Առ որդիսն Իսրայէլի
1. Եւ եղև բա՛ն Տեառն առ իս՝ և ասէ.
2. Եւ դո՛ւ որդի մարդոյ, եթէ դատիցես՝ դատեսջի՛ր զքաղաքն արեանց.
3. և խայտառակեսցես զամենայն զանօրէնութիւնս նորա՝ և ասասցես. Ա՛յսպէս ասէ Տէր Տէր Աստուած. Ո՛ քաղաք որ հեղու զարիւն ‘ի միջի իւրում, ‘ի հասանել ժամանակի իւրոյ. և խորհի խորհուրդ զանձնէ՝ պղծել զանձն իւր
4. յարիւնս նոցա։ Զո՛ւր հեղեր՝ թաթաւեցար, և ‘ի խորհուրդսն քո զոր խորհեցար՝ պղծեցար, և մերձեցուցեր զաւուրս քո, և ածեր զժամանակ ամաց քոց։ Վասն այնորիկ ետու զքեզ ‘ի նախատինս ազգաց, և յայպն ամենայն աշխարհաց:
5. Որ մօտ ‘ի քեզ էին՝ և հեռի՛ ‘ի քէն, այպանեսցեն զքեզ՝ և ասասցեն, թէ անուանիդ ‘ի պղծութիւն մատնեցար. քանզի յաճախեցեր յանօրէնութիւնս:
6. Ահաւասիկ առաջնորդք տանդ Իսրայէլի, իւրաքանչիւր ընդ մերձաւորս ազգի իւրեանց խառնակէին ‘ի քեզ՝ զի հեղցե՛ն արիւն։
7. Զհայր և զմայր անարգէին ‘ի քեզ, և ընդ եկին և ընդ պանդխտին՝ անիրաւութեամբ գնային ‘ի քեզ. զորբն և զայրին բռնադատէին ‘ի քեզ.
8. զսրբութիւնս իմ արհամարհէին, և զշաբաթս իմ պղծէին ‘ի քեզ:
9. Արք աւազակք կային ‘ի միջի քում զի հեղուցուն ‘ի քեզ արիւն. և ‘ի վերայ լերանց զոհէին ‘ի քեզ, և գործս անսուրբս գործէին ‘ի միջի քում:
10. Զամօթ հօր յայտնէին ‘ի քեզ, և պղծութեամբ զդաշտանն լլկէին ‘ի քեզ։
11. Եւ իւրաքանչիւր ‘ի կին ընկերի՛ իւրում պղծէին, և իւրաքանչիւր զնու իւր պղծէին ամպարշտութեամբ, և իւրաքանչիւր զքոյր իւր զդուստր հօր իւրոյ լլկէին ‘ի քեզ:
12. Կաշառս առնուին ‘ի միջի քում զի հեղուցուն արիւն, վաշխս և տոկոսիս առնուին ‘ի միջի քում. և ածից կատարեցից զվախճան չարեաց քոց ըստ բռնութեան քում. քանզի մոռացար զիս՝ ասէ Տէր Տէր:
13. Ահաւասիկ հարից ծա՛փս զծափի ‘ի վերայ գործոցն քոց զոր արարեր, և ‘ի վերայ արեանցն գործելոց ‘ի միջի քում։
14. Եւ եթէ ժուժկալեսցի սիրտ քո. եթէ զօրասցին ձեռք քո յաւուրսն յորս ե՛ս արարից ընդ քեզ. ե՛ս Տէր խօսեցայ՝ և արարից:
15. Եւ ցրուեցից զքեզ ընդ ազգս՝ և ցանեցի՛ց զքեզ ընդ գաւառս, և պակասեսցէ պղծութիւն քո ‘ի քէն.
16. և ժառանգեցից ‘ի քեզ յանդիման ազգացն. և ծանիջիք թէ ե՛ս եմ Տէր:
17. Եւ եղև բան Տեառն առ իս՝ և ասէ.
18. Որդի մարդոյ, աւասիկ եղեն ինձ տունդ Իսրայէլի խառնակեալ, որպէս խառնակեալ իցէ պղինձ և երկաթ, և անագ, և կապար, և արծաթ ‘ի հալոցի:
19. Վասն այնորիկ ասա՛. Ա՛յսպէս ասէ Տէր Տէր. Փոխանակ զի եղերուք դուք ամենեքեան ‘ի մի խառնակութիւն, վասն այնորիկ ես ընկալայց զձեզ ‘ի մէջ Երուսաղեմի,
20. որպէս ընդունիցի ոք զարծաթ և զպղինձ, զերկաթ և զկապար՝ ‘ի մէջ հալոցի փչե՛լ ‘ի նա հուր և ձուլել. նո՛յնպէս ընկալայց զձեզ բարկութեամբ իմով,
21. և հաւաքեցից և ձուլեցի՛ց զձեզ. և փչեցից ‘ի ձեզ հոգւով բարկութեամբ իմով. և ձուլեսջիք ‘ի մէջ նորա,
22. զոր օրինակ ձուլեսցի արծաթ ‘ի մէջ բովոյ, ա՛յնպէս ձուլեսջիք ‘ի միջի դորա. և ծանիջիք, թէ ես Տէր հեղի զսրտմտութիւն իմ ‘ի վերայ ձեր:
23. Եւ եղև բան Տեառն առ իս՝ և ասէ.
24. Որդի մարդոյ ասա՛ ցդա. Դու՝ ա՛յն երկիր ես որ ո՛չ թանաս. և ո՛չ եկն անձրև ‘ի վերայ քո յաւուրս բարկութեան.
25. որոյ իշխանք իւր ‘ի միջի իւրում իբրև զառիւծունս գոչէին յափշտակել զյափշտակութիւնս. ուտեն զանձինս տնանկաց բռնութեամբ, և առնուն պատիւս անիրաւութեամբ. և բազմացան այրիք ‘ի միջի քում.
26. Եւ քահանայք նորա անարգէին զօրէնս իմ և պղծէին զսրբութիւնս իմ. և զսուրբն ‘ի պղծոյն ո՛չ ընտրէին, և զարատաւորն յանարատէ անտի ո՛չ զատուցանէին. և ‘ի շաբաթուց իմոց ծածկէին զաչս իւրեանց, և զշաբաթս իմ պղծէին ‘ի միջի նոցա:
27. Իշխանք նորա ‘ի միջի նորա իբրև զգայլք յափշտակօղք, յափշտակել յափշտակութիւնս, հեղուլ զարիւնս. կորուսանել զանձինս, զի ագահութիւն յոյժ ստասցին:
28. Եւ մարգարէք նորա՝ որ ծեփէին զնոսա անկցին. որք տեսանէին սնոտիս. ըղձային նոցա ստութիւն, և ասէին. Ա՛յսպէս ասէ Ադովնայի Տէր. և Տեառն չէ՛ր խօսեցեալ.
29. զժողովուրդ երկրին տառապեցուցանէին անիրաւութեամբ, և յափշտակէին յափշտակութիւնս. զաղքատն և զտնանկն բռնադատէին, ընդ պանդխտին իրաւամբք ո՛չ գնային:
30. Եւ խնդրեցի ‘ի նոցանէ այր մի որ ուղի՛ղ գնայցէ, և կայցէ առաջի իմ մտադիւր ‘ի ժամանակի բարկութեան՝ զի մի՛ ջնջեցից զնոսա, և ո՛չ գտի։
31. Եւ հեղի ‘ի վերայ նոցա զսրտմտութիւն իմ հրով բարկութեան իմոյ կատարել ‘ի նոսա. ըստ ճանապարհաց նոցա ետո՛ւ ‘ի գլուխս նոցա ասէ Տէր Տէր:
Հաղորդում կայքում սխալի վերաբերյալ
Տվյալ հատվածում առկա է սխալ: