Գլուխ 53

   
1. Ի կատարած. ընդ աւրհնութիւնս իմաստութիւն ի Դաւիթ.

2. ի ժամանակի զի եկին զիփացիքն, եւ ասեն ցՍաւուղ` ահաւասիկ Դաւիթ թաքուցեալ նստի առ մեզ: ԾԳ:

3. Աստուած յանուան քում կեցո զիս, եւ ի զաւրութեան քում իրաւ արա ինձ:

4. Աստուած լուր աղաւթից իմոց, ունկն դիր բանից բերանոյ իմոյ:

5. Աւտարք յարեան ի վերայ իմ, եւ հզաւրք խնդրեցին զանձն իմ, եւ ոչ համարեցան զքեզ Աստուած առաջի իւրեանց:

6. Ահա Աստուած աւգնական իմ, եւ Տէր ընդունելի հոգւոյ իմոյ:

7. Ի դարձուցանել զչարն ի թշնամիս իմ, ճշմարտութեամբ քով սատակեա զնոսա:

8. Ես կամաւք իմովք պատարագս մատուցից քեզ. խոստովան եղէց անուան քում Տէր զի բարի է:

9. Յամենայն նեղութենէ իմմէ փրկեցեր զիս, եւ ի թշնամիս իմ ետես ակն իմ: Տունք. է: