Գլուխ 40

   
1. Ի կատարած. Սաղմոս ի Դաւիթ. Խ:

2. Երանի որ խորհի զաղքատն եւ զտնանկ, յաւուր չարի փրկէ զնա Տէր:

3. Տէր փրկէ զնա եւ կեցուցանէ, երանելի առնէ զնա ի վերայ երկրի, եւ ոչ մատնէ զնա ի ձեռս թշնամեաց իւրոց:

4. Տէր աւգնական է նմա ի մահիճս ցաւոց իւրոց, զամենայն անկողինս նորա դարձուցանէ ի հիւանդութենէ նորա:

5. Ես ասացի Տէր ողորմեա ինձ, բժշկեա զանձն իմ, ես մեղայ քեզ:

6. Թշնամիք իմ ասացին ինձ չար. ե՞րբ իցէ զի մեռցի եւ կորիցէ անուն նորա:

7. Մտանէր տեսանել զնանրութիւն, խաւսէր ի սիրտ իւր, ժողովէր զանաւրէնութիւնս յանձն իւր: Արտաքս ելանէր եւ զնոյն խաւսէր.

8. զինէն շշնջէին ամենայն թշնամիք իմ: Խորհեցան չար ի վերայ իմ,

9. բան անաւրէնութեան եդին ի վերայ իմ: Միթէ որ ննջիցեն եւ այլ ո՞չ եւս յաւելուցու յառնել.

10. քանզի եւ այրն խաղաղութեան իմոյ յոր եւ եսն յուսացայ: Որ ուտէր զհաց իմ յաճախեաց առնել ինձ խաբէութիւն:

11. Այլ դու Տէր ողորմեա ինձ կանգնեա զիս, եւ հատուցից նոցա:

12. Յայսմ ծանեայց թէ հաճեցար ընդ իս, զի մի ուրախ եղիցին յիս թշնամիք իմ:

13. Այլ զիս յանբծութեան իմում ընկալար. հաստատեցեր զիս առաջի քո յաւիտեան:

14. Աւրհնեալ Տէր Աստուած Իսրայէլի յաւիտեանս յաւիտենից. եղիցի եղիցի: Տունք. ժդ: