1․ Աւրհնեա անձն իմ զՏէր, եւ ամենայն ոսկերք իմ զանուն սուրբ նորա:
2․ Աւրհնեա անձն իմ զՏէր, եւ մի մոռանար զամենայն տուրս նորա:
3․ Ո քաւէ զմեղս քո, բժշկէ զամենայն հիւանդութիւնս քո:
4․ Ո փրկէ յապականութենէ զկեանս քո, պսակէ զքեզ ողորմութեամբ եւ գթութեամբ:
5․ Ո լնու ի բարութենէ զցանկութիւն քո, նորոգեսցի որպէս արծուոյ մանկութիւն քո:
6․ Առնէ ողորմութիւնս Տէր, եւ իրաւունս ամենայն զրկելոց:
7․ Եցոյց Տէր զճանապարհս իւր Մովսիսի, եւ որդւոցն Իսրայէլի զկամս իւր:
8․ Գթած ողորմած է Տէր, երկայնամիտ եւ բազումողորմ:
9․ Ոչ ի սպառ բարկանայ Տէր, եւ ոչ յաւիտեան պահէ ոխս:
10․ Ոչ ըստ մեղս մեր արար մեզ, եւ ոչ ըստ անաւրէնութեան մերում հատոյց մեզ:
11․ Այլ որպէս բարձր են երկինք յերկրէ, այնպէս զաւրացոյց Տէր զողորմութիւն իւր ի վերայ երկիւղածաց իւրոց:
12․ Որչափ հեռի են արեւելք յարեւմտից, այնպէս հեռի արար ի մէնջ զանաւրէնութիւնս մեր:
13․ Որպէս գթայ հայր ի վերայ որդւոց իւրոց, այնպէս գթասցի Տէր յերկիւղածս իւր:
14․ Զի նա գիտաց զստեղծուածս մեր, եւ յիշեաց թէ հող եմք:
15․ Մարդոյ որպէս խոտոյ են աւուրք իւր, որպէս ծաղիկ ի վայրի այնպէս ծաղկէ:
16․ Շնչէ ի նմա հողմ եւ ոչ է, եւ ոչ եւս երեւի տեղի նորա:
17․ Բայց ողորմութիւն Տեառն յաւիտեանս յաւիտենից ի վերայ երկիւղածաց իւրոց, եւ արդարութիւն նորա յորդւոց մինչչեւ յորդիս:
18․ Որ պահեն զուխտս նորա, յիշեն զպատուիրանս նորա եւ առնեն զնա:
19․ Տէր զերկինս պատրաստեաց աթոռ իւր, արքայութիւն նորա ամենեցուն տիրէ:
20․ Աւրհնեցէք զՏէր ամենայն հրեշտակք նորա, հզաւրք զաւրութեամբ որ առնէք զբան նորա, լսէք ձայնի պատգամաց նորա:
21․ Աւրհնեցէք զՏէր ամենայն զաւրութիւնք նորա, պաշտաւնեայք եւ արարաւղք կամաց նորա:
22․ Աւրհնեցէք զՏէր ամենայն գործք նորա, ընդ ամենայն տեղիս է տէրութիւն նորա. աւրհնեա անձն իմ զՏէր: Տունք. իբ: Գոբղայս. խը:
Հաղորդում կայքում սխալի վերաբերյալ
Տվյալ հատվածում առկա է սխալ: