Գլուխ 142

Սաղմոս ի Դաւիթ, ի ժամանակի զի հալածեաց զնա Աբիսողոմ որդի նորա. ՃԽԲ:

 

1․ Տէր լուր աղաւթից իմոց, ունկն դիր խնդրուածաց իմոց ճշմարտութեամբ քով: Լուր արդարութեամբ քով,

2․ եւ մի մտաներ ոսոխ ընդ ծառայի քոյ, զի ոչ արդարանայ առաջի քո ամենայն մսեղի:

3․ Հալածեաց թշնամին զանձն իմ, խոնարհ արար յերկիր զկեանս իմ.

4․ նստոյց զիս ի խաւարի որպէս մեռեալ յաւիտենից: Ձանձրացաւ յիս հոգի իմ, եւ սիրտ իմ խռովեցաւ յիս:

5․ Յիշեցի զաւուրսն զառաջինս, խաւսեցայ յամենայն ի գործս քո. յարարածս ձեռաց քոց խորհեցայ,

6․ եւ համբարձի առ քեզ զձեռս իմ: Անձն իմ որպէս զերկիր ծարաւի է առ քեզ.

7․ վաղվաղակի լուր ինձ Տէր զի նուաղեաց յինէն հոգի իմ: Մի դարձուցաներ զերեսս քո յինէն, նմանիցեմ այնոցիկ ոյք իջանեն ի գուբ:

8․ Լսելի արա ինձ առաւաւտուց զողորմութիւնս քո, զի ես ի քեզ Տէր յուսացայ: Ցոյց ինձ ճանապարհ յոր գնացից, զի առ քեզ Տէր համբարձի զանձն իմ:

9․ Փրկեա զիս ի թշնամեաց իմոց Տէր, զի զքեզ ապաւէն ինձ արարի: Ուսո ինձ առնել զկամս քո, զի դու ես Աստուած իմ:

10․ Հոգի քո բարի առաջնորդեսցէ ինձ յերկիր ուղիղ: Վասն անուան քո Տէր կեցուսցես զիս արդարութեամբ քով,

11․ հանցես ի նեղութենէ զանձն իմ: Ողորմութեամբ քով սատակեսցես զթշնամիս իմ.

12․ կորուսցես զամենայն նեղիչս անձին իմոյ, զի ես ծառայ քո եմ: Տունք ժգ: