Գլուխ 150

Ալէլուիա. ՃԾ:

 

1. Աւրհնեցէք զԱստուած ի սրբութեան նորա, աւրհնեցէք զնա հաստատութեան ի զաւրութեան նորա:

2. Աւրհնեցէք զնա ի զաւրութեան նորա, գովեցէք զնա ի բազում մեծութեան նորա:

3. Աւրհնեցէք զնա ի ձայն աւրհնութեան, աւրհնեցէք զնա սաղմոսիւք եւ աւրհնութեամբ:

4. Աւրհնեցէք զնա ցնծութեամբ, գովեցէք զնա ուրախութեամբ:

5. Աւրհնեցէք զնա ի բանս քաղցունս, աւրհնեցէք զնա ի բարբառ լսելի: Աւրհնեցէք զնա ի ձայն գոհութեան.

6. ամենայն հոգիք աւրհնեցէք զՏէր: Տունք. զ:

 

Գոբղայս. իը: Կանոնս տունք. յխը: Չորք կանոնս տունք ռյխբ: Միահամուռ Սաղմոսս` գոբղայս. ծզ: Սաղմոս ճծ: Տունք ի սմա սնկբ:

Այս Սաղմոս ինքնագիր Դաւթի արտաքոյ թուոց: Ի ժամանակի զի ել նա նահատակ ընդդէմ Գողիադու, առաջի Շաւուղի:

 

1. Փոքր էի ես յեղբարս իմ. եւ կրտսեր ի տան հաւր իմոյ, արածէի զխաշինս հաւր իմոյ:

2. Ձեռք իմ արարին զսաղմոսարանս, եւ մատունք իմ կազմեցին զգործի աւրհնութեան:

3. Իսկ արդ` ո պատմեսցէ զայս Տեառն իմում, ինքն Տէր ամենայնի լուիցէ զամենայն:

4. Որ առաքեաց զհրեշտակ իւր եւ ամբարձ զիս ի հաւտէ խաշանց հաւր իմոյ, եւ աւծ զիս յաւծումն իւղոյ իւրոյ:

5. Եղբարք իմ գեղեցիկք եւ մեծամեծք, եւ ոչ հաճեցաւ ընդ նոսա Տէր:

6. Ելի ես ընդ առաջ այլազգւոյն, եւ նզովեցի զկուռս նորա:

7. Ես հանի զսուսեր ի նմանէ եւ հատի զգլուխ նորին, եւ բարձի զնախատինս յորդւոցն Իսրայէլի: Տունք. է: