Գլուխ 59

   
1. Զառանցելոց ժամանակաց առ ուսմէ:

2. ի ժամանակի զի հրձիգ արար նա զՄիջագետս եւ զԱսորեստանն Սոբողայ, եւ ի դարձին հարկանէր Յովաբ զձորն աղտից յերկոտասան հազարս: Յարձանագիր.

3. Աստուած մերժեցեր եւ աւերեցեր զմեզ, բարկացար եւ գթասցիս ի մեզ:

4. Շարժեցեր զերկիր եւ խռովեցուցեր զսա. բժշկեա զհարուածս սորա զի սասանեցաւ:

5. Ցուցեր ժողովրդեան քում խստութիւն, եւ ետուր ըմպել մեզ գինի յիմարութեան:

6. Ետուր երկիւղածաց քոց նշան, զի ապրեսցին յերեսաց աղեղան:

7. Որպէս փրկեցան սիրելիք քո, կեցո աջով քով եւ լուր մեզ:

8. Աստուած խաւսեցաւ ի սրբութենէ իւրմէ, բարձր եղէց բաժանեցայց զսիւքեմ, եւ զհովիտսն յարկաց չափեցից:

9. Իմ է Գաղաադ եւ իմ է Մանասէ, Եփրեմ հզաւրիչ գլխոյ իմոյ: Յուդայ թագաւոր իմ,

10. Մովաբ աւազան յուսոյ իմոյ: Յեդոմէ ուղղեցից զգնացս իմ, եւ ինձ այլազգիք հնազանդ եղեն:

11. Ո տարցի զիս ի քաղաք ամուր, կամ ո առաջնորդեսցէ ինձ մինչչեւ յԵդոմէ:

12. Թէ ոչ դու Աստուած որ մերժեցեր զմեզ, եւ ոչ ելեր Աստուած ընդ զաւրս մեր:

13. Տուր մեզ աւգնութիւն ի նեղութեան, զի ընդունայն է փրկութիւն մարդոյ:

14. Աստուծով արասցուք զաւրութիւն, եւ նա արհամարհեսցէ զայնոսիկ որ նեղեն զմեզ: Տունք. ժգ: