Գլուխ 49

   
1. Կոչեաց Յակոբ զորդիսն իւր եւ ասէ. Ժողովեցարուք, զի պատմեցից ձեզ ինչ որ պատահիցէ ձեզ ի վախճանի աւուրց:
2. Ժողովեցարուք եւ լուարուք որդիք Յակոբայ. լուարուք Իսրայէլի հաւր ձերում:
3. Ռոբէն անդրանիկ իմ. դու զաւրութիւն իմ եւ սկիզբն որդւոց իմոց: Խստութեամբ գնացեր. եւ խստութեամբ յանդիմանութեամբ թշնամանեցեր:
4. Իբրեւ զջուր մի եռասցիս. զի ելեր յանկողինս հաւր քոյ, յայնժամ պղծեցեր զանկողինս յոր ելեր:
5. Շմաւոն եւ Ղեւի եղբարք. կատարեցին զանիրաւութիւն ի կամաց իւրեանց:
6. Ի խորհուրդս նոցա մի մտցէ անձն իմ, եւ ժողովս նոցա ոչ հաճեսցին միտք իմ. զի սրտմտութեամբ իւրեանց սպանին զարս, եւ ցանկութեամբ իւրեանց կարթակոտոր արարին զցուլս:
7. Անիծեալ սրտմտութիւն նոցա` զի յանդուգն էր, եւ ոխութիւն նոցա` զի խիստ էր. բաժանեցից զնոսա ի մէջ Յակոբայ. եւ ցրուեցից զնոսա ի մէջ Իսրայէլի:
8. Յուդա` զքեզ աւրհնեսցեն եղբարք քո: Ձեռն քո ի վերայ թիկանց թշնամեաց քոց. երկիր պագցեն քեզ որդիք հաւր քոյ:
9. Կորիւն առիւծու Յուդա. ի շառաւեղէ ելեր որդեակ իմ, ելեր բազմեցար, ննջեցեր իբրեւ զաձեւծ, եւ իբրեւ զկորիւն առիւծու. ո յարուցանէ զնա:
10. Մի պակասեսցէ իշխան Յուդայ, եւ մի պետ յերանաց նորա. մինչչեւ եկեսցէ նա որոյ իւրն է հանդերձեալքն. եւ նա է ակնկալութիւն հեթանոսաց:
11. Կապեսցէ զորթոյ զյաւանակ իւր, եւ զգնդակէն զյաւանակ իշոյն. լուասցէ գինւով զպատմուճան իւր, եւ արեամբ խաղողոյ զհանդերձս իւր:
12. Զուարթագին են աչք նորա ի գինւոյ. եւ սպիտակ ատամունք իւր քան զկաթն:
13. Զաբողոն` յեզերս ծովու բնակեսցէ, եւ ինքն նաւահանգիստ նաւաց. եւ ձգեսցէ մինչչեւ ի Սիդոն:
14. Իսաքար` բարւոյ ցանկացաւ, հանդուցեալ ի մէջ վիճակաց:
15. Տեսեալ զհանգիստն զի գեղեցիկ էր, եւ զերկիրն` զի պարարտ էր, եդ զուս իւր յաշխատել. եւ եղեւ այր արդիւնարար:
16. Դան` դատեսցէ զժողովուրդ իւր իբրեւ զմի այր ի մէջ Իսրայէլի.
17. Եւ եղիցի Դան` աւձ դարանակալ ի ճանապարհի, հարկանել զգարշապար երիվարի. եւ ընկենուլ զհեծեալն յետս,
18. եւ մնալ փրկութեան Տեառն:
19. Գադ` հինի ելցէ. եւ ինքն ելցէ հինիւ զհետ նոցա:
20. Ասերայ` պարարտ հաց իւր. եւ ինքն տացէ կերակուր իշխանաց:
21. Նեփթաղիմ ծառ բարձրացեալ, աճեցուցանել արմտեաւք, զգեցուցանել արմտեաւք զգեղեցկութիւն:
22. Որդեակ աճեցեալ Յովսէփ. որդեակ` աճեցեալ նախանձելի. որդեակ իմ մատաղ առ իս դարձիր. զոր բանտարկուքն բամբասէին,
23. եւ դատափետ առնէին: Եւ ոխանային ընդ նմա արք աղեղանց.
24. եւ փշրեցան զաւրութեամբ աղեղունք իւրեանց, եւ լուծան ջիլք բազկաց նոցա ձեռամբ հզաւրին Յակոբայ: Անտի որ զաւրացոյց զԻսրայէլ,
25. յԱստուծոյ հաւրն քոյ, եւ աւգնեաց քեզ Աստուած իմ. եւ աւրհնեաց զքեզ յաւրհնութիւն երկնից ի վերուստ. եւ զաւրհնութիւն երկրի` լի ամենայնիւ. վասն աւրհնութեանց ստեանց եւ արգանդի
26. աւրհնութեանց հաւր քոյ եւ մաւր քոյ. որ զաւրացան քան զաւրհնութիւնս լերանց մշտնջենաւորաց, եւ քան զաւրհնութիւնս բլրոց յաւիտենականաց. եղիցին ի վերայ գլխոյ Յովսէփու, եւ ի վերայ գլխոց եղբարցն որոց առաջնորդեաց:
27. Բենիամին` գայլ յափշտակաւղ, զայդունն դեռեւս ուտիցէ. եւ առ երեկս բաշխեսցէ կերակուրս:
28. Ամենեքեան սոքա որդիք Յակոբայ` ազգք երկոտասան. եւ այս է զոր խաւսեցաւ ընդ նոսա հայրն իւրեանց, եւ աւրհնեաց զնոսա: Իւրաքանչիւր ըստ աւրհնութեան իւրում
29. աւրհնեաց զնոսա: Եւ պատուիրեաց նոցա, եւ ասէ ցնոսա. Ես յաւելում առ ժողովուրդ իմ: Թաղեցէք զիս ընդ հարս իմ յայրի անդ` որ է յագարակին Եփրոնի Քետացւոյ. յայրին որ յանդի անդ է ի կրկնում,
30. յանդիման Մամբրէի յերկրին Քանանացւոց` զոր ստացաւ Աբրաամ յԵփրոնէ Քետացւոյ ի ստացուածս շիրմի:
31. Անդ թաղեցին զԱբրաամ եւ զՍառա կին նորա: Անդ թաղեցին զԻսահակ եւ զՌեբեկա կին նորա: Անդ թաղեցին զԼիա ի ստացուածի ագարակին եւ այրին որ է ի նմա առ ի յորդւոցն Քետայ:
32. Եւ դադարեաց Յակոբ ի պատուիրելոյ որդւոցն իւրոց: Եւ առեալ զոտսն իւր անդէն ի մահիճսն` պակասեաց. եւ յաւելաւ առ ժողովուրդ իւր: