Գլուխ 51

   
1. Ի կատարած իմաստութեան. Սաղմոս ի Դաւիթ:

2. ի ժամանակի զի եկն Դովեկ պատմեաց Սաւուղայ, թէ ահաւասիկ Դաւիթ ի տան Աքիմելիքայ է. ԾԱ:

3. Զի՞ պարծի ի չարութեան հզաւր զանաւրէնութիւն.

4. զաւրհանապազ զանիրաւութիւն խորհեցաւ ի լեզուի իւրում: Որպէս զածելի սուր սրեաց զնենգութիւն,

5. սիրեաց զչարութիւն քան զբարութիւն, զանաւրէնութիւն քան զխաւսս արդարութեան:

6. Սիրեաց նա զամենայն խաւսս կործանման, եւ զլեզուս նենգաւորս:

7. Վասն այսորիկ Աստուած կործանեսցէ զնա ի սպառ, խլեսցէ եւ հանցէ զնա յարկաց իւրոց, եւ զարմատս նորա յերկրէն կենդանեաց:

8. Տեսցեն արդարք եւ երկիցեն, զնովաւ ծիծաղեսցին եւ ասասցեն:

9. Այս այր է որ ոչ արար զԱստուած իւր աւգնական. այլ յուսացաւ սա ի բազում մեծութիւն իւր, եւ զաւրացաւ ի նանրութեան իւրում:

10. Այլ ես որպէս ձիթենի պտղալից ի տան Աստուծոյ. յուսացայ յողորմութիւն Աստուծոյ յաւիտեան եւ յաւիտեանս յաւիտենից:

11. Խոստովան եղէց քեզ յաւիտեան զի արարեր. եւ համբերից անուան քում, զի քաղցր ես առաջի սրբոց քոց: Տունք. ը: Գոբղայս. ծբ: