Գլուխ 87

   
1. Ի կատարած. վասն Մաղաղեթայ իմաստութիւն. զի ետ պատասխանի Եմման իմաստութեամբ Իսրայէլի. ՁԷ:

2. Տէր Աստուած փրկութեան իմոյ, ի տուէ կարդացի եւ ի գիշերի առաջի քո:

3. Մտցեն աղաւթք իմ առաջի քո Տէր, խոնարհեսցի ունկն քո ի խնդրուածս իմ:

4. Զի լցան չարչարանաւք անձն իմ, եւ կեանք իմ ի դժոխս մերձեցաւ,

5. եւ համարեցայ ես ընդ այնոսիկ ոյք իջանեն ի գուբ: Եղէ ես որպէս մարդ առանց աւգնականի,

6. եւ ի մեռեալս ազատ: Որպէս զվիրաւորս, որ ննջեն ի գերեզմանի: Զորս դուն ոչ յիշեցեր, եւ նոքա ի ձեռանէ քումմէ մերժեցան:

7. Եդին զիս ի գբի ներքնում, ի խաւարի եւ ի ստուերս մահու:

8. Յիս հաստատեցաւ սրտմտութիւն քո, զամենայն զբաւսանս քո ածեր ի վերայ իմ:

9. Հեռի արարեր յինէն զծանաւթս իմ, եւ եդին զիս նշաւակ իւրեանց: Մատնեցայ եւ ոչ ելանէի.

10. աչք իմ տկարացաւ յաղքատութենէ: Աղաղակեցի առ Տէր զաւրհանապազ, եւ համբարձի առ քեզ զձեռս իմ:

11. Միթէ մեռելոց առնիցե՞ս սքանչելիս, կամ բժիշկք յարուցանիցեն` խոստովան առնիցին առ քեզ:

12. Մի թէ պատմեսցէ՞ ոք երբէք ի գերեզմանի զողորմութիւնս քո, կամ զճշմարտութիւնս քո ի կորստեան:

13. Մի թէ ճանաչիցե՞ն ի խաւարի սքանչելիք քո, կամ արդարութիւն քո յերկիր մոռացեալ:

14. Ես առ քեզ Տէր աղաղակեցի, առաւաւտու աղաւթք իմ ժամանեսցեն առ քեզ:

15. Ընդէ՞ր Տէր մերժես զանձն իմ, կամ դարձուցանես զերեսս քո յինէն:

16. Տնանկ եւ վաստակաւոր եմ ես ի մանկութենէ իմմէ. ի բարձրութենէ խոնարհեցայ եւ ապշեցայ:

17. Յիս հաստատեցաւ բարկութիւն քո, արհաւիրք քո խռովեցուցին զիս:

18. Շրջեցան զինեւ որպէս ջուր, զաւր ամենայն պաշարեցին զիս ի միասին:

19. Հեռի արարեր յինէն զբարեկամս իմ եւ զծանաւթս իմ, վասն թշուառութեան իմոյ: Տունք. ի: Գոբղայս. խբ: