1. Երանի ում թողութիւն եղեւ մեղաց, եւ ծածկեցան ամենայն յանցանք նորա:
2. Երանի առն որում ոչ համարեսցի Տէր զմեղս նորա, եւ ոչ գոյ նենգութիւն ի բերան նորա:
3. Լռեցի ես եւ մաշեցան ամենայն ոսկերք իմ, առ աղաղակել ինձ առ Տէր զաւրհանապազ
4. ի տուէ եւ ի գիշերի: Ծանրեաց ձեռն քո ի վերայ իմ, դարձայ ի թշուառութիւն, զի հարան յիս փուշք: Հանգիստ:
5. Զմեղս իմ ցուցից քեզ, եւ զանաւրէնութիւնս իմ ոչ ծածկեցից ի քէն: Ասացի թէ պատմեցից ինձէն զմեղս իմ, եւ դու թողցես զամենայն ամպարշտութիւնս մեղաց իմոց: Հանգիստ:
6. Վասն այսորիկ յաղաւթս կացցեն առ քեզ ամենայն սուրբք, ի ժամ ընդունելի: Բայց միայն ի ջուրցն հեղեղաց բազմաց, որ առ նոսա ինչ ոչ մերձեսցի:
7. Դու ես ապաւէն իմ ի նեղութենէ յայսմանէ, որ շուրջ եղեւ զինեւ: Ցնծութիւն իմ փրկեա զիս յայնցանէ` որ պաշարեցին զիս:
8. Իմաստուն արարից զքեզ եւ խելամուտ ի ճանապարհ յոր եւ գնասցես, եւ հաստատեցից ի վերայ քո զաչս իմ:
9. Մի լինիք որպէս զձիս եւ զջորիս զի ոչ գոյ ի նոսա իմաստութիւն. ի սանձս եւ ի դանդանաւանդս ճմլեսցես զկզակս նոցա որ առ քեզ ինչ ոչ մերձենան:
10. Բազում տանջանք են մեղաւորաց, բայց ոյք յուսան ի Տէր` ողորմութիւն Տեառն շուրջ եղիցի զնոքաւք:
11. Ուրախ եղերուք եւ ցնծացէք արդարք ի Տէր, պարծեցարուք ամենեքեան ոյք ուղիղ էք սրտիւք: Տունք. ժգ: Գոբղայս. խբ:
Հաղորդում կայքում սխալի վերաբերյալ
Տվյալ հատվածում առկա է սխալ: