Գլուխ 62

   
1. Սաղմոս ի Դաւիթ. մինչ նստէր նա յանապատի Հրէաստանի. ԿԲ:

2. Աստուած Աստուած իմ ես առ քեզ առաւաւտ առնեմ. ծարաւեաց առ քեզ հոգի իմ, քանիպատիկ եւս եւ մարմին իմ:

3. Որպէս երկիր անապատ եւ անջուր, ուր ոչ գոյ ի նմա ճանապարհ: Այսպիսի սուրբս երեւեցայց քեզ, տեսանել ինձ զզաւրութիւն քո եւ զփառս քո:

4. Վասն զի լաւ է ինձ ողորմութիւն քո քան զկեանս իմ, եւ շրթունք իմ գովեսցեն զքեզ:

5. Այսպէս աւրհնեցից զքեզ ի կեանս իմ, եւ յանուն քո համբարձից զձեռս իմ:

6. Որպէս ի ճարպոյ պարարտութենէ լցցի անձն իմ, շրթունք իմ ցնծութեամբ աւրհնեսցէ զքեզ բերան իմ:

7. Զի թէ յիշէի զքեզ յանկողնի իմում, ընդ առաւաւտս կանխեալ խաւսէի ընդ քեզ:

8. Զի եղեր իմ աւգնական, ի հովանի թեւոց քոց ցնծացայց:

9. Եկն զկնի քո անձն իմ, եւ զիս ընկալաւ աջ քո.

10. եւ նոքա ի նանիր խնդրեցին զանձն իմ: Մտցեն ի ներքոյ անդնդոց երկրի.

11. մատնեսցին ի ձեռս սրոյ, եւ բաժինք աղուեսուց եղիցին:

12. Թագաւոր յուսացաւ ի Տէր, գովեսցին ամենեքեան որ երդնուն նովաւ, խցցին բերանք այնոցիկ ոյք խաւսէին զանիրաւութիւն: Տունք. ժա: