Գլուխ 70

   
1. Ի կատարած. որդւոցն Յովնադաբայ` յետ առաջնոյ գերութեան. Սաղմոս ի Դաւիթ. Հ: Ի քեզ Տէր յուսացայ մի ամաչեցից յաւիտեան,

2. յարդարութեան քում փրկեա զիս եւ ապրեցո զիս: Խոնարհեցո առ իս զունկն քո, եւ կեցո զիս:

3. Լեր իմ Աստուած ապաւէն եւ տեղի ամուր կեցուցանել զիս. զի հաստատութիւն իմ եւ ապաւէն իմ դու ես:

4. Աստուած իմ փրկեա զիս ի ձեռաց մեղաւորի, ի ձեռաց անաւրինի եւ անիրաւի:

5. Դու ես համբերութիւն իմ Տէր Տէր, յոյս իմ ի մանկութենէ իմմէ:

6. Ի քեզ հաստատեցայ ես յարգանդէ, յորովայնէ մաւր իմոյ դու ես ապաւէն իմ, եւ առ ի քէն է աւգնութիւն իմ յամենայն ժամ:

7. Որպէս զի նշաւակ եղէ ես բազմաց, եւ դու աւգնական իմ եւ հզաւրիչ իմ:

8. Լցցի բերան իմ գովութեամբ, որպէս աւրհնեցից զփառս քո, զաւրհանապազ զմեծվայելչութիւնս քո:

9. Մի ընկենուր զիս Տէր ի ժամանակի ծերութեան, ի պակասել զաւրութեան իմոյ մի թողուր զիս:

10. Ասացին թշնամիք իմ ինձ, եւ ոյք պաշարեցին զանձն իմ, խորհեցան ի միասին եւ ասացին:

11. Աստուած եթող զնա հալածեսցուք եւ հասցուք նմա, զի ոչ ոք է որ փրկէ զնա:

12. Աստուած իմ մի հեռի առնիր յինէն, եւ Աստուած յաւգնել ինձ նայեաց:

13. Ամաչեսցեն եւ պատկառեսցին որ չարախաւս կային զանձնէ իմմէ, զգեցցին զամաւթ եւ զպատկառանս ոյք խնդրէին ինձ չար:

14. Ես յամենայն ժամ յուսացայց, եւ յաւելից յաւրհնութիւնս քո:

15. Բերան իմ պատմեսցէ զարդարութիւնս քո, զաւրհանապազ զգովութիւնս քո: Որպէս ոչ թէ խարդախութիւն ինչ գիտէի ես դպրութեան.

16. այլ մտի ի զաւրութիւնս Տեառն, եւ Տէր յիշեցի զարդարութիւնս քո միայն:

17. Աստուած իմ ուսուցեր զիս ի մանկութենէ իմմէ, եւ ցարդ եւս պատմեցից զարդարութիւնս քո:

18. Մինչչեւ յալեւորել եւ ի ծերանալ, Աստուած իմ մի թողուր զիս: Մինչչեւ պատմեսցի բազուկ քո ազգի ամենայնի որ գալոցն է: Զզաւրութիւնս քո

19. եւ զարդարութիւն մինչչեւ ի բարձունս, զոր արարեր մեծամեծս. Աստուած ո նման է քեզ:

20. Որչափ ցուցեր ինձ նեղութիւն բազում եւ չարչարանս, դարձար մխիթարեցեր զիս, եւ ի խորոց անդնդոց երկրէ հաներ զիս:

21. Յաճախեցեր ի զաւրութիւնս քո, դարձար եւ մխիթարեցեր զիս, եւ ի խորոց երկրէ միւսանգամ հաներ զիս:

22. Արդ եւ ես խոստովան եղեց քեզ ի պատրաստութիւն սաղմոսաց ճշմարիտդ Աստուած. սաղմոս ասացից քեզ աւրհնութեամբ սուրբդ Իսրայէլի:

23. Ցնծասցեն շրթունք իմ յորժամ սաղմոս ասիցեմ քեզ, եւ անձն իմ զոր եւ փրկեցեր:

24. Եւս եւ լեզու իմ` զաւրհանապազ խաւսեսցի զարդարութիւնս քո: Ի ժամանակի որպէս յամաւթ լիցին, եւ ամաչեսցեն ոյք խորհէին ինձ չար: Տունք. իզ: