Սաղմոս ի Դաւիթ. Ճ:
1. Յողորմութիւն եւ յիրաւունս աւրհնեցից զքեզ Տէր. սաղմոս ասացից
2. եւ ի միտ առից: Ճանապարհ անբիծ մինչչեւ եկեսցէ առ իս. զի գնայի ես յանբծութեան սրտի իմոյ ի մէջ տան իմոյ:
3. Ոչ եդի առաջի աչաց իմոց իրս անիրաւութեան. ոյք առնէին զուրացութիւն. ատեցի: Ոչ մերձեցաւ առ իս
4. որ թեւրն էր սրտիւ. խոտորեալ յինէն անզգամին, եւ ես ոչ ինչ փոյթ առնէի:
5. Որ խաւսէր գաղտ զընկերէ իւրմէ, զնա բացէ ի բաց հալածէի: Որ ամբարտաւանէր աչաւք` եւ ագահ սրտիւ, ընդ նմա եւ հաց ոչ ուտէի:
6. Աչք իմ ի հաւատացեալս երկրի, զի նստցին նոքա ընդ իս: Որ գնայր ի ճանապարհ անբիծ, նա պաշտէր զիս:
7. Ոչ բնակէր ի մէջ տան իմոյ որ առնէր զամբարտաւանութիւն. որ խաւսէր զանաւրէնութիւն չէր յաջողեալ նմա առաջի աչաց իմոց:
8. Ընդ առաւաւտս սպանանէի զամենայն մեղաւորս երկրի. սատակեցից ի քաղաքի Տեառն զամենեսեան որ գործեն զանաւրէնութիւն: Տունք. ժ: Գոբղայս. իզ:
Հաղորդում կայքում սխալի վերաբերյալ
Տվյալ հատվածում առկա է սխալ: