Գլուխ 147

Ալէլուիա. Անգեայ եւ Զաքարիայ. ՃԽԷ:
   

1․ Գովեա Երուսաղէմ զՏէր: Եւ աւրհնեա զԱստուած քո Սիովն:

2․ Զի զաւրացոյց զնիգս դրանց քոց, եւ աւրհնեաց զորդիս քո ի քեզ:

3․ Որ եդ զսահմանս քո ի խաղաղութիւն պարարտութեամբ ցորենոյ լցոյց զքեզ:

4․ Որ առաքէ զբան իւր յերկիր, վաղվաղ ընթանան պատգամք նորա:

5․ Դնէ զձիւն որպէս զասր, եւ զմէգ որպէս փոշի ցանեաց:

6․ Արկանէ զսառն որպէս պատառս, առաջի ցրտոյ նորա ո կարէ կալ:

7․ Առաքէ զբան իւր եւ հալէ զնոսա, հնչեսցեն հողմք եւ գնասցեն ջուրք:

8․ Ո պատմէ զբան իւր Յակովբայ, զարդարութիւն եւ զիրաւունս Իսրայէլի:

9․ Ոչ այսպէս արար ամենայն ազգաց Տէր, եւ զդատաստանս իւր ոչ յայտնեաց նոցա: Տունք. ժ: