1. Ի կատարած. Սաղմոս ի Դաւիթ. ԿԷ:
2. Յարիցէ Աստուած եւ ցրուեսցին ամենայն թշնամիք նորա, փախիցեն ատելիք նորա յերեսաց նորա:
3. Որպէս պակասէ ծուխ պակասեսցին, որպէս հալի մոմ առաջի հրոյ` այնպէս կորիցեն մեղաւորք յերեսաց Աստուծոյ:
4. Արդարք ուրախ եղիցին` ցնծասցեն առաջի նորա, եւ զուարճասցին յուրախութեան իւրեանց:
5. Աւրհնեցէք զԱստուած եւ սաղմոս ասացէք անուան նորա. ճանապարհ արարէք այնմիկ որ նստի ընդ արեւմուտս` եւ Տէր է անուն նորա: Ցնծասցեն առաջի նորա, եւ խռովեսցին յերեսաց նորա:
6. Որ հայրն է որբոց եւ դատաւոր այրեաց, Աստուած ի տեղւոջ սրբութեան իւրում:
7. Աստուած բնակեցուցանէ զմիակրաւնս ի տան, եւ հանէ զկապեալսն քաջութեամբ իւրով, սոյնպէս եւ զդառնացաւղս որ բնակեալ են ի գերեզմանս:
8. Աստուած ընդ ելանել քեզ առաջի ժողովրդեան քոյ. ընդ անցանել քեզ ընդ անապատ
9. երկիր շարժեցաւ: Քանզի եւ երկինք ցաւղեցին յերեսաց Աստուծոյ ի սինէ, առաջի Աստուծոյ Իսրայէլի:
10. Անձրեւ կամաց պատրաստեցեր Աստուած ժառանգութեան քում. թէպէտ հիւանդացաւ` սակայն դու հաստատեցեր զնա,
11. եւ գազանք քո բնակեսցեն ի նմա: Պատրաստ արարեր քաղցրութեամբ քով աղքատի Աստուած.
12. Տէր տացէ զբան ոյք աւետարանեն զաւրութեամբ բազմաւ:
13 Թագաւոր զաւրութեանց սիրելւոյ, զգեղեցկութիւն տան քո բաժանեալ յաւարի,
14. թէպէտ եւ ննջեսջիք ի մէջ վիճակաց: Թեւք աղաւնւոյ արծաթապատ, եւ թիկնամէջք նորա ի գոյն ոսկւոյ:
15. Ի գումարել երկնաւորին զթագաւորս ի վերայ նորա, ձիւնասցին ի սաղմոն:
16. Լեառն Աստուծոյ լեառն պարարտ լեառն մածեալ եւ լեառն պարարտ,
17. եւ զի՞նչ կարծէք լերինք հպարտացեալք: Լեառն ընդ որ հաճեցաւ Աստուած բնակիլ ի նմա. քանզի եւ Տէր իսկ բնակեսցէ ի նմա ի սպառ:
18. Կառք Աստուծոյ բիւրապատիկք հազարք ուղղիչք, եւ Տէր ի նոսա ի սինէ սրբութենէ իւրմէ:
19. Ել ի բարձունս գերեաց զգերութիւն. առ աւար բաշխեաց պարգեւս եւ ետ որդւոց մարդկան. քանզի թերահաւատից եւս բնակեալ եղիցի ի նմա:
20. Տէր Աստուած աւրհնեալ, աւրհնեալ Տէր զաւրհանապազ, առաջնորդեսցէ մեզ Աստուած փրկիչ մեր:
21. Աստուած մեր Աստուած կենարար, եւ ի Տեառնէ են ելք մահու:
22. Բայց սակայն Աստուած փշրեսցէ զգլուխ թշնամեաց մերոց, եւ զհերն կարճովին, որ գնան յանաւրէնութեան իւրեանց:
23. Ասաց Տէր` ի խորոց անդնդոց դարձուցից, ի միջոյ ժանեաց զայն ի դուրս կորզեցից:
24. Որպէս թացցի ոտն քո յարեան, եւ լեզուք շանց քոց յարենէ թշնամեաց քոց:
25. Երեւեցան գնացք քո Աստուած, գնացք Աստուծոյ թագաւորին մերոյ սրբոյ:
26. Կանխեցին իշխանք հանել զաւրհնութիւն, ի մէջ գուսանաց եւ գովչաց:
27. Յեկեղեցիս աւրհնեցէք զԱստուած, եւ զՏէր յաղբերացն Իսրայէլի:
28. Անդ Բենիամին` ի տղայութեան զարմանալի, իշխանք Յուդայ առաջնորդք նորա` իշխանք Զաբուղոնի եւ իշխանք Նեփթաղիմայ:
29. Հրամայեա Աստուած զաւրութեամբ քով. զաւրացո զայս զոր հաստատեցեր ի մեզ:
30. Ի տաճարի քում յԵրուսաղէմ, քեզ մատուսցեն թագաւորք զպատարագս:
31. Սաստեա ի գազան եղեգան, ի ժողովս զուարակաց` եւ ի դասս երնջուց: Խոտեսցին այնոքիկ որ ընտրեալ են արծաթով, ցրուեա զհեթանոսս եւ ոյք կամին ընդ պատերազմ:
32. Եկեսցեն հրեշտակք յԵգիպտոսէ. հնդիկք յառաջագոյն ձեռնտու լիցին առ Աստուած:
33. Թագաւորութիւնք երկրի աւրհնեցէք զԱստուած, եւ սաղմոս ասացէք Տեառն: Ճանապարհ արարէք այնմիկ,
34. որ նստի յերկինս երկնից ընդ յարեւելս: Ահա տացէ զձայն իւր ձայն զաւրութեան, եւ տուք փառս Աստուծոյ:
35. Ի վերայ Իսրայէլի մեծվայելչութիւն նորա, զաւրութիւն նորա մինչչեւ յամպս երկնից:
36. Սքանչելի է Աստուած ի վերայ սրբոց իւրոց, Աստուած Իսրայէլի: Նա տացէ զաւրութիւն հաստատութիւն ժողովրդեան իւրոյ. աւրհնեալ է Աստուած: Տունք. լը:
Հաղորդում կայքում սխալի վերաբերյալ
Տվյալ հատվածում առկա է սխալ: