմա. եւ յարուսցես ցաւակ եղբաւր քում:
9. Իբրեւ գիտաց Աւնան թէ ոչ լինի նմա զաւակն. լինէր յորժամ մտանէր առ կին եղբաւր իւրոյ, հեղոյր զսերմն յերկիր, չտալ զաւակ եղբաւրն իւրում:
10. Եւ չար թուեցաւ առաջի Աստուծոյ գործն զոր արար, եւ սպան եւ զնա եւս:
11. Եւ ասէ Յուդա ցԹամար նու իւր. Նիստ այրի ի տան հաւր քոյ` մինչչեւ եղիցի մեծ Սելովմ որդի իմ. զի ասէր` թէ գուցէ եւ նա եւս մեռանիցի որպէս եւ եղբարքն նորա: Գնաց Թամար` եւ նստաւ ի տան հաւր իւրոյ:
12. Բազմացան աւուրքն. եւ մեռաւ դուստրն Շաւայ` կին Յուդայ: Մխիթարեցաւ Յուդա` եւ գնաց ի կտուրս խաշանց իւրոց, ինքն եւ Իրաս հովիւ իւր Ոդողոմացի ի Թամնա:
13. Ազդ եղեւ Թամարայ նուոյ նորա եւ ասեն. Ահա սկեսրայր քո ելանէ ի Թամնա` կտրել զխաշինս իւր:
14. Եւ եհան զհանդերձս այրութեան իւրոյ յինքենէ. արկաւ տեռ` եւ զարդարեցաւ. եւ նստաւ առ դրան Ենանու յանցս Թամնայ: Զի ետես եթէ մեծ եղեւ Սելովմ. եւ նա ոչ տայր զնա նմա կին:
15. Իբրեւ ետես զնա Յուդա` համարեցաւ թէ բոզ իցէ. քանզի ծածկեալ էր զերեսս իւր` եւ ոչ ծանեաւ զնա:
16. Խոտորեցաւ առ նա ի ճանապարհէ անտի` եւ ասէ. Թոյլ տուր ինձ մտանել առ քեզ. զի ոչ ծանեաւ թէ նուն նորա իցէ: Եւ նա ասէ. Զի՞նչ տացես ինձ եթէ մտանիցես առ իս:
17. Եւ ասէ` Ես տաց ածել քեզ ուլ այծեաց ի խաշանց իմոց: Եւ նա ասէ. Թէ տաս գրաւական մինչչեւ տացես ածել:
18. Եւ նա ասէ` Զի՞նչ գրաւական տաց քեզ. եւ ասէ` զմատանիդ եւ զգինդդ, եւ զգաւազանդ որ ի ձեռին քում: Եւ եմուտ առ նա. եւ յղացաւ ի նմանէ,
19. եւ յարեաւ գնաց: Եւ եհան ի բաց զձորձն իւր յինքենէ. եւ զգեցաւ զհանդերձն այրութեան իւրոյ:
20. Եւ առաքեաց Յուդա ուլ այծեաց` ի ձեռն հովուին իւրոյ Ոդողոմացւոյ առնուլ զգրաւականն ի կնոջէ անտի, եւ ոչ եգիտ զնա:
21. Եհարց զարս տեղւոյն եւ ասէ ցնոսա. Ու՞ր է բոզն որ էր Յենան ի վերա ճանապարհիս:
22. Եւ ասեն. Չէր աստ ուրեք բոզ: Եւ դարձաւ առ Յուդա, եւ ասէ` Ոչ գտի: Եւ արք տեղւոյն ասեն` թէ Չիք աստ բոզ:
23. Ասէ Յուդա. Նմա լիցի այն. այլ զի մի ծաղր կացցուք, ես ետու տանել զուլդ, եւ դու ոչ գտեր:
24. Եւ եղեւ յետ երից ամսոց, ազդ եղեւ Յուդայ եւ ասեն. Պոռնկեցաւ նու քո Թամար, եւ ահա յղի է ի պոռնկութենէ: Եւ ասէ Յուդա. Հանէք զնա արտաքս, եւ այրեսցի:
25. Եւ մինչդեռ տանէին զնա, առաքեաց առ սկեսրայրն իւր` եւ ասէ. Յառնէ` ոյր այդ գրաւականք են` յղի եմ ես: Եւ ասէ` Ծանիր ո՞յր իցէ մատանիդ` գինդդ` եւ գաւազանդ:
26. Ծանեաւ Յուդա` եւ ասէ. Արդարացեալ է նա քան զիս. զի ոչ ետու զնա որդւոյ իմում Սելովմայ: Եւ ոչ եւս յաւել գիտել զնա:
27. Եւ եղեւ իբրեւ ծնանէր. եւ էին երկու որդիք յորովայնի նորա: Եւ եղեւ ի ժամանակի ծննդեան նորա, մին յառաջագոյն եհան զձեռն իւր. եւ առ ծնուցիչն` կապեաց կարմիր ի ձեռին նորա.
28. Եւ ասէ, Նախ սա եկեսցէ:
29. Իբրեւ ամփոփեաց զձեռն անդրէն. եկն` ել վաղվաղակի եղբայր նորա: Եւ նա ասէ. Զի՞ է զի խրամատեցաւ վասն քո ցանգ. եւ կոչեաց զանուն նորա Փարէս:
30. Եւ յետոյ եկն ել եղբայր նորա, յորոյ ձեռին կապեալ էր զկարմիրն: Եւ կոչեաց զանուն նորա Զարա:
Հաղորդում կայքում սխալի վերաբերյալ
Տվյալ հատվածում առկա է սխալ: