1. Եւ սովն եւս քան զեւս սաստկանայր ի վերայ երկրին:
2. Եւ եղեւ իբրեւ սպառեցին ուտել զցորեանն զոր բերին յերկրէն Եգիպտացւոց, ասէ ցնոսա հայրն իւրեանց. Դարձեալ երթայք գնեցէք սակաւ մի կերակուր:
3. Խաւսեցաւ ընդ նմա Յուդա` եւ ասէ. Վկայութեամբ եդ ընդ մեզ վկայութիւն այրն` եւ ասէ. Մի տեսանիցէք զերեսս իմ, եթէ ոչ եղբայրն ձեր կրտսեր ընդ ձեզ իցէ:
4. Արդ` եթէ արձակես զեղբայրդ մեր ընդ մեզ` իջցուք եւ գնեսցուք կերակուրս:
5. Ապա թէ ոչ արձակես զեղբայրդ մեր ընդ մեզ, ոչ երթիցուք. զի այրն խաւսեցաւ ընդ մեզ` եւ ասէ. Մի տեսանիցէք զերեսս իմ` եթէ ոչ եղբայրն ձեր կրտսեր ընդ ձեզ իցէ:
6. Եւ ասէ Իսրայէլ. Զի՞նչ չարիս հասուցէք ի վերայ իմ. զի՞ պատմեցէք առնն թէ գուցէ ձեր եղբայր:
7. Եւ նոքա ասեն` Հարցանելով եհարց զմէնջ այրն, եւ զազդէ մերմէ, եւ թէ տակաւին կենդանի՞ իցէ հայրն ձեր, եւ եթէ իցէ՞ ձեր եղբայր. եւ պատմեցաք նմա ըստ հարցանելոյն նորա. մի թէ գիտէա՞ք թէ ասելոց է ցմեզ` Ածէք զեղբայրն ձեր:
8. Ասէ Յուդա ցԻսրայէլ հայրն իւր. Արձակեա ընդ իս զպատանեակդ, եւ յարուցեալ գնասցուք. զի կեցցուք եւ մի մեռցուք, եւ մեք եւ դու, եւ ստացուածք մեր:
9. Ես առնում զդա յերաշխի. ի ձեռաց իմոց խնդրեսջիր զդա. եթէ ոչ ածից զդա եւ կացուցից առաջի քո, յանցաւոր եղէց զամենայն աւուրս:
10. Զի եթէ ոչ էաք յամեալ, արդ` երկիցս իսկ դարձեալ էր այսրէն:
11. Ասէ ցնոսա Իսրայէլ հայրն իւրեանց. Եթէ այդպէս իցէ, արարէք զայդ: Առէք ի պտղոյ երկրիս յամանս ձեր, եւ տարայք առնն պատարագս. ռետին, եւ մեղր, եւ խունկ, եւ ստաշխն, եւ բեւեկն, եւ ընկոյզ:
12. Եւ արծաթ կրկին առէք ի ձեռս ձեր. զարծաթն որ դարձաւ յամանս ձեր` տարայք ընդ ձեզ. գուցէ ընդ խաբս ինչ իցէ:
13. Եւ զեղբայրդ ձեր առէք, եւ արիք իջէք առ այրն:
14. Եւ Աստուած իմ տացէ ձեզ շնորհս առաջի առնն, եւ արձակեսցէ ընդ ձեզ զեղբայրն ձեր զմեւս, եւ զԲենիամին: Բայց ես` որպէս անզաւակեցայ անզաւակեցայ:
15. Եւ առեալ արանցն զպատարագսն, եւ արծաթ կրկին ի ձեռս իւրեանց, եւ զԲենիամին. յարուցեալ իջին յԵգիպտոս, եւ կացին յանդիման Յովսէփայ:
16. Իբրեւ ետես զնոսա Յովսէփ, եւ զԲենիամին եղբայր իւր, ասէ զհազարապետ տանն իւրոյ. Տար զարսդ ի տուն, եւ զեն զենլիս եւ պատրաստեա. զի ընդ իս ուտելոց են արքդ այդոքիկ ի միջաւրէի:
17. Եւ արար այրն որպէս եւ ասաց Յովսէփ. եւ տարաւ զարսն ի տուն Յովսէփայ:
18. Եւ տեսեալ արանցն եթէ տարան զնոսա ի տուն Յովսէփայ, ասեն. Վասն արծաթոյն որ դարձաւ յամանս մեր զառաջինն, մտանեմք անդր, առ ի խուզելոյ զմեզ. արկանել ի վերայ մեր, եւ առնուլ զմեզ ի ծառայս, եւ զէշս մեր:
19. Մատուցեալ առ այրն` վերակացու տանն Յովսէփայ,
20. խաւսեցան առ դրանն` եւ ասեն. Աղաչեմք զքեզ Տէր. իջաք զառաջինն դնել կերակուրս:
21. Եւ եղեւ իբրեւ հասաք յիջավանս, եւ բացաք զամանս մեր. եւ արծաթ իւրաքանչիւր յամանի իւրում էր. արդ` զարծաթն այսրէն կշռով դարձուցաք, եւ աւասիկ ի ձեռին մերում է:
22. Եւ այլ արծաթ բերաք ընդ մեզ, գնել կերակուրս. եւ ոչ գիտեմք ով եդ զարծաթն յամանս մեր:
23. Ասէ ցնոսա. Խաղաղութիւն ընդ ձեզ` մի երկնչիք: Աստուածն ձեր եւ հարցն ձերոց` եդ ձեզ զգանձս յամանս ձեր. այլ իմ զձեր արծաթն առեալ, եւ հաճեալ եմ: Եւ եհան առ նոսա զՇմաւոն:
24. Եւ տարաւ ի ներքս այրն զորեարն ի տուն Յովսէփայ, եւ բերին ջուր լուանալ զոտս նոցա. եւ ետ կերակուր գրաստուց նոցա:
25. Եւ նոքա պատրաստեցին զպատարագսն մինչ չեւ եկեալ էր Յովսէփ ի միջաւրէին. քանզի լուան թէ անդ ճաշակելոց է:
26. Եմուտ Յովսէփ ի տուն. եւ մատուցին նմա զընծայսն զոր ունէին ի ձեռս իւրեանց` ի տան անդ. եւ երկիր պագին նմա ի վերայ երասաց իւրեանց յերկիր:
27. Եհարց զնոսա եւ ասէ. Զիա՞րդ կայք: Եւ ասէ ցնոսա. Թէ ո՞ղջ իցէ հայրն ձեր ծերունի, զորմէ ասացէք թէ տակաւին կենդանի է:
28. Եւ նոքա ասեն` Ողջ է ծառայ քո հայր մեր, տակաւին կենդանի է: Եւ ասէ` 0րհնեալ է այրն այն յԱստուծոյ: Եւ խոնարհեցան երկիր պագին նմա:
29. Ամբարձ զաչս իւր` եւ ետես զԲենիամին զեղբայր իւր զհամամայր` եւ ասէ. Ա՞յդ է եղբայրն ձեր կրտսեր` զորմէ ասացէք ածել առ իս: Եւ ասէ. Աստուած ողորմեսցի քեզ որդեակ:
30. Եւ խռովեցաւ Յովսէփ` եւ գալարէին աղիք նորա ի վերայ եղբաւրն իւրոյ. եւ խնդրէր լալ: Մտեալ ի սենեակ անդր ելաց.
31. եւ լուացեալ զերեսս իւր` ել. պնդեաց զանձն, եւ ասէ` Արկէք հաց:
32. Եւ արկին նմա միայնոյ` եւ նոցա իւրաքանչիւր ումեք, եւ Եգիպտացւոցն որ ճաշէին ընդ նմա` իւրաքանչիւր առանձինն. զի ոչ կարէին Եգիպտացիքն ուտել հաց ընդ Եբրայեցիսն, քանզի գարշելի էին Եգիպտացւոցն:
33. Նստաւ առաջի նորա անդրանիկն` ըստ երիցութեան իւրում, եւ կրտսերն` ըստ կրտսերութեան իւրում. եւ զարմացեալ էին արքն իւրաքանչիւր ընդ եղբաւր իւրում:
34. Եւ առին իւրեանց մասունս ի նմանէ. եւ մեծացաւ մասն Բենիամինի քան զմասունս ամենեցուն հինգպատիկ քան զնոցայն: Արբին` եւ արբեցան ընդ նմա:
Հաղորդում կայքում սխալի վերաբերյալ
Տվյալ հատվածում առկա է սխալ: