Գլուխ 91

   
1. Սաղմոս աւրհնութեան աւուր շաբաթուց ի Դաւիթ. ՂԱ:

2. Բարի է խոստովան լինել Տեառն, սաղմոս ասել անուան քում բարձրեալ:

3. Պատմել առաւաւտու զողորմութիւնս քո, եւ զճշմարտութիւնս քո ի գիշերի:

4. Տասնաղեաւ սաղմոսարանաւ, ի ձայն աւրհնութեան գովել:

5. Ուրախ արարեր զիս Տէր յարարածս քո, եւ ի գործս ձեռաց քոց ցնծացայց:

6. Որպէս զի մեծ են գործք քո Տէր, եւ յոյժ խոր են խորհուրդք քո:

7. Այր անզգամ զայս ոչ ծանիցէ, եւ անմիտն զայս ոչ առնու ի միտ:

8. Ի բուսանել մեղաւորաց որպէս խոտ, ի ծաղկել այնոցիկ որ գործեն զանաւրէնութիւն: Սատակեսցին յաւիտեանս յաւիտենից,

9. եւ դու բարձրեալ ես յաւիտեանս Տէր:

10. Զի ահա թշնամիք քո Տէր, զի ահա թշնամիք քո կորիցեն. ցրուեսցին ամենեքեան ոյք գործեն զանաւրէնութիւն:

11. Բարձր եղիցի որպէս միեղջերոյ եղջեւր իմ, եւ ծերութիւն իմ ի ձէթ պարարտութեան:

12. Ետես ակն իմ ի թշնամիս իմ որ յարուցեալ են ի վերայ իմ չարութեամբ, ի նոսա լուիցէ ունկն իմ:

13. Արդարքն որպէս զարմաւենիս ծաղկեսցին. որպէս մայրք Լիբանանու բազումք եղիցին:

14. Տնկեալք եղիցին ի տան Տեառն, ի գաւիթս Աստուծոյ մերոյ ծաղկեսցին:

15. Եւս` եւ բազումք եղիցին ի ծերութիւն պարարտութեան, գիրգք եւ փափուկք եղիցին

16. ի պատմել, ուղիղ է Տէր Աստուած մեր եւ ոչ գոյ ի նմա անիրաւութիւն: Տունք. ժդ: Գոբղայս. խզ: