1. Եւ եղև բա՛ն Տեառն առ իս՝ և ասէ.
2. Որդի՛ մարդոյ, կանայք երկո՛ւ էին՝ դստերք միո՛յ մօր.
3. և պոռնկեցան յԵգիպտոս ‘ի մանկութեան իւրեանց. ա՛նդ անկան ստինք իւրեանց. ա՛նդ արկան ‘ի կուսութենէ իւրեանց:
4. Անուն դստերն երիցու Ոողա, և քե՛ռ նորա Ոողիբա. և եղեն ինձ՝ և ծնան ուստերս և դստերս, և անուն նոցա՝ անուն Շամրնի Ոողա, և Երուսաղեմի Ոողիբա:
5. Եւ պոռնկեցա՛ւ Ոողայն յինէն. և արձակեաց զաչս իւր զհետ հոմանեաց իւրոց, յԱսորեստանեա՛յսն որ մե՛րձ էին առ նա.
6. ‘ի զգեցեալ հի՛րս և կարմիրս, յիշխանս և ‘ի զօրագլուխս, յերիտասարդս, յընտրեալս յամենեսին, ‘ի սպառազէնս ‘ի հեծեալս յերիվարս:
7. Եւ տարածեաց զպոռնկութիւն առ նոսա, առ ամենայն ընտրեալս որդիսն Ասորեստանեայց. և առ ամենեսին զորոց չոգաւ զկնի ամենայն խորհրդովք իւրովք՝ և պղծեցաւ:
8. Եւ զպոռնկութիւն իւր յերկրէն Եգիպտացւոց ո՛չ եթող. զի ընդ նոսա պղծէր ‘ի մանկութենէ իւրմէ. և նոքա արկին զնա ‘ի կուսութենէ, և հեղին ‘ի վերայ նորա զպոռնկութիւնս իւրեանց։
9. Վասն այնորիկ մատնեցին զնա ‘ի ձեռս հոմանեաց իւրեանց, ‘ի ձեռս որդւոցն Ասորեստանեայց զորոց զհետ երթայր:
10. Նոքա յայտնեցին զխայտառակութիւն նորա. զուստերս և զդստերս նորա առին, և զնա սրով սպանին. և եղև խօսք կանանց, և խնդրեցին վրէ՛ժ ‘ի նմանէ ‘ի դստերս իւր:
11. Եւ ետես քոյր նորա Ոողիբա. և առաւել զանցոյց զաչարձակութիւն ապականութեան իւրոյ քան զնորայն. և զպոռնկութիւն իւր քան զպոռնկութիւն քեռ իւրոյ։
12. Զի չոգաւ զհետ որդւոցն Ասորեստանեայց. իշխանաց և զօրավարաց, որ մե՛րձ էին առ նա, զգեցելոց հանդերձս ծիրանիս ազնուականս. սպառազինաց հեծելո՛ց յերիվարս, երիտասարդաց՝ ընտրելոց ամենեցուն։
13. Եւ տեսի զի պոռնկեցան՝ և մի ճանապարհ էր երկոցունց:
14. Եւ յաւե՛լ ‘ի պոռնկութիւնս իւր. և ետես արս նկարեալս յորմս պատկերս Քաղդեացւոց՝ նկարեալս գրչաւ ‘ի նկարս.
15. ածեալ պէսպէս կամարս ընդ մէջ իւրեանց, և խոյրս ներկեալս ‘ի գլուխս իւրեանց. երփն երփն հարկանէր յամենեցունց ‘ի նմանութիւն որդւոցն Բաբելացւոց՝ յերկրին Քաղդեացւոց՝ յաշխարհն իւրեանց:
16. Եւ ակն ե՛տ նոցա հայեցուածովք աչաց իւրեանց. և առաքեաց հրեշտակս առ նոսա յերկիրն Քաղդեացւոց:
17. Եւ եկին առ նա որդիքն Բաբելացւոց յանկողինս օթի, և պղծեցին զնա ‘ի պոռնկութեան իւրում. և պղծեցա՛ւ ընդ նոսա, և յափրացա՛ւ անձն նորա ‘ի նոցանէ։
18. Եւ յայտնեաց զպոռնկութիւն իւր, և առակեաց զամօթ իւր։ Եւ մեկնեցա՛ւ անձն իմ ‘ի նմանէ. որպէս և մեկնեցաւ անձն իմ ‘ի քեռէ՛ նորա:
19. Եւ յաճախեցեր զպոռնկութիւն քո յիշեցուցանել զաւուրս մանկութեան քոյ յորս պոռնկէիրն յԵգիպտոս.
20. և արձակեցեր զաչս քո առ Քաղդեացիսն՝ յիշանդամս և ‘ի ձիանդամս:
21. Եւ ա՛յց արարից անօրէնութեան մանկութեան քոյ՝ զոր գործէիրն յերկրին Եգիպտացւոց յօթեվանս քո. ուր անկա՛ն ստինք քո և լուծա՛ւ կուսութիւն քո:
22. Վասն այնորիկ Ո՛ողիբա՝ այսպէս ասէ Ադովնայի Տէր. Ահաւասիկ ես յարուցից ‘ի վերայ քո զհոմանիսն յորոց յափրացա՛ւ անձն քո, և ածից պատեցից զնոսա զքև:
23. զորդիսն Բաբելացւոց, և զամենայն Քաղդեացիսն, զՓակուդ և զՍուէ և զԿուէ, և զամենայն որդիսն Ասորեստանեայց ընդ նոսա. զերիտասարդս ընտիրս, զիշխանս, զզօրավարս, զսպառազէնս զանուանիս՝ զհեծեալս յերիվարս:
24. Ամենեքին եկեսցեն ‘ի վերայ քո ‘ի հիւսւսոյ. կառք և անիւք ազգաց բազմութեան, սաղաւարտաւորք և վահանաւորք. և արկցեն շուրջ զքև պահ. և տաց առաջի երեսաց նոցա դատաստանս, և խնդրեսցեն ‘ի քէն վրէժս դատաստանօք իւրեանց։
25. Եւ տաց զնախանձ իմ ‘ի քեզ, և արասցեն ընդ քեզ ըստ բարկութեան սրտմտութեան իմոյ. և զունչս և զականջս քո կտրեսցեն. և զմնացորդս քո սրով կոտորեսցեն, և զուստերս քո և զդստերս քո առցեն, և զմնացորդս քո հրով սատակեսցեն.
26. և մերկասցեն ‘ի քէն զհանդերձս քո, և առցեն զզարդ պարծանաց քոց։
27. Եւ դարձուցից զամպարշտութիւնս քո ‘ի քեզ, և զպոռնկութիւնս քո որ յերկրին Եգիպտացւոց. և ո՛չ ամբառնայցես զաչս քո ‘ի նա, և ո՛չ ևս յիշեսցես զԵգիպտոս:
28. Վասն այդորիկ ա՛յսպէս ասէ Տէր Տէր. Ահաւադիկ ե՛ս մատնեցից զքեզ ‘ի ձեռս ատելեաց յորոց յարփացաւ անձն քո ‘ի նոցանէ:
29. Եւ գնասցեն ընդ քեզ ատելութեամբ, և առցեն զամենայն վաստակս քո և զերկս քո. և եղիցես մե՛րկ և խայտառակեալ. և յայտնեսցի ամօթ պոռնկութեան քոյ. ամպարշտութիւնն քո և պոռնկութիւն քո
30. արարին քեզ զայդ, ‘ի պոռնկելն քում զհետ ազգաց, ուր պղծէիր ‘ի խորհուրդս նոցա։
31. Զճանապարհս քեռ քո գնացեր. և տա՛ց զբաժակ նորա ‘ի ձեռս քո։
32. Ա՛յսպէս ասէ Տէր Տէր. Զբաժակն քեռ քո արբցես, զխորն և զլայնն. և եղիցես ‘ի ծաղր և ‘ի կատականս. յաճախել կատարել զարբեցութիւն.
33. և լցցիս լքմամբ. զբաժակն ապականութեան, զբաժակն քեռ քո Շամրն,
34. արբցես՝ և քամեսցես. և զհերս քո խզեսցես, և զստինս քո կոծեսցես. և զտօնս քո և զամսագլուխս քո դարձուցից ‘ի քէն. զի ե՛ս խօսեցայ՝ ասէ Ադովնայի Տէր։
35. Վասն այդորիկ ա՛յսպէս ասէ Ադովնայի Տէր. Փոխանակ զի մոռացա՛ր զիս, և ընկեցեր զիս զկնի մարմնոյ քոյ. և դու ընկա՛լ զամպարշտութիւնս քո և զպոռնկութիւնս քո:
36. Եւ ասէ ցիս Տէր. Որդի մարդոյ, եթէ դատեսցիս զՈողայն և զՈողիբայն, և պատմեսցես նոցա զանօրէնութիւնս իւրեանց։
37. Զի շնացան՝ և արի՛ւն է ‘ի ձեռս նոցա և ‘ի խորհուրդս նոցա. շնային՝ և զորդիս իւրեանց զոր ինձ ծնան՝ ածէին զբոցով:
38. Մինչ ցայնչափ ևս արարին ինձ. զի զսրբութիւնս իմ պղծէին ‘ի նմին աւուր, և զշաբաթսն իմ ապականէին`
39. ’ի զոհե՛լ նոցա զորդիս իւրեանց կռոցն իւրեանց. և մտանէին ‘ի նմին աւուր ‘ի սրբութիւնս իմ և պղծէին զնոսա. և այսպէս առնէին ‘ի մէջ տան իմոյ։
40. Զի և արանց եկելոց ‘ի հեռաստանէ, առ որս հրեշտակս արձակէին. իսկ և իսկ իբրև գային, ‘ի բաղանիս մտանէիր. ‘ի ծարիր և ‘ի սնգոյր շպարէիր. և զարդարէիր զարդու,
41. և նստէիր ‘ի գահոյս զարդարեալս. և սեղա՛ն յօրինեալ՝ և դնէիր առաջի. և զխունկս իմ և զեւղսն առնուիր՝ և ուրա՛խ լինէիր ընդ նոսա.
42. և ‘ի ձայն արուեստականաց նուագէին։ Եւ առ այն արամբք, ա՛յլ ևս բազմութիւն :
Հաղորդում կայքում սխալի վերաբերյալ
Տվյալ հատվածում առկա է սխալ: