Ի կատարած. վասն Մաղաղեթայ. իմաստութիւն ի Դաւիթ. ԾԲ:
1. Ասաց անզգամն ի սրտի իւրում թէ ոչ գոյ Աստուած.
2. ապականեցան եւ պղծեցան յանաւրէնութեան իւրեանց, եւ ոչ ոք է որ առնէ զքաղցրութիւն:
3. Աստուած յերկնից նայեցաւ յամենայն որդիս մարդկան, տեսանել թէ իցէ ոք իմաստուն որ խնդրիցէ զԱստուած:
4. Ամենեքեան խոտորեցան ի միասին, եւ անպիտանացան: Ոչոք է որ առնէ զբարի, եւ չէ ոք մինչչեւ ի մի:
5. Որպէս ոչ ծանիցեն ամենեքեան, որ գործեն զանաւրէնութիւն: Ոյք ուտէին զժողովուրդ որպէս կերակուր հացի,
6. եւ առ Աստուած ոչ կարդացին: Անդ երկիցեն երկեւղ ուր ոչ իցէ երկեւղ. զի Աստուած ցրուեսցէ զոսկերս մարդահաճոյից: Ամաչեսցեն եւ յամաւթ լիցին, զի Աստուած անարգեաց զնոսա:
7. Ո տացէ ի Սիովնէ զփրկութիւն Իսրայէլի. ի դարձուցանել Տեառն զգերութիւն ժողովրդեան իւրոյ, ցնծասցէ Յակովբ եւ ուրախ եղիցի Իսրայէլ: Տունք. թ:
Հաղորդում կայքում սխալի վերաբերյալ
Տվյալ հատվածում առկա է սխալ: