1. Եւ եղեւ յետ բանիցս այսոցիկ` ազդ եղեւ Յովսէփայ` եթէ Յակոբ հայրն քո նեղեալ է: Եւ առեալ Յովսէփայ զերկուս որդիսն իւր ընդ իւր, զՄանասէ եւ զԵփրեմ, եկն առ Յակոբ: Ազդ եղեւ Յակոբայ` եւ ասեն.
2. Ահա որդի քո Յովսէփ գայ առ քեզ. եւ զորացաւ Իսրայէլ` եւ նստաւ ի մահիճս:
3. Եւ ասէ Յակոբ ցՅովսէփ. Աստուած իմ երեւեցաւ ինձ ի լուզ` յերկրին Քանանացւոց. աւրհնեաց զիս.
4. եւ ասէ. Ահա ես աճեցուցից զքեզ, եւ բազմացուցից զքեզ, եւ արարից զքեզ ի ժողովս ազգաց. եւ տաց քեզ զերկիրս զայս ի ժառանգութիւն յաւիտենական:
5. Արդ` երկու որդիք քո որ եղեն յԵգիպտոս, մինչ չեւ եկեալ էր իմ յԵգիպտոս` իմ են, Եփրեմ եւ Մանասէ. իբրեւ զՌոբէնն եւ զՇմաւոն եղիցին ինձ:
6. Եւ այլ ծնունդք զոր ծնանիցիս յետ այսորիկ` քեզ եղիցին. յանուն եղբարց իւրեանց կոչեսցին ի նոցա ժառանգութիւնս:
7. Եւ ես յորժամ գայի ի Միջագետաց Ասորւոց, մեռաւ մայր քո Ռաքէլ յերկրին Քանանացւոց. ի մերձենալ ինձ յասպարէզ երկրին Քաբրաթայ, ի գալն յԵփրաթայ. եւ թաղեցի զնա յերկրի Ասպարիսին. այն է Բեթղահէմ:
8. Իբրեւ ետես Իսրայէլ զորդիսն Յովսէփու` ասէ. Զի՞նչ են սոքա քո:
9. Ասէ Յովսէփ ցհայրն իւր. Որդիք իմ են զոր ետ ինձ Աստուած աստ: Եւ ասէ Յակոբ. Մատո առ իս զդոսա, զի աւրհնեցից զդոսա:
10. Եւ աչք Իսրայէլի ծանրացեալ էին ի ծերութենէ անտի. եւ ոչ կարէր տեսանել: Եւ մատոյց զնոսա առ նա. եւ համբուրեաց զնոսա, եւ ի գիրկս իւր առ զնոսա:
11. Եւ ասէ Իսրայէլ ցՅովսէփ. Ահա յերեսաց քոց ոչ կարաւտ եղէ. եւ եցոյց եւս ինձ Աստուած զզաւակ քո:
12. Եւ եհան զնոսա Յովսէփ ի ծնդաց նորա. եւ երկիր պագին նմա ի վերայ երեսաց իւրեանց յերկիր:
13. Եւ առեալ Յովսէփայ զերկուս որդիսն իւր. զԵփրեմ ընդ աջմէ, ի ձախմէ Իսրայէլի. եւ զՄանասէ ի ձախմէ` յաջմէ Իսրայէլի. մատոյց զնոսա առ նա:
14. Եւ ձգեալ Իսրայէլի զաջ ձեռն իւր` արկ զգլխովն Եփրեմի, եւ նա էր կրտսեր. եւ զձախն զգլխովն Մանասէի, եւ փոփոխեաց զձեռսն, զի Մանասէ էր Անդրանիկ:
15. Եւ աւրհնեաց զնոսա եւ ասէ. Աստուած, որում հաճոյ եղեն հարքն իմ առաջի նորա Աբրաամ եւ Իսահակ. Աստուած որ կերակրէ զիս ի մանկութենէ իմմէ մինչչեւ ցայսաւր:
16. Հրեշտակն որ փրկեաց զիս յամենայն չարեաց. աւրհնեսցէ զմանկունս զայսոսիկ, եւ կոչեսցի ի սոսա անուն իմ եւ անուն հարց իմոց, Աբրաամու եւ Սահակայ. եւ աւրհնեսցին ի բազմութիւն յոյժ ի վերայ երկրի:
17. Եւ տեսեալ Յովսէփայ եթէ արկ հայրն զաջ իւր զգլխովն Եփրեմի, ծանր թուեցաւ նմա. եւ աւգնեաց Յովսէփ ձեռին հաւրն իւրոյ, հանել զնա ի գլխոյն Եփրեմի` ի գլուխն Մանասէի:
18. Ասէ Յովսէփ ցհայրն իւր. Ոչ այդպէս է հայր. քանզի սա է անդրանիկ. դիր զաջ ձեռն քո ի վերայ գլխոյ սորա:
19. Եւ ոչ կամեցաւ հայրն նորա, այլ ասէ` Գիտեմ որդեակ գիտեմ. եւ դա եղիցի ի ժողովուրդ, եւ դա բարձրասցի. Այլ եղբայրս դորա կրտսեր` եղիցի մեծ քան զդա. եւ զաւակ սորա եղիցի ի բազմութիւն ազգաց:
20. Եւ աւրհնեաց զնոսա յաւուր յայնմիկ` եւ ասէ. Ի ձեզ աւրհնեսցի Իսրայէլ: Ասասցեն, թէ արասցէ զքեզ Աստուած իբրեւ զԵփրեմ եւ զՄանասէ: Եւ եդ զԵփրեմ յառաջ քան զՄանասէ:
21. Եւ ասէ Իսրայէլ ցՅովսէփ. Ես աւասիկ մեռանիմ եւ Աստուած եղիցի ընդ ձեզ, եւ դարձուսցէ զձեզ յերկիր հարցն ձերոց:
22. Եւ ես ետու քեզ զսիկիմ սեպհական. արտաքոյ եղբարց քոց, զոր առի ի ձեռաց Ամովրհացւոցն սրով իմով եւ աղեղամբ:
Հաղորդում կայքում սխալի վերաբերյալ
Տվյալ հատվածում առկա է սխալ: