1. Չուեաց Իսրայէլ ինքն` եւ ամենայն որ ինչ իւր էր. եւ եկն ի ջրհորն երդման. եւ մատոյց պատարագ Աստուծոյ հաւր իւրոյ Իսահակայ:
2. Խաւսեցաւ Աստուած ընդ Իսրայէլի ի տեսլեան գիշերոյ. եւ ասէ. Յակոբ Յակոբ: Եւ նա ասէ. Ո՞վ ես:
3. Ասէ` Ես եմ Աստուած հարցն քոց. մի երկնչիր իջանել յԵգիպտոս, զի յազգ մեծ արարից զքեզ անդ:
4. Ես իջից ընդ քեզ յԵգիպտոս, եւ ես հանից զքեզ ի սպառ. եւ Յովսէփ դիցէ զձեռս իւր ի վերայ աչաց քոց:
5. Յարեաւ Յակոբ ի ջրհորոյ անտի երդման. եւ առին որդիքն Իսրայէլի զՅակոբ հայրն իւրեանց. Եւ զկազմած, եւ զկանայս իւրեանց, ի սայլսն զոր առաքեաց Յովսէփ առնուլ զնա: Եւ առեալ զինչս իւրեանց.
6. եւ զամենայն ստացուածս զոր ստացան յերկրին Քանանացւոց, մտին յԵգիպտոս Յակոբ եւ ամենայն զաւակ նորա ընդ նմա:
7. Որդիք նորա, եւ որդիք որդւոց նորա ընդ նմա. դստերք նորա, եւ դստերք դստերաց նորա: Եւ զամենայն զաւակ իւր ած յԵգիպտոս:
8. Եւ այս են անուանք որդւոցն Իսրայէլի որ մտին յԵգիպտոս: Յակոբ եւ որդիք իւր: Անդրանիկ Յակոբու` Ռոբէն:
9. Եւ որդիք Ռոբինի` Ենոք, եւ Փաղղուս, Սարսոն, եւ Քարմի:
10. Եւ որդիք Շմաւոնի, Յամուէլ, եւ Յամին, եւ Ահովդ, եւ Յաքին, եւ Սահառ, եւ Սաւուղ որդի Քանանացւոյն:
11. Եւ որդիք Ղեւեայ, Գեթսոն, եւ Կահաթ, եւ Մերարի:
12. Եւ որդիք Յուդայի` Էր, եւ Աւնան, եւ Սելովմ, եւ Փարէս, եւ Զարա: Եւ մեռան Էր եւ Աւնան յերկրին Քանանացւոց: Եւ եղեն որդիք Փարէսի` Ասրովմ, եւ Յամուէլ:
13. Եւ որդիք Իսաքարայ, Թովղա, եւ Փուդ, եւ Յասուբ, եւ Զամամ:
14. Եւ որդիք Զաբուղոնի, Սերեդ, եւ Աղղոն, եւ Էէլ:
15. Սոքա են որդիք Լիայ` զոր ծնաւ Յակոբ ի Միջագետս Ասորոց, եւ զԴինա դուստր նորա: Ամենայն ոգիք ուստերք եւ դստերք երեսուն եւ երեք:
16. Եւ որդիք Գադայ, Սափոն, եւ Մեդիս, եւ Սաւնիա, եւ Թաւսոբամ, եւ Այեդիս, եւ Արոյէլիս, եւ Արիէլիս:
17. Եւ սոքա են որդիք Ասերայ, Յեմնա, եւ Յէուսա, եւ Յէուլ, եւ Բարիա, եւ Սարա քոյր նոցա: Եւ որդիք Բարիայ` Քոբոր, եւ Մեղքիէլ:
1. Սոքա են որդիք Զելփայ, զոր ետ Լաբան Լիայ դստերն իւրում, որ ծնաւ զսոսա Յակոբայ, վեշտասան որդիս:
19. Եւ որդիք Ռաքելայ կնոջ Յակոբայ` Յովսէփ, եւ Բենիամին:
20. Եւ եղեն որդիք Յովսէփայ յերկրին Եգիպտացւոց, զորս ծնաւ նմա Ասանէթ դուստր Պետափրեայ քրմի Արեգ քաղաքի. զՄանասէ եւ զԵփրեմ: Եւ եղեն որդիք Մանասէի զոր ծնաւ նմա հարճն Ասորի, զՄաքիր. եւ Մաքիր ծնաւ զԳաղաադ: Եւ որդիք Եփրեմի եղբաւրն Մանասէի, Սուտաղաամ, եւ Տաամ. եւ որդի Սուտաղաամայ, Եդեմ:
21. Եւ որդիք Բենիամինի` Բաղա, եւ Բոքոր, եւ Ասբէէ. եւ եղեն որդիք Գէէրա, եւ Նէէման, եւ Անաքիս, եւ Ռովս, եւ Մամփիմ, եւ Ոփիմին: Եւ Դեերա ծնաւ Զարադ:
22. Սոքա են որդիք Ռաքելի` զոր ծնաւ Յակոբայ. ամենայն ոգիք ութ եւ տասն:
23. Եւ որդիք Դանայ` Ասոմ:
24. Եւ որդիք Նեփթաղեմի, Ասիէլ, եւ Գովնի, եւ Ասաար, եւ Սիլիմ:
25. Սոքա են որդիք Բալլայ` զոր ետ Լաբան Ռաքելի դստեր իւրում. եւ ծնաւ զսոսա Յակոբայ. ամենեքին ոգիք եւթն:
26. Եւ ամենայն ոգիք որ մտին ընդ Յակոբայ յԵգիպտոս, որ ելեալ էին յերանաց նորա, առանց կանանց որդւոցն Յակոբայ, ամենայն ոգիք վաթսուն եւ վեց:
27. Եւ որդիք Յովսէփայ որ եղեն նմա յԵգիպտոս, ոգիք երկու: Եւ ամենայն ոգիք տանն Յակոբու` որ մտին յԵգիպտոս եւթանասուն եւ հինգ:
28. Եւ զՅուդա յառաջագոյն առաքեաց առ Յովսէփ, գալ նմա ընդ առաջ զքաջաց քաղաքաւն, յերկիրն Ռամեսա. եւ ինքն եկն յերկիրն Գեսեմ:
29. Կազմեաց Յովսէփ զկառս իւր, եւ ել ընդառաջ Իսրայէլի հաւր իւրոյ, զքաջաց քաղ
30. Եւ ասէ Իսրայէլ ցՅովսէփ. Մեռայց այսուհետեւ. որովհետեւ տեսի զերեսս քո` զի տակաւին կենդանի ես:
31. Եւ ասէ Յովսէփ ցեղբարսն իւր` եւ ցտուն հաւր իւրոյ. Երթայց պատմեցից փարաւոնի, եթէ եղբարք իմ եւ տուն հաւր իմոյ որ էին յերկիրն Քանանացւոց, եկին առ իս:
32. Եւ արք հովիւք են, եւ արք խաշնադարմանք են, եւ զանասուն, եւ զարջառ, եւ զամենայն ինչ իւրեանց ածին այսր:
33. Արդ` եթէ կոչիցէ զձեզ փարաւոն` եւ ասիցէ, Զի՞նչ գործ է ձեր.
34. ասասջիք եթէ արք խաշնադարմանք եմք ծառայք քո ի մանկութենէ մինչչեւ ցայժմ. եւ մեք եւ հարք մեր: Զի բնակիցէք յարկրին Գեսեմ: Զի գարշելի է Եգիպտացւոց` ամենայն հովիւ խաշանց:
Հաղորդում կայքում սխալի վերաբերյալ
Տվյալ հատվածում առկա է սխալ: