Գլուխ 41

   
1․ Ի կատարած. իմաստութեան որդւոցն Կորխայ. Սաղմոս ի Դաւիթ. ԽԱ:

2․ Որպէս փափագէ եղջերու յաղբերս ջուրց, այնպէս փափագէ անձն իմ առ քեզ Աստուած:

3․ Ծարաւի է անձն իմ առ քեզ Աստուած հզաւր եւ կենդանի. ե՞րբ եկից երեւեցայց երեսացդ Աստուծոյ:

4․ Եղեն ինձ արտասուք իմ կերակուր` ի տուէ եւ ի գիշերի, եւ այն զի ասէին ցիս զաւրհանապազ` թէ ո՞ւր է Աստուած քո:

5․ Զայս որպէս յիշէի տառապէր յիս անձն իմ. քաջալերէի զի մտից ընդ յարկաւ սքանչելեաց տան Աստուծոյ: Ի ձայն ցնծութեան խոստովանութեան, եւ ի ձայն բարեկենդանութեան:

6․ Արդ` ընդէ՞ր տրտում ես անձն իմ, կամ ընդէ՞ր խռովես զիս. յուսա առ Աստուած խոստովանեա նմա` փրկիչ երեսաց իմոց Աստուած է:

7․ Անձն իմ յոյժ խռովեցաւ, վասն այնորիկ յիշեցի զքեզ յերկրէն Յորդանանու, ի Հերմոնէ ի լեռնէ փոքուէ:

8․ Խորք ի խորոց կարդացին առ քեզ, ի ձայն սահմանաց քոց: Ամենայն զբաւսանք քո, եւ ալիք քո անցին ի վերայ իմ:

9․ Ի տուէ պատուիրեաց Տէր զողորմութիւն իւր, գիշերի զաւրհնութիւն նոր. եւ աղաւթք իմ առ Աստուած վասն կենաց իմոց:

10․ Ասացի Աստուծոյ` ընդունելի իմ ես. ընդէ՞ր մերժեցեր զիս, ընդէ՞ր տրտում գնամ ես ի նեղել թշնամւոյ իմոյ:

11․ Ի փշրել ոսկերաց իմոց նախատեցին զիս թշնամիք իմ, յասել ցիս զաւրհանապազ թէ ո՞ւր է Աստուած քո:

12․ Արդ` ընդէ՞ր տրտում ես անձն իմ, կամ ընդէ՞ր խռովես զիս. յուսա առ Աստուած խոստովանեա նմա` փրկիչ երեսաց իմոց Աստուած է: Տունք. ժդ: