Գլուխ 112

Ալէլուիա. ՃԺԲ:
   
1․ Աւրհնեցէք մանկունք զՏէր, եւ աւրհնեցէք զանուն Տեառն:

2․ Եղիցի անուն Տեառն աւրհնեալ, յայսմ հետէ մինչչեւ յաւիտեան:

3․ Յարեւելից մինչ ի մուտս արեւու, աւրհնեալ է անուն Տեառն:

4․ Բարձր է ի վերայ ամենայն ազգաց Տէր, եւ յերկինս են փառք նորա:

5․ Ով է որպէս Տէր Աստուած մեր ի բարձունս բնակեալ,

6․ եւ զխոնարհս տեսանէ յերկնից ի յերկիր:

7․ Յարուցանէ զաղքատ յերկրէ, եւ բարձր առնէ զտառապեալս յաղբեւաց:

8․ Նստուցանէ զնոսա իշխանս, ընդ իշխանս ժողովրդեան իւրոյ:

9․ Բնակեցուցանէ զամուլն ի տան ուրախամիտ, որպէս մայր որդւոց բերկրեալ: Տունք. ը: