1. Ի կատարած. վասն Իդիթովմայ. Սաղմոս յԱսափ. ՀԶ:
2. Ձայնիւ իմով ես առ Տէր կարդացի, ձայնիւ իմով առ Աստուած, եւ նայեցաւ առ իս:
3. Յաւուր նեղութեան իմոյ զԱստուած խնդրեցի ձեռաւք իմովք, ի գիշերի առաջի նորա եւ ոչ խաբեցայ: Ոչ կամէր մխիթարել անձն իմ,
4. յիշեցի զԱստուած եւ ուրախ եղէ. հոգայի եւ նուաղէր յիս հոգի իմ: Հանգիստ:
5. Ժամանեցին պահուց աչք իմ, խռովեցայ եւ ոչ խաւսեցայ.
6. խորհեցայ զաւուրսն զառաջինս եւ զամս յաւիտենից յիշեցի:
7. Խաւսեցայ ի գիշերի ընդ սրտի իմում, հոգայի` եւ տառապէր յիս հոգի իմ:
8. Միթէ յաւիտենից մերժեսցէ՞ զիս Տէր, եւ ո՞չ եւս յաւելուցու ի հաճել եւ եւս:
9. Կամ ի սպա՞ռ արգելցէ զողորմութիւն իւր յինէն, կամ կատարեա՞ց զբան իւր ազգէ մինչչեւ յազգ:
10. Կամ մոռասցի՞ գթալ Աստուած իմ եւ եւս, կամ արգելցէ՞ զգթութիւն իւր բարկութեամբ իւրով:
11. Ասացի թէ այժմ սկսայ. այս է նորոգումն աջոյ բարձրելոյն:
12. Յիշեցի զգործս Տեառն իսկզբանէ, յիշեցի զսքանչելիս նորա:
13. Խաւսեցայ յամենայն գործս քո, եւ ի ձեռագործս քո խորհեցայ:
14. Աստուած ի սրբութեան են ճանապարհք քո. ո՞վ է Աստուած մեծ որպէս զԱստուած մեր.
15. դու ես Աստուած որ առնես զսքանչելիս: Ցուցեր ժողովրդեան քում զզաւրութիւն քո.
16. փրկեցեր բազկաւ քով զժողովուրդս քո զորդիսն Յակովբայ եւ Յովսեփու: Հանգիստ:
17. Տեսին զքեզ ջուրք Աստուած, տեսին զքեզ ջուրք եւ երկեան, եւ խորք խռովեցան
18. ի ձայնէ ջուրց բազմաց: Ձայն ետուն ամպք, քանզի եւ նետք քո գնան
19. ի ձայնէ որոտալոյ քոյ անուի: Երեւեցան փայլատակունք քո տիեզերաց, խռովեցաւ եւ դողաց երկիր:
20. Ի ծովու են ճանապարհք քո, շաւիղք քո ի ջուրս բազումս, եւ հետք քո ոչ եւս երեւին:
21. Առաջնորդեցեր որպէս խաշին ժողովրդեան քոյ, ի ձեռն Մովսիսի եւ Ահարոնի: Տունք. ժը: Գոբղայս. լը:
Հաղորդում կայքում սխալի վերաբերյալ
Տվյալ հատվածում առկա է սխալ: