Գլուխ 134

Ալէլուիա. ՃԼԴ:
   
1․ Աւրհնեցէք զանուն Տեառն, աւրհնեցէք ծառայք Տեառն զՏէր.

2․ ո՞ կայք ի տուն Տեառն, ի գաւիթս տան Աստուծոյ մերոյ:

3․ Աւրհնեցէք զՏէր զի բարի է, սաղմոս ասացէք անուան նորա զի քաղցր է:

4․ ԶՅակովբ ընտրեաց իւր Տէր, եւ զԻսրայէլ ժառանգութիւն իւր:

5․ Ես ծանեայ զի մեծ է Տէր, եւ Տէր մեծ է քան զամենայն կուռս:

6․ Զամենայն զոր ինչ կամեցաւ եւ արար Տէր, յերկինս եւ յերկրի, ի ծովս եւ յամենայն խորս:

7․ Հանէ զամպս ի ծագաց երկրէ, զփայլատակունս իւր յանձրեւս արար, եւ հանէ զհողմս ի շտեմարանաց իւրոց:

8․ Ո եհար զամենայն անդրանիկս եգիպտացւոց, ի մարդոյ մինչչեւ յանասուն:

9․ Առաքեաց զնշանս եւ զարուեստս իւր ի մէջ քո Եգիպտոս, ի փարաւովն եւ յամենայն զաւրս իւր:

10․ Ո եհար ազգս բազումս, եւ սպան զթագաւորս հզաւրս:

11․ ԶՍեհովն թագաւոր ամուրհացւոց, զովգ թագաւոր Բիշանու, եւ զամենայն թագաւորութիւնս քանանացւոց:

12․ Ետ զերկիրս նոցա ի ժառանգութիւն, ժառանգութիւն Իսրայէլի ժողովրդեան իւրոյ:

13․ Տէր անուն քո յաւիտեան, Տէր յիշատակ քո ազգէ մինչչեւ յազգ:

14․ Դատի Տէր զժողովուրդս իւր, եւ ի ծառայս իւր մխիթարի:

15․ Կուռք հեթանոսաց արծաթ եւ ոսկի են, ձեռագործք են որդւոց մարդկան:

16․ Բերան գոյ` եւ ոչ խաւսին, աչք են` եւ ոչ տեսանեն:

17․ Ականջք են` եւ ոչ լսեն, եւ ոչ գոյ շունչ ի բերանս նոցա:

18․ Նման նոցա եղիցին ոյք արարին զնոսա, եւ ամենեքեան ոյք յուսացեալ են ի նոսա:

19․ Տուն Իսրայէլի աւրհնեցէք զՏէր. տուն Ահարոնի աւրհնեցէք զՏէր:

20․ Տուն Ղեւեայ աւրհնեսցէ զՏէր. երկիւղածք Տեառն աւրհնեցէք զՏէր:

21․ Աւրհնեալ է Տէր ի Սիոնէ, այն որ բնակեալն է յԵրուսաղէմ: Տունք. ի: Գոբղայս. խդ: