1․ Ի կատարած. Սաղմոս ի Դաւիթ. ԻԴ:
Առ քեզ Տէր համբարձի զանձն իմ.
2․ Աստուած իմ ի քեզ յուսացայ` մի ամաչեցից,
3․ եւ մի ծիծաղեսցին զինեւ թշնամիք իմ: Ամենեքեան որ համբերեն քեզ մի ամաչեսցեն,
4․ այլ ամաչեսցեն անաւրէնք յունայնութեան իւրեանց: Զճանապահս քո Տէր ցոյց ինձ, եւ զշաւիղս քո ուսո ինձ:
5․ Առաջնորդեա ինձ ի ճշմարտութեան քում եւ ուսո զիս, զի դու ես Աստուած փրկիչ իմ. եւ ես քեզ համբերի զաւրհանապազ:
6․ Յիշեա Տէր` զգթութիւնս քո եւ զողորմութիւնս որ ենն յաւիտենից:
7․ Զմեղս մանկութեան իմոյ եւ զանգիտութեան իմոյ մի յիշեր. այլ յիշեա զիս Տէր ըստ ողորմութեան քում` վասն քաղցրութեան քոյ,
8․ զի քաղցր եւ ուղիղ ես Տէր: Վասն այսորիկ աւրէնսգէտ առնես զմեղաւորս ի ճանապարհի,
9․ առաջնորդես հեզոց ի դատաստանի. ուսուցանես հեզոց զճանապահս քո:
10․ Ամենայն ճանապարհք Տեառն ողորմութեամբ եւ ճշմարտութեամբ են այնոցիկ, որ խնդրեն զուխտ եւ զվկայութիւն նորա:
11․ Վասն անուան քո Տէր քաւեա զմեղս իմ զի բազում եղեն.
12․ ով է մարդ որ երկնչի ի Տեառնէ, աւրէնսգէտ առնէ զնա ի ճանապարհ յոր եւ հաճեցաւ:
13․ Անձն նորա ի բարութեան հանգիցէ, եւ զաւակ նորա ժառանգեսցէ զերկիր:
14․ Զաւրութիւն է Տէր երկիւղածաց իւրոց, եւ զկտակարանս իւր ուսուցանէ նոցա:
15․ Աչք իմ յամենայն ժամ առ Տէր. եւ նա հանէ յորոգայթէ զոտս իմ:
16․ Նայեա առ իս եւ ողորմեա ինձ, զի միամաւր եւ աղքատ եմ ես:
17․ Նեղութիւնք սրտի իմոյ բազում եղեն յոյժ, եւ ի վշտաց իմոց հան զիս:
18․ Տես զխոնարհութիւն իմ եւ զվաստակ իմ, եւ թող ինձ զամենայն մեղս իմ:
19․ Տես զթշնամիս իմ զի բազում եղեն, ատելութիւն զոր ի նանիր ատեցին զիս:
20․ Պահեա զանձն իմ եւ փրկեա զիս, եւ մի յամաւթ եղէց զի յուսացայ ի քեզ:
21․ Անբիծք եւ ուղիղք կցորդ եղեն ինձ, եւ ես քեզ համբերի.
22․ փրկեա Աստուած զԻսրայէլ յամենայն նեղութեանց նորա: Տունք. ժը:
Հաղորդում կայքում սխալի վերաբերյալ
Տվյալ հատվածում առկա է սխալ: