Գլուխ 35

   
1․ Եւ ասէ Աստուած ցՅակոբ. Արի անց ի տեղին ի Բեթէլ. եւ անդ բնակեսցես. եւ արասցես անդ սեղան Աստուծոյ որ երեւեցաւն քեզ ի փախչելն քո յերեսաց Եսաւայ եղբաւր քոյ:

2․ Եւ ասէ Յակոբ ցընտանիսն իւր, եւ ցամենասին որ ընդ նմա էին. ի բաց առէք զաստուածսդ աւտարոտիս որ ընդ ձեզ են ի միջոյ ձերմէ, եւ սրբեցարուք. եւ փոխեցէք զպատմուճանս ձեր:

3․ Եւ յարուցեալ ելցուք ի Բեթէլ, եւ արասցուք անդ սեղան Աստուծոյ. որ լուաւ ինձ յաւուր նեղութեան, որ էր ընդ իս. եւ ապրեցոյց զիս ի ճանապարհին` զոր գնացի:

4․ Եւ ետուն ցՅակոբ զաստուածսն աւտարոտիս որ էին ի ձեռս նոցա, եւ զգինդս որ յականջս իւրեանց: Եւ ծածկեաց զնոսա Յակոբ ի ներքոյ բեւեկնոյն ի Սիկիմ, եւ կորոյս զնոսա մինչչեւ ցայսաւր ժամանակի:

5․ Եւ չուեաց Իսրայէլ ի Սիկիմայ. եւ եղեւ ահ Աստուծոյ ի վերայ քաղաքացն որ շուրջ զնովաւ. եւ ոչ ելին զհետ որդւոցն Իսրայիլի:

6․ Եւ եկն Յակոբ ի Լուզ` որ է յերկրին Քանանացւոց, այն ինքն է Բեթէլ, ինքն եւ ամենայն ժողովուրդն որ ընդ նմա:

7․ Եւ շինեաց անդ սեղան. եւ կոչեաց զանուն տեղւոյն այնորիկ Բեթէլ. զի անդ երեւեցաւ նմա Աստուած ի փախչել նորա յերեսաց Եսաւայ եղբաւր իւրոյ:

8․ Եւ մեռաւ Դէբովրա դայեկն Ռեբեկայ, եւ թաղեցաւ ի ներքոյ Բեթելայ ընդ կաղնեաւն. եւ կոչեաց զանուն նորա Կաղնի սգոյ:

9․ Եւ երեւեցաւ Աստուած Յակոբայ` մինչդեռ անդ էր ի Լուզ. յորժամ եկն ի Միջագետաց Ասորոց: Եւ աւրհնեաց զնա Աստուած:

10․ Եւ ասէ ցնա Աստուած. Անուն քո Յակոբ` ոչ եւս կոչեսցի Յակոբ, այլ Իսրայէլ եղիցի անուն քո. եւ կոչեաց զանուն նորա Իսրայէլ:

11․ Եւ ասէ ցնա Աստուած` Ես եմ Աստուած քո բաւական. աճեսջիր եւ բազմասջիր. ազգք եւ ժողովուրդք ազգաց եղիցին ի քէն, եւ թագաւորք յերանաց քոց ելցեն:

12․ Եւ զերկիրդ զոր ետու Աբրաամու եւ Սահակայ` քեզ տաց զդա, քեզ եղիցի, եւ զաւակի քում յետ քո տաց զերկիրդ զայդ:

13․ Եւ վերացաւ ի նմանէ Աստուած ի տեղւոջէն` ուր խաւսեցաւ ընդ նմա:

14․ Եւ կանգնեաց Յակոբ արձան ի տեղւոջն ուր խաւսեցաւ ընդ նմա, արձան քարեղէն. եւ նուիրեաց ի նմա նուէրս. եւ արկ ի վերայ նորա եւղ:

15․ Եւ կոչեաց զանուն տեղւոյն ուր խաւսեցաւ ընդ նմա Աստուած` Բեթէլ:

16․ Եւ չուեաց ի Բեթելայ: Եւ եղեւ իբրեւ մերձեցաւ ի Քաբրաթա երկիր, մտանել յԵփրաթա, ծնաւ Ռաքէլ:

17․ Եւ դժուարածին եղեւ ի ծննդեանն. եւ եղեւ ի վշտանալն նորա ի ծննդեանն, եւ ասէ ցնա ծնուցիչն` քաջալերեաց, զի եւ այդ եւս քո ուստր է:

18․ Եւ եղեւ ընդ հանել ոդւոցն, քանզի մեռաւ, կոչեաց զանուն նորա որդի վշտաց իմոց. եւ հայրն կոչեաց զնա Բենիամին:

19․ Մեռաւ Ռաքէլ` եւ թաղեցաւ ի ճանապարհին Եփրաթայ. այն իսկ է Բեթղահէմ:

20․ Եւ կանգնեաց Յակոբ արձան ի վերայ շիրմին նորա, այն է արձան շիրմի Ռաքելայ մինչչեւ ցայսաւր ժամանակի:

21․ Եւ` չուեաց Իսրայէլ` եւ էհար զխորան իւր յայնկոյս աշտարակին Ղադերայ:

22․ Եւ եղեւ իբրեւ բնակեաց Իսրայէլ յերկրին յայնմիկ. գնաց Ռոբէն` եւ ննջեաց ընդ Բալլայ հարճի հաւր իւրոյ. լուաւ Իսրայէլ` եւ չար թուեցաւ առաջի նորա: Եւ էին որդիք Յակոբայ երկոտասանք:

23․ Որդիք Լիայ` անդրանիկ Յակոբայ` Ռոբէն. Շմաւոն. Ղեւի. Յուդայ. Իսաքար. Զաբողոն:

24․ Եւ որդիք Բալլայ նաժշտի Ռաքելայ` Դան, եւ Նեփթաղիմ:

25․ Եւ որդիք Զելփա նաժշտին Լիայ` Գադ եւ Ասեր:

26․ Եւ որդիք Ռաքելի` Յովսէփ եւ Բենիամին: Այս են որդիք Յակոբայ. որ եղեն նմա ի Միջագետս Ասորւոց:

27․ Եւ եկն Յակոբ առ Իսահակ հայր իւր ի Մամբրէ` ի քաղաք դաշտին. այն ¨ Քեբրոն, յերկրին Քանանացւոց, ուր պանդխտեցան Աբրաամ եւ Իսահակ:

28․ Եւ եղեն ամենայն աւուրք Իսահակայ` զոր եկեաց. ամք հարիւր ութսուն:

29․ Եւ պակասեալ Իսահակայ մեռաւ, եւ յաւելաւ յազգ իւր. ծերացեալ եւ լի աւուրբք: եւ թաղեցին զնա Եսաւ եւ Յակոբ որդիք իւր: